ຂປລ. ກະຊວງກະສິກຳ ແລະ ປ່າໄມ້ ໄດ້ສຸມໃສ່ວາງຫລາຍມາດຕະການ ເພື່ອເປັນການຄຸ້ມຄອງ ແລະ ປົກປັກຮັກສາ ຊັບພະຍາກອນປ່າໄມ້ ບໍ່ໃຫ້ຖືກທຳລາຍ ​ແລະ ຟື້ນຟູປ່າໄມ້ທີ່ຊຸດໂຊມ ໃຫ້ມີຄວາມອຸດົມສົມບູນ, ພ້ອມທັງຮັບປະກັນເນື້ອທີ່ປົກຫຸ້ມ 70% ຂອງເນື້ອທີ່ທົ່ວປະເທດ ​ເຊິ່ງ​ປະກອບ​ມີ: ມາດຕະການສະກັດກັ້ນການບຸກລຸກ, ການທໍາລາຍປ່າໄມ້; ການຟື້ນຟູແບບທໍາມະຊາດ ແລະ ປູກເສີມ; ການ ປູກໄມ້ ລວມທັງການປູກໄມ້ອຸດສະຫະກຳ; ສ້າງຄວາມເຂັ້ມແຂງ ແລະ ປັບປຸງການລົງຂີວິດຂອງປະຊາຊົນ; ປັບປຸງ ກົງຈັກການຈັດຕັ້ງ ໃນການຄຸ້ມຄອງປ່າໄມ້ ​ແລະ ການ ຊີ້-ຂາຍ ສິນເຊື່ອກາກບອນປ່າໄມ້.

ທ່ານ ສົມຫວັງ ພິມມະວົງ ຫົວໜ້າກົມປ່າໄມ້ ກະຊວງກະສິກຳ ແລະ ປ່າໄມ້  ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 21 ພຶດສະພາ 2025 ໂດຍທ່ານໄດ້ຍົກໃຫ້ເຫັນເຖິງ ມາດຕະການສະກັດກັ້ນການບຸກລຸກ, ການທໍາລາຍປ່າໄມ້ ເຊິ່ງພາກສ່ວນກ່ຽວຂ້ອງ ໄດ້ສ້າງ ແລະ ປັບປຸງນິຕິກໍາ ເພື່ອໃຫ້ເປັນເຄື່ອງມືໃນການຄຸ້ມຄອງ ເຊັ່ນ: ດຳລັດວ່າດ້ວຍປ່າສະຫງວນ, ປ່າປ້ອງກັນ ແລະ ປ່າຜະລິດ, ບັນດາຄໍາສັ່ງ, ຄໍາແນະນຳຕ່າງໆ; ສ້າງຄູ່ມື ແລະ ລົງເຜີຍແຜ່ຢູ່ຂັ້ນທ້ອງຖິ່ນ ກ່ຽວກັບວິທີການຕ້ານ ແລະ ສະກັດກັ້ນໄຟ   ໄໝ້ລາມປ່າ;  ສືບຕໍ່ດຳເນີນການຈັດສັນພື້ນທີ່ 3 ປະເພດປ່າ ໃນຂອບເຂດທົ່ວປະເທດ, ປັກຫລັກໝາຍຂອບເຂດຊາຍແດນທີ່ດິນປ່າໄມ້, ຕິດປ້າຍຫ້າມຕ່າງໆ; ເພີ່ມທະວີການກວດກາລາດຕະເວນ ໃນຂອບເຂດທີ່ດິນປ່າໄມ້ ສະກັດກັ້ນບໍ່ໃຫ້ບຸກລຸກ, ບຸກເບີກ, ຈັບຈອງ ທີ່ດິນປ່າໄມ້, ຂຸດຄົ້ນໄມ້ ຫລື ກິດຈະກໍາອື່ນໆບໍ່ຖືກຕ້ອງ, ຫາກມີ​ການລະເມີດຕ້ອງໄດ້ດໍາເນີນຄະດີ; ຈັດຕັ້ງປະຕິບັດໂຄງການຊ່ວຍໜູນຕ່າງໆ ແນໃສ່ການປັບປຸງຊີວິດການເປັນຢູ່ຂອງປະຊາຊົນ ແລະ ຫລຸດຜ່ອນການຕັດໄມ້ທໍາລາຍປ່າ.

ສຳລັບ ການຟື້ນຟູແບບທໍາມະຊາດ ແລະ ປູກເສີມ ​ແມ່ນໄດ້ແບ່ງຄວາມຮັບຜິດຊອບໃຫ້ທ້ອງ ຖິ່ນ ແລະ ພາກສ່ວນກ່ຽວຂ້ອງ, ປັດຈຸບັນສາມາດຈັດຕັ້ງປະຕິບັດໄດ້ 132.700 ເຮັກຕາ ເທົ່າກັບ 7% ຂອງແຜນການ. ສາເຫດທີ່ຍັງບໍ່ບັນລຸໄດ້ ຍ້ອນຍັງຂາດງົບປະມານໃນການຈັດຕັ້ງປະຕິບັດ, ການຟື້ນຟູແມ່ນໃຊ້ເວລາ;  ສັງຄົມຍັງບໍ່ທັນເຫັນຄວາມສໍາຄັນ ແກ່ວຽກງານດັ່ງກ່າວເທົ່າທີ່ຄວນ. ສໍາລັບມາດຕະການແກ້ໄຂໃນຕໍ່ໜ້າ:  ຕ້ອງພັດທະນາ ແຜນແມ່ບົດການຟື້ນຟູ ປ່າໄມ້ແຫ່ງຊາດ, ພັດທະນາຖານຂໍ້ມູນ ແລະ ສ້າງແຜນທີ່ຟື້ນຟູປ່າໄມ້ ແລະ ເຄື່ອງປ່າຂອງດົງແຫ່ງຊາດ, ພັດທະນາຫລັກການຟື້ນຟູປ່າໄມ້ ແບບທຳມະຊາດ ແລະ ປູກເສີມ, ປະຕິບັດແຜນແມ່ບົດການຟື້ນຟູປ່າໄມ້, ສຸມໃສ່ຂຶ້ນທະບຽນເຂດປ່າໄມ້ທີ່ໄດ້ຮັບການຟື້ນຟູ, ປະຕິບັດນະໂຍບາຍ ຕໍ່ຜູ້ຟື້ນຟູ ຫລື ຜູ້ລົງທຶນຟື້ນຟູປ່າໄມ້.

ທ່ານ ສົມຫວັງ ພິມມະວົງ ຍັງໃຫ້ຮູ້ອີກວ່າ: ການປູກໄມ້ ລວມທັງໄມ້ອຸດສະຫະກຳ ມາຮອດປັດຈຸບັນ ສາມາດຈັດຕັ້ງປະຕິບັດໄດ້ 32.270 ເຮັກຕາ ເທົ່າກັບ 16% ຂອງແຜນການ. ສາເຫດທີ່ບໍ່ສາມາດບັນລຸໄດ້ ຍ້ອນການຈັດສັນພື້ນທີ່ປູກໄມ້ ອຸດສາຫະກຳບໍ່ໄດ້ຕາມແຜນເນື່ອງຈາກ ມີການຈັບຈອງໄວ້ກ່ອນ, ບັນຫາຂໍ້ຂັດແຍ່ງ ແລະ ການຊົດເຊີຍ ​ເຊິ່ງມາດຕະການແກ້ໄຂໃນຕໍ່ໜ້າ ຈະຕ້ອງພັດທະນາແຜນແມ່ບົດ ການປູກໄມ້ແຫ່ງຊາດ,  ສົ່ງເສີມການປູກໄມ້ ແລະ ເຄື່ອງປ່າຂອງດົງ ເພື່ອເປັນສິນຄ້າໃນພື້ນທີ່ປ່າຊຸດໂຊມ, ສົ່ງເສີມການຂຶ້ນທະບຽນປ່າປູກ ແລະ ຢັ້ງຢືນປ່າປູກ ເພື່ອຢັ້ງຢືນກຳມະສິດ, ແຫລ່ງທີ່ມາຂອງໄມ້.

ສຳລັບ ການສ້າງຄວາມເຂັ້ມແຂງ ແລະ ປັບປຸງການລົງຊີວິດຂອງປະຊາຊົນ ຕ້ອງສົ່ງເສີມ ແລະ ຫັນເປັນອາຊີບຄົງທີ່, ຢຸດເຊົາການເຄື່ອນຍ້າຍແບບຊະຊາຍ, ຢຸດເຊົາການຖາງປ່າເຮັດໄຮ່ແບບເລື່ອນ ລອຍ, ປັບປຸງກົງຈັກການຈັດຕັ້ງ ໃນການຄຸ້ມຄອງປ່າໄມ້  ​ໂດຍທົບທວນ ແລະ ປັບປຸງ ພາລະບົດບາດ, ກຳນົດ ແລະ ບັນຈຸສັບຊ້ອນບຸກຄະລາກອນ, ແຕ່ງຕັ້ງພະນັກງານໄປປະຈຳ ກອງຄຸ້ມຄອງເຂດທີ່ມີຄວາມສ່ຽງ ​ແລະ ອື່ນໆ.

ຂ່າວ-ພາບ: ກິດຕາ

KPL