ທ່ານ ວົງເພັດ ຈິດປັນຍາ ຮອງເລຂາພັກແຂວງຄໍາມ່ວນ​ໃຫ້​ຮູ້​ວ່າ: ​ແຫ​ລ່ງທ່ອງ​ທ່ຽວ ບຶງໜອງເທົາ ແລະ ຖໍ້າປາເຊືອມ ເປັນແຫລ່ງທ່ອງທ່ຽວອຸດົມສົມບູນໄປດ້ວຍທຳມະຊາດທີ່ສວຍສົດງົດງາມ ມີທັງສັດປ່າ ແລະ ສັດນໍ້າຫລາກຫລາຍຊະນິດ ເຊິ່ງຕັ້ງຢູ່ບ້ານນາຂ້າງຊ້າງ ເມືອງທ່າແຂກ ແຂວງຄຳມ່ວນ ໂດຍແມ່ນບໍລິສັດ ເພັດມະນີ ເຄພີຊີ ຈຳກັດຜູ້ດຽວ ເປັນຜູ້ພັດທະນາໃຫ້ກາຍເປັນແຫລ່ງທ່ອງທ່ຽວ ແບບອະນຸລັກທຳມະຊາດ  ລວມມີເນື້ອທີ່ເຂດພັດທະນາ 9,89 ເຮັກຕາ ແລະ ເນື້ອທີ່ເຂດອະນຸລັກຈໍານວນ 404 ເຮັກຕາ.

ໃນນັ້ນ, ປະກອບມີ ການປຸກສ້າງສະຖານທີ່ຮອງຮັບ ແລະ ສູນບໍລິການ, ສູນຂໍ້ມູນດ້ານການທ່ອງທ່ຽວ, ຕິດຕັ້ງອຸປະກອນ, ສິ່ງອໍານວຍຄວາມສະດວກໃນການທ່ອງທ່ຽວ, ກິດຈະກຳຂີ່ເຮືອ, ຍ່າງປ່າ, ຍ່າງຂົວທ່ຽວຊົມຖໍ້າ ແລະ ກິດຈະການອື່ນໆ ດ້ວຍມູນຄ່າການລົງທຶນທັງໝົດ 3 ລ້ານໂດລາສະຫະລັດ ໂດຍແມ່ນການລົງທຶນພາຍໃນ 100​ເປີ ແລະ ມີໄລຍະການສໍາປະທານ 50 ປີ ເຊິ່ງໃນປັດຈຸບັນແມ່ນກໍາລັງເລັ່ງປັບປຸງສະຖານທີ່ຈອດລົດ, ກໍ່ສ້າງຫ້ອງນໍ້າ, ກໍ່ສ້າງເສັ້ນທາງຍົກສູງຂຶ້ນຈາກລະດັບນໍ້າ, ຮ້ານອາຫານ, ຈຸດບໍລິການ ແລະ ຂົວຍ່າງທ່ຽວຊົມພາຍໃນຖໍ້າ ແລະ ຄາດວ່າຈະເປີດບໍລິການໃຫ້ນັກທ່ອງທ່ຽວໄດ້ເຂົ້າທ່ຽວຊົມພາຍໃນຕົ້ນປີ 2025 ທີ່ຈະມາເຖິງນີ້.ພາຍຫລັງໂຄງການດັ່ງກ່າວສຳເລັດ ຈະກາຍເປັນທ່າແຮງ ດ້ານການທ່ອງທ່ຽວໃຫ້ແກ່ແຂວງ ທີ່ສາມາດສົ່ງເສີມ ແລະ ດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ເຂົ້າມາທ່ຽວຊົມເປັນຈຳນວນຫລາຍ, ທັງສ້າງວຽກເຮັດງານທໍາ ໃຫ້ປະຊາຊົນທີ່ອາໄສຢູ່ອ້ອມຂ້າງໂຄງການໄດ້ມີອາຊີບທີ່ແນ່ນອນ, ສ້າງຊີວິດການເປັນຢູ່ໃຫ້ດີຂຶ້ນເທື່ອລະກ້າວ ແລະ ສ້າງລາຍຮັບປະກອບສ່ວນເຂົ້າໃນພັດທະນາເສດຖະກິດ-ສັງຄົມຂອງແຂວງຄໍາມ່ວນ. ສະ​ນັ້ນ, ຈຶ່ງ​ຢາກ​ເຊີນ​ຊວນ​ປະຊາຊົນ​ລາວ ທີ່​ໄດ້​ກາຍ​ໄປ,ກາຍ​ມາ ​ແຂວງ ຄໍາ​ມ່ວນ​ແວ່​ສໍາຜັດບັນ​ຍາດ​ກາດ​ທີ່​ສວຍ​ງາມ ​ເພື່ອ​ຜັກ​ຜ່ອນ​ຢ່ອນ​ໃຈ ຈາກ​ຄວາມ​ອິດ​ເມື່ອຍ ຈາກ​ວຽກງານ ກໍ​​ໃຫ້​ທໍາ​ມະ​ຊາດ​ບໍາບັດ​ຈິດ​ໃຈ.

KPL