ຂປລ
ຂປລ. ຕະຫລາດລາວຈະເລີນ ແມ່ນໜຶ່ງໃນສະຖານທີ່ທ່ອງທ່ຽວ ທີ່ໄດ້ຮັບຄວາມນິຍົມ ຂອງນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ໄດ້ມາແຂວງສະຫວັນນະເຂດ ຕ້ອງໄດ້ມາຢ້ຽມຢາມສະຖານທີ່ແຫ່ງນີ້ເນື່ອງຈາກວ່າ ບັນຍາກາດດີ, ອາຫານກໍແຊບ ແລະ ມີຮ້ານອາຫານຫລາກຫລາຍ ໃຫ້ເລືອກກິນແບບບໍ່ຊໍາກັນເປັນຕົ້ນອາຫານຕາມສັ່ງ, ປະເພດເສັ້ນ, ຕໍາ, ຍໍາ, ແກງ ແລະ ອື່ນໆ
ຂປລ. ຕະຫລາດລາວຈະເລີນ ແມ່ນໜຶ່ງໃນສະຖານທີ່ທ່ອງທ່ຽວ ທີ່ໄດ້ຮັບຄວາມນິຍົມ ຂອງນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ໄດ້ມາແຂວງສະຫວັນນະເຂດ ຕ້ອງໄດ້ມາຢ້ຽມຢາມສະຖານທີ່ແຫ່ງນີ້ເນື່ອງຈາກວ່າ ບັນຍາກາດດີ, ອາຫານກໍແຊບ ແລະ ມີຮ້ານອາຫານຫລາກຫລາຍ ໃຫ້ເລືອກກິນແບບບໍ່ຊໍາກັນ ເປັນຕົ້ນອາຫານຕາມສັ່ງ, ປະເພດເສັ້ນ, ຕໍາ, ຍໍາ, ແກງ ແລະ ອື່ນໆ ເວົ້າໄດ້ວ່າມາບ່ອນນີ້ຢາກກິນຫຍັງກໍໄດ້ກິນ.ນອກນີ້, ຍາມຄໍ່າຄືນ ຍັງມີດົນຕີບັນເລງເພງມວນໆ ເພື່ອສ້າງຄວາມເບີກບານມ່ວນຊື່ນໃຫ້ລູກຄ້າທີ່ເຂົ້າມາໃຊ້ບໍລິການ ໃນຕະຫລາດລາວຈະເລີນແຫ່ງນີ້.
ນາງ ກະນົກພອນ ຂາວພອນ ຜູ້ຈັດການຕະຫລາດລາວຈະເລີນ ໃຫ້ຮູ້ວ່າ: ສໍາລັບຕະຫລາດລາວຈະເລີນ ເປີດໃຫ້ບໍລິການມາແຕ່ປີ 2022 ປັດຈຸບັນ ມີບັນດາຮ້ານຄ້າ 100 ປາຍຮ້ານເຂົ້າມາຂາຍອາຫານ ໂດຍໃນຕະຫລາດໄດ້ມີການ ຈັດສັນແບ່ງເປັນຫລາຍສ່ວນ ເຊັ່ນ: ເຂດປີ້ງ, ເຂດອາຫານສຸກ, ປະເພດຂອງຫວານ, ອາຫານຕາມສັ່ງ, ຕຳ, ຍຳ... ແລະ ໂຊນຂາຍເຄື່ອງນຸ່ງຫົ່ມ. ນອກຈາກນີ້, ໃນຍາມກາງຄືນກໍຈະມີ ການເສບດົນຕີມ່ວນໆ ໃຫ້ລູກຄ້າຟັງ ພ້ອມກັບການກິນອາຫານແຊບໆ , ສໍາລັບຈຸດເດັ່ນທີ່ສາມາດ ດຶງດູດນັກທ່ອງທ່ຽວ ທັງພາຍໃນ ແລະ ຕ່າງແຂວງ ໄດ້ຢ່າງຫລວງຫລາຍ ກໍຈະເປັນບັນຍາກາດທີ່ສວຍງາມ ໂດຍສະເພາະຍາມແລງ ຈະເຫັນທິວທັດແຄມຂອງໄດ້ຢ່າງຊັດເຈນ ບວກກັບການອອກແບບຕະຫລາດໃຫ້ມີຄວາມສວຍງາມ, ທັນສະໄໝ, ມີບ່ອນຖ່າຍຮູບ,ມີບ່ອນນັ່ງຫລິ້ນດ້ານໜ້າຕະຫລາດ. ນອກນີ້, ກໍມີອາຫານທີ່ຫລາກຫລາຍ.ແນວໃດກໍດີ, ເມື່ອມີຕະຫລາດແລ້ວ ກໍຈະປະຕິເສດບໍ່ໄດ້ເລື່ອງ ບັນຫາສິ່ງແວດລ້ອມ ແຕ່ທາງເຮົາກໍພະຍາມເອົາໃຈໃສ່ແກ້ໄຂ ໂດຍເບື້ອງຕົ້ນແມ່ນ ໃຫ້ບັນດາຜູ້ປະກອບການ ແຍກຂີ້ເຫຍື້ອ, ອະນາໄມສະຖານທີ່ ແລະ ສົ່ງເສີມການນໍາໃຊ້ພາຊະນະຖ້ວຍ, ບ່ວງຫີນເວລາລູກຄ້າເຂົ້າມາກິນຢູ່ຮ້ານ ເພື່ອຫລຸດຜ່ອນການນໍາໃຊ້ກ໋ອງໂຟມ, ຖົງຢາງປລາສຕິກອີກດ້ວຍ. ນອກຈາກມີຂາຍອາຫານ ໃນຕະຫລາດລາວຈະເລີນແລ້ວ, ຍັງມີບໍລິການໂຮງໜັງລາວຈະເລີນ ທີ່ຫາກໍເປີດ ໃນເດືອນ ພຶດສະພາຜ່ານມານີ້ ເພື່ອອຳນວຍຄວາມສະດວກ ໃຫ້ກັບລູກຄ້າທີ່ເຂົ້າມາຊື້ ມາກິນອາຫານແລ້ວ ຍັງສາມາດໄປເບິ່ງໜັງໄດ້ອີກ, ຖືວ່າມາບ່ອນດຽວຄຸ້ມສຸດຄຸ້ມ.
ນາງ ກະນົກພອນ ເວົ້າເສີມວ່າ: ຕະຫລາດລາວຈະເລີນ ເປັນອີກຕະຫລາດໜຶ່ງ ທີ່ຊ່ວຍສົ່ງເສີມໃຫ້ຊາວໜຸ່ມ-ໄວໜຸ່ມ ແລະ ພໍ່ແມ່ປະຊາຊົນ ໃນທ້ອງຖິ່ນມີວຽກເຮັດງານທໍາ, ມີລາຍຮັບເພີ່ມຂຶ້ນ ເນື່ອງຈາກວ່າ ມີການຄ້າຂາຍ ກໍ່ມີຫລາຍວຽກທີ່ຕິດພັນກັນ ເຮັດໃຫ້ມີການຈ້າງງານຢ່າງຫລວງຫລາຍ. ສະນັ້ນ, ຈຶ່ງເຊີນຊວນທຸກໆ ທີ່ໄດ້ມາທ່ຽວ ແຂວງສະຫວັນນະເຂດ ກໍສາມາດແວ່ເຂົ້າມາທ່ຽວຊົມໄດ້ ໂດຍຮ້ານຈະເປີດບໍລິການທຸກວັນ ເລີ່ມແຕ່ເວລາ 16:00 ໂມງ - 23:00 ໂມງ ຮັບຮອງວ່າທ່ານຈະປະທັບໃຈແນ່ນອນ. ສໍາລັບ ທ່ານໃດມາແຂວງສະຫວັນນະເຂດ ຢາກໄປຫລີ້ນຕະຫລາດນີ້ ແຕ່ບໍ່ຮູ້ທາງ ກໍ່ສາມາດຕິດຕໍ່ສອບຖາມໄດ້ທີ່ເບີ 02022213757.
ໂດຍ: ມາລີດາ
KPL
