ຂປລ. ຕະຫລອດ​ໄລຍະ 70 ປີ ແມ່ນ​ໄລຍະທາງທີ່ເຕີບໃຫຍ່ ຂະຫຍາຍຕົວຢ່າງມີໄຊຂອງພັກ, ຈາກຈຸດເລີ່ມທີ່ລະອິດລະອ້ຽວ ແລະ ເຕັມໄປດ້ວຍມະນະຈິດອົນທົນ ຂອງນັກປະຕິວັດ, ເຕັມໄປດ້ວຍຢາດເຫື່ອ ແລະ ນ້ຳຕາແຫ່ງຄວາມສູນເສຍອັນຍິ່ງໃຫຍ່ຂອງພັກນັ້ນ, ພັກໄດ້ປະຕິບັດໜ້າທີ່ກຳອຳນາດ ນຳພາທົ່ວລະບົບການເມືອງ, ນຳພາສ້າງລັດຂອງປະຊາຊົນ ໂດຍປະຊາຊົນ ເພື່ອປະຊາຊົນ ຍາດໄດ້ຜົນສໍາເລັດຢ່າງສະຫງ່າງາມເປັນກ້າວໆ.

ທ່ານ ຄໍາມອນ ຈັນທະຈິດ ຮອງປະທານສະພາທິດສະດີສູນກາງພັກ, ຮອງຫົວໜ້າຄະນະໂຄສະນາ ອົບຮົມສູນກາງພັກ ໄດ້ຍົກໃຫ້ເຫັນແນວທາງຂອງພັກ ໃນການສ້າງລັດ ຂອງປະຊາຊົນ ໂດຍປະຊາຊົນ ເພື່ອປະຊາຊົນ ບົນພື້ນຖານຮັບຮູ້ທາງດ້ານທິດສະດີທີ່ວ່າ: ລັດຂອງປະຊາຊົນ ໝາຍເຖິງອຳນາດທັງໝົດຂອງລັດ ແລະ ສັງຄົມ ລ້ວນແຕ່ຂຶ້ນກັບປະຊາຊົນ, ປະຊາຊົນຊາວຜູ້ອອກແຮງງານເປັນເຈົ້າອຳນາດລັດ, ໃນໄລຍະປ່ຽນແປງໃໝ່ ພັກ ໄດ້ກຳນົດໜ້າທີ່ການນຳພາສ້າງລັດ: “ເປັນລັດຂອງປະຊາຊົນ, ມາຈາກປະຊາຊົນ ແລະ ເພື່ອປະຊາຊົນ ຢ່າງແທ້ຈິງ. ພັກ ​ໄດ້ເນັ້ນວ່າ: ໃນທຸກວຽກງານຈະຕ້ອງປະຕິບັດຕາມທິດນຳທີ່ວ່າ “ລັດ ແລະ ປະຊາຊົນ ພ້ອມກັນເຮັດ, ສູນກາງ ແລະ ທ້ອງຖິ່ນພ້ອມກັນເຮັດ”, ລັດຂອງປະຊາຊົນ ຕ້ອງໄດ້ເສີມຂະຫຍາຍສິດເປັນເຈົ້າຂອງປະຊາຊົນ, ຊາວຜູ້ອອກແຮງງານ. ອັນນີ້ ເປັນບັນຫາໃຫຍ່ ແລະ ເປັນພື້ນຖານທີ່ສຸດໃນແນວທາງລວມຂອງພັກ; ພັກ ໄດ້ເນັ້ນວ່າ: “ສິດເປັນເຈົ້າຕ້ອງໄປຄຽງຄູ່ກັບພັນທະ, ພັນທະຕໍ່ລວມໝູ່, ຕໍ່ສັງຄົມ ແລະ ປະເທດຊາດ”, ພັກເຮົາໄດ້ກ່າວເຕືອນປະຊາຊົນ ໃຫ້ຍົກສູງສະຕິເປັນເຈົ້າການຂອງຕົນໃຫ້ຄວບຄູ່ຕາມທິດທີ່ວ່າ: “ເຮັດດີໄດ້ກິນຫລາຍ, ເຮັດບໍ່ດີປານໃດໄດ້ກິນໜ້ອຍ, ເຮັດຜິດ ຖືກວິໄນ, ເຮັດເປ່ເພ ຕ້ອງໃຊ້ແທນ”.

ການສ້າງລັດ ໂດຍປະຊາຊົນ ແມ່ນລັດທີ່ປະຊາຊົນເລືອກ, ເລືອກເອົາຕົວແທນຂອງຕົນ, ລັດດັ່ງກ່າວ ​ແມ່ນປະຊາຊົນ ໃຫ້ການສະໜັບສະໜູນ, ຊ່ວຍເຫລືອ, ປະກອບພາສີອາກອນ ເພື່ອໃຫ້ລັດໃຊ້ຈ່າຍ, ເຄື່ອນໄຫວ, ລັດດັ່ງກ່າວ ​ແມ່ນປະຊາຊົນຕຳນິ, ກໍ່ສ້າງ, ຊ່ວຍເຫລືອ. ໃນເວລາກ່າວເຖິງອຳນາດ ການປົກຄອງນັ້ນ, ພັກ ໄດ້ຢັ້ງຢືນໃຫ້ເຫັນເຖິງ ການສ້າງລັດໂດຍປະຊາຊົນວ່າ: “ອໍານາດການປົກຄອງປະຊາຊົນ ຕ້ອງແມ່ນປະຊາຊົນເປັນຜູ້ເລືອກຕັ້ງຂຶ້ນ, ຕ້ອງຈົງຮັກພັກດີຕໍ່ປະຊາຊົນ ແລະ ຮັບໃຊ້ປະຊາ ຊົນຢ່າງສຸດອົກສຸດໃຈ, ກ່ອນອື່ນໝົດ ແມ່ນຮັບໃຊ້ປະຊາຊົນຜູ້ອອກແຮງງານ ແລະ ຕ້ອງຮັບຜິດຊອບຕໍ່ປະຊາຊົນບັນດາເຜົ່າ; ເຮັດວຽກຕາມຫລັກ ການ ລວມສູນປະຊາທິປະໄຕ, ແບ່ງກັນຮັບຜິດຊອບ, ສ້າງກົດໝາຍ ໂດຍແນໃສ່ປົກປັກຮັກສາອະທິປະໄຕ ຂອງຊາດ, ສິດ, ຜົນປະໂຫຍດ ແລະ ພັນທະຂອງປະຊາຊົນຜູ້ອອກແຮງງານທຸກເຜົ່າ”. ພັກ ຢັ້ງຢືນວ່າ: “ການພົວພັນ ລະຫວ່າງພັກກັບມະຫາຊົນ ແມ່ນການພົວພັນແບບກາຍອິນຊີ ແລະ ເປັນຕາຍ”.

​ໃນມະຕິກອງປະຊຸມໃຫຍ່ ຄັ້ງທີ XI ຂອງພັກ ໄດ້ຢັ້ງຢືນຢ່າງໜັກແໜ້ນວ່າ: “ພັກທີ່ບໍ່ມີຄວາມສະດຸ້ງໄວ, ບໍ່ຍອມປັບປຸງຕົນເອງໃນທີ່ສຸດ ຈະກາຍເປັນພັກຫລ້າຫລັງ, ສູນເສຍຄວາມເຫລືອມໃສສັດທາ ແລະ ການສະໜັບສະໜູນຈາກມະຫາຊົນ.

ຂ່າວ: ກິດຕາ

ພາບ: ອ່າຍຄຳ

KPL