ຂປລ. ​​ແຫ​ລ່ງຂ່າວ​ຈາກ ​ແຂວງ​ສາລະ​ວັນ ​ໃຫ້​ຮູ້​ວ່າ: ການສະເຫລີມສະຫລອງບຸນປີໃໝ່ລາວ ພສ 2568, ໃນວັນທີ 15 ເມສາ 2025 ຢູ່ແຫລ່ງທ່ອງທ່ຽວຕາດເລາະ-ຕາດຮັງ ແຂວງສາລະວັນ ມີບັນຍາກາດຄືກຄື້ນດີ, ຊຶ່ງເປັນມື້ທີສອງຂອງການ ສະເຫລີມສະຫລອງບຸນປີໃໝ່ລາວ. ໃນປີນີ້, ເນັ້ນໃສ່ການທ່ຽວ ໃຫ້ມີຄວາມສະຫງົບ, ປອດໄພ ແລະ ຄວາມເປັນລະບຽບຮຽບຮ້ອຍ, ສະອາດຈົບງາມ, ນັກທ່ອງທ່ຽວທັງພາຍໃນແຂວງ, ຕ່າງແຂວງ ແລະ ຕ່າງປະເທດ ໄດ້ຫລັງໄຫລມາທ່ຽວເປັນຈຳນວນຫລວງຫລາຍ. ປີນີ້ ຜູ້ປະກອບການ ກໍຄື ພາກສ່ວນຮັບຜິດຊອບ ໄດ້ເອົາໃຈໃສ່ຈັດສັນ ໃຫ້ເປັນລະບຽບ ເປັນຕົ້ນ ຮ້ານຂາຍເຄື່ອງປະເພດຕ່າງໆ, ການບໍລິການອາຫານ-ເຄື່ອງດື່ມ ໄດ້ເນັ້ນໃສ່ການຮັກສາຄວາມສະອາດ, ຄວາມປອດໄພຂອງນັກທ່ອງທ່ຽວ ແລະ ເປັນມິດຕໍ່ສິ່ງແວດລ້ອມ ກໍຄື ຄວາມສວຍງາມຂອງແຫລ່ງທ່ອງທ່ຽວ.

ທ່ານ ປໍ ຄ້າຍຄ່ຽມມະນີ ຫົວໜ້າກຸ່ມເຮືອນພັກໂຮມສະເຕ ບ້ານແສນວັງໃຫຍ່ ​ໄດ້ໃຫ້ສຳພາດວ່າ: ໃນປີນີ້, ບັນຍາກາດມວນຊົນ ມາທ່ຽວໃນໄລຍະບຸນປີໃໝ່ລາວ ພສ 2568 ແມ່ນມີຈໍານວນຫລວງຫລາຍ ທັງພາຍໃນແຂວງ, ຕ່າງແຂວງ ພ້ອມທັງໄດ້ມີການຈັດສັນສະຖານທີ່ຕ່າງໆ ຮອງຮັບນັກທ່ອງທ່ຽວ ເພື່ອໃຫ້ມີຄວາມເປັນລະບຽບຮຽບຮ້ອຍ ແລະ ເນັ້ນໃສ່ດ້ານຄວາມສະອາດ, ເປັນມິດຕໍ່ສິ່ງແວດລ້ອມ ແລະ ຄວາມປອດໄພຂອງນັກທ່ອງທ່ຽວ ເປັນຕົ້ນການຈັດສັນຮ້ານຄ້າ, ຂາຍເຄື່ອງປະເພດຕ່າງໆ, ຈັດສັນຕູບນັ່ງໃຫ້ເປັນລະບຽບ ເພື່ອໃຫ້ເຫັນທິວທັດ ຂອງນ້ຳຕົກຕາດ ແລະ ມີບ່ອນຫລິ້ນນ້ຳຫລາຍຈຸດ ທີ່ມີຄວາມປອດໄພ, ທັງຫລີກເວັ້ນການຖິ້ມສິ່ງເສດເຫລືອລົງແຫລ່ງນໍ້າ ພ້ອມທັງໄດ້ແຕ່ງຕັ້ງຄະນະຮັບຜິດຊອບຮັກສາຄວາມສະອາດໃນແຕ່ລະວັນ. ນອກຈາກນີ້, ກໍໄດ້ສົມທົບກັບພາກສ່ວນ ເຈົ້າໜ້າທີ່ໆກ່ຽວຂ້ອງຂັ້ນເມືອງ, ແຂວງ ແລະ ປກຊ-ປກສ ບ້ານ ຕິດຕາມຈັດ​ສັນການສັນຈອນໄປ-ມາຂອງພາຫະນະ ບໍ່ໃຫ້ແອອັດ ຫລີກລ່ຽງການເກີດອຸບັດເຫດ ແລະ ການຫລິ້ນນ້ຳໃນແຕ່ລະຈຸດ ໃຫ້ມີຄວາມມ່ວນຊື່ນ ແລະ ຮັບປະກັນດ້ານຄວາມປອດໄພ.

ແຫລ່ງທ່ອງທ່ຽວຕາດເລາະ-ຕາດຮັງ ແຂວງສາລະວັນ ເປັນສະຖານທີ່ທ່ອງທ່ຽວອີກແຫ່ງໜຶ່ງທີ່ຄວນໄປສຳຜັດ, ເປັນແຫລ່ງທ່ອງທ່ຽວ ທາງດ້ານທໍາມະຊາດ ທີ່ສວຍງາມ ແລະ ມີຊື່ສຽງອັນດັບ 1 ຂອງແຂວງສາລະວັນ, ເປັນທີ່ນິຍົມຊົມຊອບ ທີ່ຫລາຍຄົນຄວນສຳຜັດ, ມາທ່ຽວມາຊົມ ໃນທຸກໆປີ. ສໍາລັບປີນີ້ກໍເຊັ່ນດຽວກັນມີແຂກ, ມວນຊົນທັງພາຍໃນ ແລະ ຕ່າງປະເທດເຂົ້າມາທ່ຽວຊົມ, ຫລິ້ນນໍ້າຈໍານວນຫລວງຫລາຍເຮັດໃຫ້ ມີບັນຍາກາດມີຄວາມມວນຊື່ນ ຮັກສາໄດ້ຄວາມເປັນລະບຽບຮຽບຮ້ອຍ, ຄວາມສະຫງົບປອດໄພສົມກັບຄໍາຂວັນທີ່ວ່າ “ທ່ອງທ່ຽວລາວປອດໄພ, ຊື່ນໃຈໃນວັດທະນະທຳ, ທຳມະຊາດ ແລະ ປະຫວັດສາດ”.

ຂ່າວ-ພາບ: ວິໄລວອນ ສິດທິໄຊ

KPL