ຂປລ. ວັນ​ທີ 3 ພະ​ຈິກ​ນີ້, ສັບ​ປະ​ດາ​ ການ​ຮ່ວມ​ມື ​ສື່ມວນ​ຊົນ “ຄູ່​ຮ່ວມ​ມື​ອາ​ຊຽນ” 2025 ທີ່​ວິ​ທະ​ຍຸ-​ໂທ​ລະ​ພາບ​ສູນ​ກາງ​ຈີນ ຫລື CMG ແລະ ອົງ​ການ​ ປົກ​ຄອງ ​ເຂດ​ປົກ​ຄອງ​ຕົນ​ເອງ ​ເຜົ່າຈ້ວງກວາງ​ຊີ​ ຂອງ ສປ ຈີນ​ ຮ່ວມ​ກັນ​ເປັນ​ເຈົ້າ​ພາບ ໄດ້​ໄຂ​ຂຶ້ນ​ຢູ່​ນະ​ຄອນ​ໜານ​ໜິງ. ກິດ​ຈະ​ກຳ​ຄັ້ງ​ນີ້​ພາຍ​ໃຕ້​ຫົ​ວ​ຂໍ້​ວ່າ: "ການເປີດກວ້າງ, ວັດທະນະ​ທຳ, ຮ່ວມສາຍຄາດຽວກັນ" (Openness, Culture, Shared Home) ໂດຍ​ມີ​ເຈົ້າ​ໜ້າ​ທີ່​ລັດ​ຖະ​ບານ, ທູ​ຕາ​ນຸ​ທູດປະ​ຈຳ​ຈີນ, ບຸກ​ຄົນ​ໃນ​ວົງ​ການ​ສື່ມວນ​ຊົນ, ຜູ້​ຊ່ຽວ​ຊານ, ນັກ​ວິ​ຊາ​ການ ແລະ​ອື່ນໆ 200 ກວ່າ​ທ່ານ​ທີ່​ມາ​ຈາກ​ຈີນ ແລະ ປະ​ເທດ​ສະ​ມາ​ຊິກ​ອາ​ຊຽນ​ເຂົ້າ​ຮ່ວມ ເພື່ອ​ດຳ​ເນີນ​ການ​ສົນ​ທະ​ນາ ແລະ ແລກ​ປ່ຽນ​​ຄວາມ​ເຫັນ​ຮ່ວມ​ກັນຢ່າງ​ເລິກ​ເຊິ່ງ. ທ່ານ ​ຟ້​ານຢູ​ນ ຮອງຜູ້​ອຳ​ນວຍ​ການ​ໃຫຍ່ CMG, ຮອງ​ບັນ​ນາ​ທິ​ການ​ໃຫຍ່ CGTN ກ່າວ​ວ່າ: ກອງ​ປະ​ຊຸ​ມ​ ຄົບ​ຄະ​ນະ​ຄັ້ງ​ທີ 4 ຂອງ​ຄະ​ນ​ະ​ກຳ​ມ​ະ​ການ​ສູນ​ກາງ​ພັກ​ຄອມ​ມູ​ນິດ​ຈີນ​ສະ​ໄໝ​ທີ 20 ໄດ້​ພິ​ຈາ​ລະ​ນາ ແລະ ຮັບ​ຮອງ​ເອົາ​ຂໍ້​ສະ​ເໜີ​ກ່ຽວ​ກັບ​ການ​ວາງ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ແຫ່ງ​ຊາດ 5 ປີ ຄັ້ງ​ທີ 15 ເຊິ່ງ​ໄດ້​ວາງ​ແຜນ​ການ​ໃໝ່​ກ່ຽວ​ກັບ​ວຽກ​ງານ​ທີ່​ຍິ່ງ​ໃຫຍ່​ຕ່າງໆ ເຊັ່ນ: ເປີດກວ້າງ​ການ​ເປີດ​ປະ​ຕູ​ສູ່​ພາຍນອກ​ໃນ​ລະ​ດັບ​ສູງ, ຮ່ວມ​ກັນ​ສ້າງ “ໜຶ່ງ​ແລ​ວໜຶ່ງ​ເສັ້ນ​ທາງ” ດ້ວຍ​ຄຸນ​ນະ​ພາບ​ສູງ ແລະ​ອື່ນໆ. CMG ຈະ​ຖື​ເອົາ “ການ​ເປີດ​ກວ້າງ” ເປັນ​ທິດ​ຊີ້​ນຳ, ຮ່ວມ​ກັບ​ຄູ່​ຮ່ວມມື​ອາ​ຊ​ຽນ ເພື່ອ​ຄົ້ນ​ຄວ້າ​​ການ​ປະ​ຍຸກ​ໃຊ້ປັນ​ຍາ​ປ​ະ​ດິດ, ຖານ​ຂໍ້​ມູນ​ໃຫຍ່, cloud computing ​ແລະ ​ເຕັກ​ນິກ​ປະ​ດິດ​ສ້າງ​ໃໝ່​ອື່ນໆໃນ​ຂົງ​ເຂ​ດ​ສື່ມ​ວນ​ຊົນ​ຕື່ມ​ອີກ, ເຮັດ​ໃຫ້​ໝາກ​ຜົນ​ຂອງ​ການ​ຮ່ວມ​ມື​ດ້ານ​ສື່ມວນ​ຊົນ​ສ້າງ​ຜົນ​ປະ​ໂຫຍດ​ໃຫ້​ແກ່​ປະ​ຊາ​ຊົນ​ບັນ​ດາ​ປະ​ເທດ​ໃນ​ພາກ​ພື້ນ​ດີ​ຂຶ້ນກວ່າ​ເກົ່າ; ຖື “ວັດ​ທະ​ນະ​ທຳ” ເປັ​ນ​ສາຍ​ເຊື່ອມ​ຕໍ່, ຮ່ວມ​ກັບ​ຄູ່​ຮ່ວມ​ມື​ອາ​ຊຽນ ເພື່ອ​ວາງ​ແຜນ​ຈັດ​ກິດ​ຈະ​ກຳ​ແລກ​ປ່ຽນ​ວັດ​ທະ​ນະ​ທຳ​ທີ່​ເຊື່ອ​ມ​ຕໍ່​ຈິດ​ໃຈ​ປະ​ຊາ​ຊົນ, ຕິດ​ແທດ​ກັບ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ ແລະ  ມີ​ຄວາມ​ອົບ​ອຸ່ນຫຼາຍກວ່າ​ເກົ່າ; ຖື “ຮ່ວມສາຍຄາດຽວກັນ” ເປັນ​ຈຸດ​ຢືນ, ສືບ​ຕໍ່​ເສີມ​ຂະ​ຫຍາຍ​ທ່າ​ແຮງດ້ານ​ໂຄ​ສະ​ນາ​ເຜີຍ​ແຜ່​ສາ​ກົນ​ຂອງ CMG ​ທີ່ກວມ​ເອົາ 85 ພາ​ສາ, ເວ​ທີ​​ສັບ​ພະ​ສື່​ຂອງ CGTN, ມີ​ສະ​ຖາ​ນີ 192 ແຫ່ງ​ຢູ່​ຕ່າງ​ປະ​ເທດ ແລະ​ອື່ນໆ ເພື່ອເລົ່າ​ເລື່ອງ​ກ່ຽວ​ກັບ​ຈີນ ແລະ ອາ​ຊຽນ​ຮ່ວມ​ມື​ກັນ​ແບບ​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະ​ໂຫຍດ​ໃຫ້​ດີ. ຈາກນັ້ນ ທ່ານ ​ຄຳ​ພັນ ເຜີຍ​ຍະ​ວົງ ເລ​ຂາ​ທິ​ການ​ສູນ​ກາງ​ພັກ ຫົວ​ໜ້າ​ຄະ​ນະ ໂຄ​ສະ​ນາ​ອົບ​ຮົມ ​ສູນ​ກາງ​ພັກ​ ປະ​ຊາ​ຊົນ​ ປະ​ຕິ​ວັດ​ລາວ ​ໄດ້​ກ່​າວ​ຄຳ​ປາ​ໄສ​ ຜ່ານ​ທາງວີ​ດີ​ໂອ​ວ່າ: ກິດ​ຈະ​ກຳ​ຄັ້ງ​ນີ້ ​ບໍ່​ພຽງ​ແຕ່​ໄດ້​ສະ​ທ້ອນ​ເຖິງ​ ຈິດ​ໃຈ​ ແຫ່ງ​ການ​ຮ່ວມ​ມື​ ເທົ່າ​ນັ້ນ, ແຕ່​ຍັງ​ເປັນ​ການ​ຢັ້ງ​ຢືນ ​ເຖິງ​ສາຍ​ພົວ​ພັນ​ອັນ​ແໜ້ນ​ແຟ້ນ​ ລະ​ຫວ່າງ​ ປະ​ຊາ​ຊົນ​ຈີນ-ອາ​ຊຽນ ​ທີ່​ມີ​ມາ​ແຕ່​ດົນ​ນານ. ສຳລັບ ໃນ​ຍຸກ​ດີ​ຈີ​ຕອນ ທີ່​ເຕັມ​ໄປ​ດ້ວຍ​ການ​ປ່ຽນ​ແປງ, ບົດ​ບາດ​ຂອງ​ສື່ມວນ​ຊົນ​ ໄດ້​ຫັນ​ປ່ຽນ​ໄປ ​ຢ່າງ​ເຊິກ​ເຊິ່ງ. ສື່ມວນ​ຊົນ​ ບໍ່​ພຽງ​ແຕ່ ​ເປັນ​ຜູ້​ລາຍ​ງານ​ຂ່າວ, ແຕ່​ໄດ້​ກາຍ​ເປັນ “ຂົວ​ຕໍ່” ທີ່​ສຳ​ຄັນ ​ໃນ​ການ​ເຊື່ອມ​ໂຍງ ວັດ​ທະ​ນະ​ທຳ ແລະ ສ້າງ​ຄວາມ​ເຂົ້າ​ໃຈ ​ເຊິ່ງ​ກັນ​ແລະ​ກັນ. ພ້ອມທັງ ຮູ້​ດີ​ວ່າ ສປ ຈີນ ແລະ ອາ​ຊຽນ ແມ່ນ​ປະ​ເທດ ​ບ້ານ​ໃກ້​ເຮືອນ​ຄຽງ​ ເຊື່ອມ​ຕໍ່​ກັນ ທັງ​ພູ​ຜາ ແລະ ສາຍ​ນ້ຳ, ສື່ມວນ​ຊົນ​ ​ມີ​ໜ້າ​ທີ່​ໃນ​ການ​ສ້າງ​ຂົວ​ຕໍ່ ແຫ່ງ​ມິດ​ຕະ​ພາບ ເພື່ອ​ໃຫ້​ປະ​ຊາ​ຊົນ​ ​ໄດ້​ເຂົ້າ​ໃຈ ແລະ ຮຽນ​ຮູ້​ ເຊິ່ງ​ກັນ ​ແລະ​ ກັນຫລາຍ​ຂຶ້ນ. ຕ້ອງ​ຮ່ວມ​ກັນ​ນຳ​ສະ​ເໜີ ​ເລື່ອງ​ລາວ​ທີ່​ສ້າງ​ສັນ, ເລື່ອງ​ລາວ​ແຫ່ງ​ການ​ຮ່ວມ​ມື ແລະ ການ​ພັດ​ທະ​ນາ ເພື່ອ​ສ້າງ​ຄູ່ “ຮ່ວມ​ສາຍ​ຄາ​ດຽວ​ກັນ” ທີ່​ໝັ້ນ​ຄົງ, ເຂັ້ມ​ແຂງ ແລະ ຍືນ​ຍົງ. ໃນ​ຖາ​ນະ​ເປັນ​ສະ​ມາ​ຊິກ​ໜຶ່ງ​ ໃນ​ຄອບ​ຄົວ​ ອາ​ຊຽນ, ສ​ປ​ປ ລາວ ພ້ອມ​ຈະ​ສົ່ງ​ເສີມ​ ການ​ຮ່ວມ​ມື​ ດ້ານ​ສື່ມວນ​ຊົນ​ກັບ ສ​ປ ຈີນ ແລະ ບັນ​ດາ​ປະ​ເທດ​ ສະ​ມາ​ຊິກ​ ອາ​ຊຽນ​ອື່ນໆ ໃຫ້​ເຂົ້າ​ສູ່​ລວງ​ເລິກ.ນອກນີ້ ຍັງມີ​ຄວາມ​ເຊື່ອ​ໝັ້ນ​ຢ່າງ​ຍິ່​ງວ່າ “ສັບ​ປະ​ດາ​ຮ່ວມ​ມື” ໃນ​ຄັ້ງ​ນີ້ ຈະ​ເປັນ​ເວ​ທີ​ທີ່​ສຳ​ຄັນ ​ໃຫ້​ພວກ​ເຮົາ​ໄດ້ “ບັນ​ລຸ​ແນວ​ຄວາມ​ຄິດ​ໃໝ່ໆ ແລະ ສຳຫລວດ​ເສັ້ນ​ທາງ​ໃໝ່” ເພື່ອ​ຍົກ​ລະ​ດັບ​ ການ​ຮ່ວມ​ມື ​ດ້ານ​ສື່ມວນ​ຊົນ​ ​ໃຫ້​ກ້າວ​ໄປ​ອີກ​ຂັ້ນ​ໜຶ່ງ. ສັບ​ປະ​ດາ​ການ​ຮ່ວມ​ມື​ຄັ້ງ​ນີ້​ ຍັງ​ຈະ​ຈັດ​ກອງ​ປະ​ຊຸມ ​ສົນ​ທະ​ນາ​ຊາວ​ໜຸ່ມ ​ວົງ​ການ​ສື່ມວນ​ຊົນ​ຈີນ-ອາ​ຊຽນ, ຊາວ​ໜຸ່ມ​ວົງ​ການ​ສື່ມວນ​ຊົນ ສອງ​ຝ່າຍ ຈະ​ຄົ້ນ​ຄວ້າ ​ປຶກ​ສາ​ຫາ​ລືກ່ຽວ​ກັບ​ ການ​ປະ​ດິດ​ສ້າງ​ໃໝ່ ​ດ້ານ​ການ​ພັດ​ທະ​ນາ ແລະ ການ​ຮ່ວມ​ມື​ ດ້ານ​ສື່ມວນ​ຊົນ ໂດຍ​ປິ່ນ​ອ້ອມ “ປັນ​ຍາ​ປະ​ດິດ ​ສ້າງ​ພະ​ລັງ​ຂັ​ບ​ເຄື່ອນ ​ໃຫ້​ແກ່ ​ສື່ມວນ​ຊົນ ແລະ ​ວັດ​ທະ​ນະ​ທຳ” ແລະ ຫົວ​ຂໍ້​ອື່ນໆ./.

(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ

KPL