ຂປລ. ໂຮງຮຽນວັດທະນະທຳຊົນເຜົ່າກອງທັບ (ຮວຜທ) ຈັດກອງປະຊຸມສະຫລຸບຖອດຖອນ ບົດຮຽນຜົນສຳເລັດ ກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ I ອົງຄະນະພັກໂຮງຮຽນວັດທະນະ ທຳຊົນເຜົ່າກອງທັບ ​ໃນ​ວັນ​ທີ 5 ກຸມພາ 2025 ໂດຍການເປັນປະທານຂອງ ສະຫາຍ ພັນເອກ ສະແຫວງ ແດນນາມົນ ເລຂາຄະນະພັກ, ຫົວໜ້າການເມືອງ ໂຮງຮຽນວັດທະນະທຳຊົນເຜົ່າກອງທັບ, ມີສະຫາຍ ພັນເອກ ເພັດສະໝອນ ວິລະວອນ ຮອງເລຂາຄະນະພັກ, ຫົວໜ້າການທະຫານ ໂຮງຮຽນ, ມີຄະນະພັກ, ຄະນະໜ່ວຍພັກ ​ແລະ ສະມາຊິກພັກທົ່ວໂຮງຮຽນ ເຂົ້າຮ່ວມ.

ສະຫາຍ ພັນໂທ ອຸໄລກອນ ກົມມະເມືອງ ກຳມະການຄະນະພັກ, ຮອງຫົວໜ້າຫ້ອງການເມືອງ ໂຮງຮຽນວັດທະນະທຳຊົນເຜົ່າກອງທັບ ໄດ້ສະຫລຸບລາຍງານຜົນສໍາເລັດ ການດໍາເນີນກອງປະຊຸມ ໂດຍໄດ້ຍົກໃຫ້ເຫັນເຖິງການກະກຽມ ແລະ ການເຄື່ອນໄຫວປະຕິບັດໜ້າທີ່ວຽກງານ ຂອງອະນຸກໍາມະການຕ່າງໆ ໃນໄລຍະຜ່ານມາ. ໃນນັ້ນ, ຄະນະບໍລິຫານງານພັກໂຮງຮຽນ ໄດ້ເອົາໃຈໃສ່ຄົ້ນຄວ້າເຊື່ອມຊຶມເປັນເອກະພາບ, ຈັດຕັ້ງຜັນຂະຫຍາຍອອກເປັນແຜນການ ຂອງຄະນະບໍລິຫານງານພັກ ໂດຍສອດຄ່ອງກັບສະພາບຈຸດພິເສດ ຕາມ 4 ໜ້າທີ່ໃຫຍ່ 26 ແຜນງານ ຂອງຄະນະພັກກະຊວງປ້ອງກັນປະເທດ, ອອກມະຕິຕົກລົງ ແຕ່ງຕັ້ງຄະນະຊີ້ນຳ, ບັນດາອະນຸກຳມະການ, ການແບ່ງຜູ້ແທນສົມບູນສຳຮອງ, ແຜນດຳເນີນງານ, ວຽກງານຮັບປະກັນດ້ານງົບປະມານ. ຫລັງຈາກນັ້ນ, ບັນດາອະນຸກຳມະການຕ່າງໆ ສະມາ ຊິກພັກ, ພະນັກງານ-ນັກຮົບທຸກສະຫາຍ ກໍໄດ້ເຄື່ອນໄຫວຢ່າງຕັ້ງໜ້າ ຕາມຂົງເຂດຮັບຜິດຊອບຂອງຕົນ ເປັນຕົ້ນ ດ້ານຂະບວນ ການຕ່າງໆ, ດ້ານເນື້ອໃນ, ການດຳເນີນຊີວິດການເມືອງ, ການກະກຽມບຸກຄະລາກອນ ແລະ ເງື່ອນໄຂຄວາມພ້ອມດ້ານອື່ນໆ ເຮັດໃຫ້ກອງປະຊຸມໃຫຍ່ ຜູ້ແທນສະມາຊິກພັກ ຄັ້ງທີ I ອົງ ຄະນະພັກ ໂຮງຮຽນວັດທະນະທຳຊົນເຜົ່າກອງທັບ ດຳເນີນໄປດ້ວຍຄວາມໝາຍເລິກເຊິ່ງ, ຖືກຕ້ອງຕາມຫລັກການ ບັນລຸໄດ້ຕາມຈຸດ ປະສົກຄາດໝາຍຂອງຂັ້ນເທິງ ແລະ ມີຜົນສຳເລັດຢ່າງຈົບງານ. ທັງນີ້, ເພື່ອເປັນການຖອດຖອນ ບົດຮຽນຮອບດ້ານລວມທັງ ຂໍ້ສະດວກ, ຂໍ້ຫຍຸ້ງຍາກ ແລະ ວິທີການແກ້ໄຂໃນຕໍ່ໜ້າ.

ພ້ອມນີ້, ຍັງໄດ້ມອບໃບຍ້ອງຍໍໃຫ້ບຸກຄົນດີເດັ່ນ ທີ່ປະກອບສ່ວນເຂົ້າໃນ ວຽກງານຮັບໃຊ້ກອງປະຊຸມ ຈຳນວນ 213 ສະຫາຍ ແລະ ມອບລາງວັນການແຂ່ງຂັນກິລາມວນຊົນ ຕື່ມອີກ.

ໂອກາດນີ້, ສະຫາຍ ພັນເອກ ສະແຫວງ ແດນນາມົນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ຜົນສຳເລັດດັ່ງກ່າວ ທີ່ຍາດມາໄດ້, ພ້ອມທັງຊີ້​ນໍາໃຫ້ບັນດາສະຫາຍ ກຳແໜ້ນຖືເອົາວຽກງານ ການເມືອງ-ແນວຄິດເປັນວຽກແຖວໜ້າ, ສຶກສາອົບຮົມພະນັກງານ-ນັກຮົບ ເຊື່ອມຊຶມກຳແໜ້ນຕໍ່ແນວ ທາງນະໂຍບາຍຂອງພັກ, ມີຄວາມຈົ່ງຮັກພັກດີຕໍ່ພັກ ແລະ ຮັບໃຊ້ປະຊາຊົນບັນດາເຜົ່າ ດ້ວຍຄວາມບໍລິສຸດໃຈ, ຄະນະພັກທຸກຂັ້ນ, ສະມາຊິກພັກທຸກສະຫາຍ ຕ້ອງກຳແໜ້ນບັນດາເນື້ອໃນ, ຄຳສັ່ງແນະນຳຈາກຂັ້ນເທິງ ໃນການກະກຽມກອງປະຊຸມໃຫຍ່ ແຕ່ລະຂັ້ນຂອງພັກຢ່າງເລິກເຊິ່ງ, ກຳແໜ້ນສະພາບ ຈຸດພິເສດຂອງກົມກອງ ຫັນເອົາມະຕິຄຳສັ່ງ ຂອງຄະນະພັກຂັ້ນເທິງ ມາເປັນແຜນການ ກະກຽມວຽກງານຮອບດ້ານ, ສະມາຊິກພັກ ຕ້ອງເປັນເຈົ້າການ ຫັນເອົາມະຕິຕົກລົງຂອງຄະນະພັກມາເປັນແຜນການ ໃນການດຳເນີນງານແຕ່ລະໄລຍະ, ສ້າງຂະບວນການດ້ານຕ່າງໆ ໃຫ້ມີຄວາມຟົດຟື້ນ ແລະ ກວ້າງຂວາງ, ເອົາໃຈໃສ່ດຳເນີນຊີວິດການເມືອງ ສ່ອງແສງລາຍງານ ຕຳນິກໍ່ສ້າງເຊິ່ງກັນ ແລະ ກັນ ດ້ວຍຄວາມຈິງໃຈ ແລະ ມີຄວາມຮັບຜິດຊອບສູງ, ພ້ອມກັນນໍາເອົາບົດຮຽນທີ່ຖອດຖອນໄດ້ໃນຄັ້ງນີ້ ໄປຈັດຕັ້ງຜັນຂະຫຍາຍໃຫ້ມີປະສິດທິພາບ ແລະ ປະສິດທີ່ຜົນຍິ່ງຂຶ້ນ.

ຂ່າວ: ໂອລິນ ມິ່ງມີໄຊ

KPL