*ເພື່ອເຮັດໃຫ້ບັນຍາກາດການທ່ອງທ່ຽວ ໃນໄລຍະລະດູຝົນໃຫ້ຟົດຟື້ນຕິດພັນກັບ ຟັງຄຳຄິດຄຳເຫັນ ແລະ ຂໍ້ສະເໜີຈາກປະຊາຊົນ, ຜູ້ປະກອບການນໍາໄປຄົ້ນຄວ້າ ຫາຊ່ອງທາງແກ້ໄຂໃນຕໍ່ໜ້ານັ້ນ, ເມື່ອມໍ່ໆມານີ້, ທ່ານ ສຸລິນ ເພັດທານີ ຮອງຫົວໜ້າພະແນກ ວັດທະນະທໍາ ແລະ ທ່ອງທ່ຽວ (ວທ) ແຂວງຈໍາປາສັກພ້ອມຄະນະ ໄດ້ເຄື່ອນໄຫວຊຸກຍູ້ສະຖານທີ່ທ່ອງທ່ຽວ, ການທ່ອງທ່ຽວສີຂຽວຢູ່ ເມືອງ ສຸຂຸມາ ແລະ ເມືອງຈຳປາສັກ ທັງນີ້ກໍເພື່ອໃຫ້ມີຄວາມພ້ອມ ໃນດ້ານມາດຕະຖານການບໍລິການ, ມີຄວາມຮັບປະກັນຄວາມປອດໄພ, ຮັບປະກັນຄວາມສະອາດສວຍງາມ, ໃນການລົງເຄື່ອນໄຫວຄັ້ງນີ້ ຄະນະໄດ້ໄປສະຖານທີ່ທ່ອງທ່ຽວ ທາດສາມປາງ ແລະ ວັດພູຈຳປາສັກ.

ສຳລັບການຕິດຕາມບັນຍາກາດ ການທ່ອງທ່ຽວ ຢູ່ສະຖານບູຮານວັດພູຈຳປາສັກ ມໍລະດົກໂລກ ແຫ່ງທີ 2 ຂອງລາວ, ພ້ອມຮັບຟັງລາຍງານສະພາບ ການບໍລິການທ່ອງທ່ຽວ ໃນໄລຍະລະດູຝົນ ຈາກ ທ່ານ ສົມພອນໄຊ ໂພສາລາດຜູ້ອຳນວຍການບໍລິສັດຍິ່ງໂຊກໄຊ ຜູ້ສຳປະທານແຫລ່ງທ່ອງທ່ຽວ ວັດພູຈຳປາສັກ ກ່ຽວກັບສະພາບການບູລະນະ, ປັບປຸງປົກປັກຮັກສາ ແລະ ພັດທະນາການທ່ອງທ່ຽວ ໃນໄລຍະຜ່ານມາ ພ້ອມດ້ວຍທິດທາງແຜນການຕໍ່ໜ້າ ໂດຍສະເພາະ ການກໍ່ສ້າງພື້ນຖານໂຄງລ່າງ, ການຮັກສາຄວາມສະອາດ, ການຮັກສາສິ່ງແວດລ້ອມ, ສິ່ງອຳນວຍຄວາມສະດວກແກ່ ນັກທ່ອງທ່ຽວ ແລະ ອື່ນໆ ເຖິງແມ່ນລະດູຝົນແຕ່ກໍມີນັກທ່ອງທ່ຽວ ເຂົ້າທ່ຽວຊົມວັດພູຢ່າງຫລວງຫລາຍ.
ຂະນະທີ່ຢູ່ເມືອງສຸຂຸມາ ທ່ານຮອງຫົວໜ້າພະແນກວັດທະນະທຳ ແລະ ທ່ອງທ່ຽວ ແຂວງໄດ້ຕິດຕາມສະພາບການທ່ອງທ່ຽວຢູ່ພະທາດສາມປາງ, ບ້ານທາດສາມປາງ ຊຶ່ງມີອຳນາດການປົກຄອງບ້ານ, ເຖົ້າແກ່ແນວໂຮມ, ໜ່ວຍງານທີ່ກ່ຽວຂ້ອງ ຕະຫລອດຮອດປະຊາຊົນ ໄດ້ເປັນເຈົ້າການຊ່ວຍກັນ ໃນການປົກປັກຮັກສາ ແລະ ຜັດປ່ຽນກັນປະຈຳການບໍລິການນັກທ່ອງທ່ຽວ ທີ່ເຂົ້າມາຂາບໄຫວ້ພະທາດສາມປາງ. ນັບແຕ່ໄລຍະລະດູຝົນມີຜູ້ຄົນເຂົ້າ ມາທ່ຽວ-ຂາບໄຫວ້ພະທາດສາມປາງໜ້ອຍກວ່າລະດູແລ້ງ. ເນື່ອງຈາກເສັ້ນທາງເຂົ້າບ້ານເປ່ເພ ການສັນຈອນໄປມາມີຄວາມຫຍຸ້ງຍາກ.

ແນວໃດກໍດີ ທ່ານ ສຸລິນ ເພັດທານີ ຍັງໄດ້ແນະນຳ ໃຫ້ອຳນາດການປົກຄອງ ແລະ ປະຊາຊົນປັບປຸງພື້ນທີ່ທ່ອງທ່ຽວໃຫ້ເໝາະສົມ, ມີຄວາມເປັນລະບຽບຮຽບຮ້ອຍ, ຈັດວາງບ່ອນຖິ້ມຂີ້ເຫຍື້ອມໃຫ້ຫ່າງຈາກພະທາດ ແລະ ບ່ອນສັກກະລະບູຊາ, ປູກດອກໄມ້ດາວເຮືອງ ໃສ່ໜ້າພະທາດ ເພື່ອຄວາມສວຍງາມ ແລະ ເປັນສີລິມຸງຄຸນ ຍົກຍ້າຍ ແລະ ປັບປຸງປ້າຍໂຄສະນາຕ່າງໆ, ປ້າຍຊີ້ບອກສະຖານທີ່ທ່ອງທ່ຽວຄືນໃໝ່. ເຮັດໃຫ້ພະທາດສາມປາງສົມກັບ ທີ່ເປັນສະຖານທີ່ອັນຊົງຄຸນຄ່າ, ຄວາມສັດທາ ແລະ ໜ້າທ່ຽວຊົມຫລາຍຂຶ້ນ.

KPL