ຂປລ
ກອງປະຊຸມ ວິສາມັນ ລັດຖະມົນຕີ ເສດຖະກິດ ການຄ້າ ຈີນ-ອາຊຽນ ໄດ້ຈັດຂຶ້ນ ຜ່ານທາງອອນລາຍ, ລັດຖະມົນຕີ ເສດຖະກິດ ການຄ້າ ຂອງສອງຝ່າຍ ໄດ້ຮ່ວມກັນປະກາດວ່າ ໄດ້ສຳເລັດ ການເຈລະຈາ ກ່ຽວກັບ ເຂດການຄ້າເສລີ ຈີນ-ອາຊຽນ ສະບັບ 3.0 ຢ່າງຮອບດ້ານ.
ຂປລ.ແຫລ່ງຂ່າວຈາກ CGTN, ວັນທີ 21 ພຶດສະພານີ້, ກະຊວງ ການຄ້າຈີນ ໄດ້ເປີດເຜີຍ ໃຫ້ຮູ້ວ່າ: ວັນທີ 20 ພຶດສະພານີ້, ກອງປະຊຸມ ວິສາມັນ ລັດຖະມົນຕີ ເສດຖະກິດ ການຄ້າ ຈີນ-ອາຊຽນ ໄດ້ຈັດຂຶ້ນ ຜ່ານທາງອອນລາຍ, ລັດຖະມົນຕີ ເສດຖະກິດ ການຄ້າ ຂອງສອງຝ່າຍ ໄດ້ຮ່ວມກັນປະກາດວ່າ ໄດ້ສຳເລັດ ການເຈລະຈາ ກ່ຽວກັບ ເຂດການຄ້າເສລີ ຈີນ-ອາຊຽນ ສະບັບ 3.0 ຢ່າງຮອບດ້ານ.ການເຈລະຈາ ກ່ຽວກັບ ເຂດການຄ້າ ເສລີ ຈີນ-ອາຊຽນ ສະບັບ 3.0 ໄດ້ເລີ່ມດຳເນີນ ໃນເດືອນພະຈິກປີ 2022, ຜ່ານເວລາ ເກືອບ 2 ປີ ແລະ ການເຈລະຈາ ຢ່າງເປັນທາງການ 9 ຮອບ, ໄດ້ສຳເລັດຕົວຈິງ ໃນເດືອນຕຸລາປີ 2024. ພາຍໃຕ້ ການປະສານງານ ຢ່າງສຸດ ຄວາມສາມາດ ແລະ ການຊຸກຍູ້ຮ່ວມກັນ ຂອງລັດຖະມົນຕີ ເສດຖະກິດ ການຄ້າ ຂອງບັນດາປະເທດ, ສອງຝ່າຍ ໄດ້ສຳເລັດ ການເຈລະຈາ ຢ່າງຮອບດ້ານ ເຊິ່ງຖືເປັນບາດກ້າວ ທີ່ເປັນຂໍ້ກະແຈ ກ້າວໄປສູ່ ເປົ້າໝາຍ ການລົງນາມ ໃນອະນຸສັນຍາ ສະບັບ ປັບປຸງ. ໃນບາດກ້າວຕໍ່ໄປ, ສອງຝ່າຍ ຈະຕັ້ງໜ້າ ຊຸກຍູ້ ໃຫ້ຜ່ານຂັ້ນຕອນ ການອະນຸມັດຕ່າງໆ ພາຍໃນ ປະເທດ ຂອງຕົນ ເພື່ອຊຸກຍູ້ ການລົງນາມ ອະນຸສັນຍາ ສະບັບ ປັບປຸງ ເຂດການຄ້າເສລີຈີນ-ອາຊຽນ ໃຫ້ເປັນ ສະບັບ 3.0 ຢ່າງເປັນທາງການ ກ່ອນທ້າຍປີ 2025./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
