ຂປລ
ຂປລ. ພິທີເປີດນຳໃຊ້ທາງຮ່ອມ, ທາງຊອຍ (ທາງເບຕົງເສີມເຫລັກ) ຈຳນວນ 6 ຮ່ອມ ຢູ່ບ້ານຊ້າງຄູ້ ເມືອງໄຊທານີ ນະຄອນຫລວງວຽງຈັນ ຈັດຂຶ້ນໃນວັນທີ 15 ມີນາ 2025 ຜ່ານມາ ໂດຍມີ ພະອາຈານ ພົມສະຫວັນ ໄຊຍະລາດ ເຈົ້າອະທິການວັດຊ້າງຄູ້, ພ້ອມດ້ວຍປະຊາຊົນ ພາຍໃນບ້ານ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ຂປລ. ພິທີເປີດນຳໃຊ້ທາງຮ່ອມ, ທາງຊອຍ (ທາງເບຕົງເສີມເຫລັກ) ຈຳນວນ 6 ຮ່ອມ ຢູ່ບ້ານຊ້າງຄູ້ ເມືອງໄຊທານີ ນະຄອນຫລວງວຽງຈັນ ຈັດຂຶ້ນໃນວັນທີ 15 ມີນາ 2025 ຜ່ານມາ ໂດຍມີ ພະອາຈານ ພົມສະຫວັນ ໄຊຍະລາດ ເຈົ້າອະທິການວັດຊ້າງຄູ້, ພ້ອມດ້ວຍປະຊາຊົນ ພາຍໃນບ້ານ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ. ທາງຮ່ອມ, ທາງຊອຍ 6 ຮ່ອມ ດັ່ງກ່າວ, ມີຄວາມຍາວທັງໝົດ 855 ແມັດ, ກວ້າງ ສະເລ່ຍ 5,50 ແມັດ, ລວມມູນຄ່າ ການກໍ່ສ້າງ ທັງໝົດ 825 ລ້ານກີບ. ໃນນັ້ນ, ເປັນທຶນຂອງວັດຊ້າງຄູ້ ສົມທົບ 53 ລ້ານກີບ, ທຶນຂອງພໍ່ແມ່ປະຊາຊົນຮ່ອມຕ່າງໆ 772 ລ້ານກີບ. ການກໍ່ສ້າງທາງດັ່ງກ່າວ, ເບື້ອງຕົ້ນໂດຍການລິເລິ່ມຂອງ ພະອາຈານ ພົມສະຫວັນ ໄຊຍະລາດ ເຈົ້າອະທິການວັດຊ້າງຄູ້ ໄດ້ທົດລອງສ້າງ ທາງຮ່ອມ 4/10 ບ້ານຊ້າງຄູ້, ຍາວ 60 ແມັດ, ກວ້າງ 6 ແມັດ ເຊິ່ງເຫັນວ່າໄດ້ຮັບໝາກຜົນ. ຈາກນັ້ນ, ພະອາຈານ ຈຶ່ງມອບວຽກງານນີ້ໃຫ້ອົງການປົກຄອງບ້ານ ໂດຍສະສົມທົບທຶນ ຈໍານວນໜຶ່ງ ແລະ ແຮງງານພະສົງສາມະເນນ, ໄມ້ຕີແບບ ແລະ ອຸປະກອນການກໍ່ທາງ ເພື່ອກໍ່ສ້າງທາງແຕ່ລະຮ່ອມ ເຊິ່ງ ປະກອບມີ: ຮ່ອມ 4/10 ຍາວ 60 ແມັດ, ກວ້າງ 6 ແມັດ, ມູນຄ່າ 80 ລ້ານກີບ; ຮ່ອມ 4/9 ຍາວ 175 ແມັດ, ກວ້າງ 4 ແມັດ, ມູນຄ່າ 175 ລ້ານກີບ; ຮ່ອມ 2/3 ຍາວ 80 ແມັດ, ກວ້າງ 4 ແມັດ, ເປັນມູນຄ່າ 80 ລ້ານ ກີບ; ຮ່ອມ 4/8 ຍາວ 150 ແມັດ, ກວ້າງ 5,50 ແມັດ, ມູນຄ່າ 175 ລ້ານກີບ; ຮ່ອມ 4/7 ຍາວ 80 ແມັດ, ກວ້າງ 5 ແມັດ ມູນຄ່າ 95 ລ້ານກີບ ແລະ ຮ່ອມ 4/6 ຍາວ 310 ແມັດ, ກວ້າງ 5 ແມັດ ເປັນມູນຄ່າ 220 ລ້ານກີບ.
ບ້ານຊ້າງຄູ້ ເປັນບ້ານໜຶ່ງທີ່ນອນຢູ່ໃນກຸ່ມສີວິໄລ ຕັ້ງຢູ່ໃນເຂດເທສະບານເມືອງໄຊທານີ ນະ ຄອນຫລວງວຽງຈັນ ມີເສັ້ນທາງຕີຈອດກັບບັນດາບ້ານອ້ອມຂ້າງ ແລະ ອອກສູ່ຕົວເມືອງນະຄອນ ຫລວງວຽງຈັນ ສາມາດທຽວໄດ້ທັງ ລະດູແລ້ງ ແລະ ລະດູຝົນ. ປັດຈຸບັນ ກຳລັງສ້າງຮ່ອມແຍກ 4/4 ສຳເລັດໄປແລ້ວ 95% ແລະ ທາງຮ່ອມ 9/8 ໃກ້ຈະສຳເລັດ ແລະ ເປີດນໍາໃຊ້ໃນໄວໆນີ້ ເຊິ່ງທັງໝົດນີ້, ເປັນແນວຄິດລິເລີ່ມຂອງວັດຊ້າງຄູ້, ອົງການປົກຄອງບ້ານ ແລະ ພໍ່ແມ່ປະຊາຊົນ ບັນດາເຜົ່າ ທີ່ນໍາໃຊ້ເສັ້ນທາງຮ່ອມດັ່ງກ່າວ, ມີຄວາມກະຕືລືລົ້ນ, ມີຄວາມສາມັກຄີອັນເປັນປຶກແຜ່ນ, ເອກະພາບນໍາແຜນ ການພັດທະນາທາງຮ່ອມຕ່າງໆຂອງບ້ານ ຕາມທິດນຳສາມສ້າງທີ່ວ່າ: ປະຊາຊົນມີສ່ວນຮ່ວມພັດທະນາພູມເລົ່າເນົາຂອງເຮົາເອງ ຈຶ່ງເກີດມີຜົນສຳເລັດ ແລະ ບັນລຸຕາມເປົ້າໝາຍ ແລະ ແຜນການພັດທະນາພື້ນຖານໂຄງລ່າງຂອງບ້ານ.
ຂໍ້ມູນ-ພາບ: ວັດຊ້າງຄູ້
ຂ່າວ: ທະນູທອງ
KPL
