ຂປລ. ປັດຈຸບັນ ນັກທ່ອງທ່ຽວທັງພາຍໃນ ແລະ ຕ່າງປະເທດ ກໍາລັງນິຍົມຊົມຊອບ ແລະ ໃຫ້ຄວາມສົນໃຈ ສະຖານທີ່ ທ່ອງທ່ຽວທາງທຳມະຊາດ, ຕິດພັນກັບວິຖີການດຳລົງຊີວິດຂອງປະຊາຊົນ, ລວມເຖິງສະຖານທີ່ພັກຜ່ອນ ຕິດແຄມນໍ້າ, ອ້ອມຮອບດ້ວຍສາຍພູ ແລະ ປ່າໄມ້ ໄດ້ກາຍເປັນຈຸດໝາຍຂອງບັນດານັກທ່ອງທ່ຽວ ເຊັ່ນດຽວກັນກັບ ແຟມມີລີແລນ ລີສອດ (Family Land Resort ) ເປັນສະຖານທີ່ພັກຜ່ອນແຫ່ງໜຶ່ງຢູ່ ເມືອງວັງວຽງ ແຂວງວຽງຈັນ ກຳລັງໄດ້ຮັບຄວາມນິຍົມ ຈາກນັກທ່ອງທ່ຽວ ທັງພາຍໃນ ແລະ ຕ່າງປະເທດ ຍ້ອນເປັນສະຖານທີ່ ທີ່ມີເອກະລັກສະເພາະ, ສວຍງາມ, ຕິດກັບສາຍນໍ້າຊອງ ແລະ ອ້ອມຮອບດ້ວຍພູຜາ, ປ່າໄມ້ ແລະ ປະດັບປະດາດ້ວຍຕົ້ນໄມ້, ດອກໄມ້ ທີ່ສວຍງາມ.

ທ່ານ ຄໍາຮຸ່ງ ຄໍາພາ ຜູ້ຈັດການ ແຟມມີລີແລນ ລີສອດ ໄດ້ໃຫ້ສຳພາດໃນວັນທີ 22 ກຸມພາ 2025 ຜ່າ​ນມາວ່າ:  ແຟມມີລີແລນ ລີສອດ ຕັ້ງຢູ່ບ້ານວຽງສະໄໝ ເມືອງວັງວຽງ ແຂວງວຽງຈັນ ຫ່າງຈາກຕົວເມືອງວັງວຽງ ປະມານ 8 ກິໂລແມັດ, ເລີ່ມເປີດໃຫ້ບໍລິການມາແຕ່ປີ 2023, ປັດຈຸບັນ ໄດ້ຮັບຄວາມນິຍົມ ຈາກນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວ, ພັກຜ່ອນເປັນຈຳນວນຫລາຍ ເນື່ອງຈາກວ່າ ລີສອດແຫ່ງນີ້, ໄດ້ມີການຕົບແຕ່ງໃຫ້ເປັນເອກະລັກສະເພາະ, ແຕກຕ່າງຈາກສະຖານທີ່ອື່ນໆ ເປັນຕົ້ນ ໄດ້ຕົບແຕ່ງ ຫ້ອງພັກ ທີ່ມີລັກສະນະໂດດເດັ່ນ ເປັນຮູບວົງມົນ ຫລື ເອີ້ນວ່າໂດມ. ໃນນັ້ນ, ປະກອບມີສິ່ງອຳນວຍ ຄວາມສະດວກຕ່າງໆ ເຊັ່ນ: ຕຽງນອນ, ເຄື່ອງປັບອາກາດ, ໂຕະ ແລະ ຕູ້ເສື້ອຜ້າຂະໜາດນ້ອຍສຳລັບໄວ້ເຄື່ອງ, ມີຫ້ອງນໍ້າສຳລັບໃຊ້ສ່ວນຕົວ ທີ່ສາມາດແນ້ມເຫັນສາຍພູ ແລະ ທຳມະຊາດ. ລີສອດແຫ່ງນີ້, ເໝາະສຳລັບຄົນທີ່ຢາກມາພັກຜ່ອນ, ໜີຈາກຄວາມວຸ້ນວາຍໃນຕົວເມືອງ ເນື່ອງຈາກເປັນສະຖານທີ່ ທີ່ມີຄວາມງຽບສະຫງົບ, ປອດໄພ, ອາກາດປອດໂປ່ງ, ອ້ອມຮອບດ້ວຍພູຜາປ່າໄມ້ທີ່ຂຽວສົດງົດງາມ ແລະ ມີສາຍນໍ້າຊອງໄຫລຜ່ານ, ໃນຄໍ່າຄືນແຫ່ງຄວາມສະຫງົບ ກໍຈະໄດ້ຍິນສຽງນໍ້າໄຫລ ປະສານກັບສຽງນົກຮ້ອງ ສາມາດເພີ່ມພະລັງງານບວກ, ປົດປ່ອຍຄວາມຕຶງຄຽດ ແລະ ເມື່ອຍລ້າ ຈາກການເຮັດວຽກ.

ທ່ານ ຄໍາຮຸ່ງ ຄໍາພາ ໃຫ້ຮູ້ອີກວ່າ: ສຳລັບ ວັດຖຸດິບ ທີ່ນຳເຂົ້າມາປຸງແຕ່ງອາຫານ ແມ່ນນຳໃຊ້ຜະລິດຕະພັນ ຢູ່ພາຍໃນເມືອງເປັນຫລັກ ໂດຍເນັ້ນໃສ່ວັດຖຸດິບທີ່ສົດ, ໃໝ່, ສະອາດ ແລະ ມີຄຸນນະ ພາບ ແນໃສ່ສ້າງຄວາມປະທັບໃຈ ເຮັດໃຫ້ນັກທ່ອງທ່ຽວ ໄດ້ກິນອາຫານທີ່ມີຄຸນນະພາບ, ສະອາດ ແລະ ປອດໄພ. ພ້ອມນີ້, ທາງລີສອດ ຍັງເນັ້ນຮັບພະນັກງານຢູ່ພາຍໃນທ້ອງຖິ່ນ ເພື່ອຊຸກຍູ້ສົ່ງເສີມໃຫ້ເຂົາເຈົ້າ ມີວຽກເຮັດງານທຳ ແລະ ສາມາດສ້າງລາຍຮັບໃຫ້ກຸ້ມຢູ່ກຸ້ມກິນ.

ຂ່າວ-ພາບ: ກິດຕາ

KPL