ຂປລ
ກອງປະຊຸມ ສ້າງຕັ້ງກົນໄກ “ຄູ່ຮ່ວມສື່ມວນຊົນ ເຂດໂລກໃຕ້” ກໍຄື ກອງປະຊຸມເວທີ ປຶກສາຫາລື ສື່ມວນຊົນ ວິດີໂອທົ່ວໂລກ ຄັ້ງທີ 13 ຈັດຂຶ້ນຢູ່ນະຄອນຊີອານ ແຂວງສ້ານຊີ ສປ ຈີນ.
ຂປລ.ວິທະຍຸ-ໂທລະພາບ ສູນກາງຈີນ, ວັນທີ 6 ພະຈິກນີ້, ກອງປະຊຸມ ສ້າງຕັ້ງກົນໄກ “ຄູ່ຮ່ວມສື່ມວນຊົນ ເຂດໂລກໃຕ້” ກໍຄື ກອງປະຊຸມເວທີ ປຶກສາຫາລື ສື່ມວນຊົນ ວິດີໂອທົ່ວໂລກ ຄັ້ງທີ 13 ຈັດຂຶ້ນຢູ່ນະຄອນຊີອານ ແຂວງສ້ານຊີ ສປ ຈີນ. ທ່ານ ອາຊິຟ ອາລີ ຊາດາຣີ ປະທານາທິບໍດີ ປາກິດສະຖານ, ທ່ານ ອານູຣາ ກູມາຣາ ດິສຊານາຢາເກ ປະທານາທິບໍດີ ສີລັງກາ ແລະ ທ່ານ ຢາມານດູ ອໍຊີ ປະທານາທິບໍດີ ອູຣູກວາຍ ໄດ້ສົ່ງສານຊົມເຊີຍ ເຖິງກອງປະຊຸມ ແລະ ອວຍພອນໃຫ້ກອງປະຊຸມຄັ້ງນີ້ ໄດ້ຮັບຜົນສຳເລັດ ຢ່າງຈົບງາມ. ກອງປະຊຸມດັ່ງກ່າວ ມີເຈົ້າໜ້າທີ່ ອົງການຈັດຕັ້ງສາກົນ ແລະ ອົງການສື່ມວນຊົນຈາກ 40 ປະເທດ ແລະ ເຂດແຄວ້ນ, ແຂກຜູ້ມີກຽດ ແລະ ທູຕານຸທູດ ຕ່າງປະເທດ ປະຈຳຈີນ 300 ກວ່າຄົນເຂົ້າຮ່ວມ ແລະ ໄດ້ເປັນສັກຂີພິຍານ ໃຫ້ແກ່ ການປະກາດ ຜົນການຮ່ວມມື ດ້ານສື່ມວນຊົນ ຫລາຍໂຄງການ. ຈາກນັ້ນ ທ່ານ ເຊິ້ນໄຫສົງ ຮອງຫົວໜ້າຄະນະ ໂຄສະນາອົບຮົມສູນກາງພັກ ກອມມູນິດຈີນ ຜູ້ອຳນວຍການໃຫຍ່ ວິທະຍຸ-ໂທລະພາບ ສູນກາງຈີນ ຫລື CMG ກ່າວວ່າ: ໂລກປັດຈຸບັນ ໄດ້ກ້າວເຂົ້າສູ່ ໄລຍະທີ່ປັ່ນປ່ວນ ແລະ ປ່ຽນແປງໃໝ່, ທ່ານ ສີຈິ້ນຜິງ ປະທານປະເທດຈີນ ໄດ້ສະເໜີ “ຂໍ້ລິເລີ່ມການບໍລິຫານທົ່ວໂລກ” ເຊິ່ງໄດ້ຕອບສະໜອງຕາມຄວາມຮຽກຮ້ອງ ຕ້ອງການຮີບດ່ວນທີ່ສຸດ ຂອງບັນດາປະເທດ ເຂດໂລກໃຕ້. CMG ໄດ້ລິເລີ່ມສ້າງຕັ້ງກົນໄກ “ຄູ່ຮ່ວມສື່ມວນຊົນ ເຂດໂລກໃຕ້” ເພື່ອຮ່ວມກັບ ສື່ມວນຊົນຈີນ ແລະ ຕ່າງປະເທດ ຄົ້ນຄວ້າ ປຶກສາຫາລື ກ່ຽວກັບໜ້າທີ່ຂອງສື່ມວນຊົນ ໃນການບໍລິຫານທົ່ວໂລກ. CMG ຍິນດີກຳໂອກາດ ແລະ ຮ່ວມແຮງຮ່ວມໃຈ ກັບຄູ່ຮ່ວມສື່ມວນຊົນເຂດໂລກໃຕ້, ປະກອບສ່ວນ ສະຕິປັນຍາ ແລະ ກຳລັງວັງຊາຂອງສື່ມວນຊົນ ເພື່ອສ້າງລະບຽບໂລກ ທີ່ຍຸຕິທຳ, ກວມລວມ ແລະ ດີງາມກວ່າເກົ່າ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
