ຂປລ. ຕະຫລອດໄລຍະ 70 ປີຜ່ານມາ, ພັກປະຊາຊົນປະຕິວັດລາວ ໄດ້ນໍາພາປວງຊົນລາວບັນ ດາເຜົ່າ ດໍາເນີນການປະຕິວັດຊາດ ປະຊາທິປະໄຕ ໃນເມື່ອກ່ອນເຮັດສໍາເລັດພາລະກິດປະຕິວັດ, ລົບລ້າງລະບອບລ່າເມືອງຂຶ້ນທັງເກົ່າ ແລະ ໃໝ່ ນໍາພາປະເທດຊາດ ຍາດໄດ້ໄຊຊະນະເປັນກ້າວໆ ແລະ ສະ ຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975.
ສະຫາຍ ພັນເອກ ສະແຫວງ ແດນນາມົນ ເລຂາຄະນະພັກ, ຫົວໜ້າການເມືອງ ໂຮງຮຽນວັດທະນະທໍາຊົນເຜົ່າກອງທັບ(ຮວຜທ) ໄດ້ໃຫ້ສຳພາດໃນວັນທີ 6 ກຸມພາ 2025 ນີ້ ໂດຍສະຫາຍ ໄດ້ຍົກໃຫ້ເຫັນມູນເຊື້ອ ແຫ່ງການເຕີບໃຫຍ່ຂະຫຍາຍຕົວ ຂອງພັກປະຊາຊົນປະຕິວັດລາວ ເຊິ່ງໄດ້ຮັບການສ້າງ ຕັ້ງຂຶ້ນໃນວັນທີ 22 ມີນາ 1955 ໂດຍສືບທອດພາລະກິດຂອງພັກກອມມູນິດອິນດູຈີນ ໂດຍແມ່ນ ປະທານ ໄກສອນ ພົມວິຫານ ເປັນຫລັກແຫລ່ງນໍາພາກໍ່ຕັ້ງ, ຖະນຸບໍາລຸງ, ຝຶກຝົນຫລໍ່ຫລອມ, ກໍ່ສ້າງ ແລະ ປັບປຸງໃຫ້ໜັກແໜ້ນ, ເຂັ້ມແຂງຢ່າງບໍ່ຢຸດຢັ້ງ. ພັກປະຊາຊົນປະຕິວັດລາວ ໄດ້ມີຄວາມສະດຸ້ງໄວ, ທັງສະຫລຽວສະຫລາດ, ມີໄຫວພິບ ຫັນປ່ຽນການນໍາພາຂອງຕົນ ໃຫ້ສອດຄ່ອງກັບສະພາບ, ຈຸດພິເສດ ແລະ ເງື່ອນໄຂສະພາບແວດລ້ອມຄວາມເປັນຈິງຂອງປະເທດຊາດ ແລະ ສະພາບສາກົນ ດ້ວຍການວາງແນວທາງປ່ຽນແປງໃໝ່ຮອບດ້ານ ທີ່ມີຫລັກການຂອງພັກ ເຊິ່ງສາມາດປົກປັກຮັກສາຄວາມເປັນເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດໄວ້ໄດ້ຢ່າງໝັ້ນຄົງ, ເສດຖະກິດ-ສັງຄົມ ໄດ້ມີການຂະຫຍາຍຕົວຢ່າງຕໍ່ເນື່ອງຕາມທິດຫັນເປັນອຸດສາຫະກໍາ, ຫັນເປັນທັນສະໄໝ, ຊີວິດການເປັນຢູ່ຂອງພະນັກງານ, ທະຫານ, ຕໍາຫລວດ ແລະ ພໍ່ແມ່ປະຊາຊົນບັນດາເຜົ່າ ໄດ້ມີການພັດທະນາ ດີຂຶ້ນເປັນກ້າວໆ.
ຢ່າງໃດກໍຕາມ, ໃນຊຸມປີຕໍ່ໜ້ານີ້, ສະມາຊິກພັກ, ພະນັກງານ-ນັກຮົບ ຕ້ອງໄດ້ສືບຕໍ່ຈັດຕັ້ງປະຕິບັດສອງວາລະແຫ່ງຊາດ ແລະ ປະຕິບັດຫລັກການຂອງພັກ, ຊຸກຍູ້, ສົ່ງເສີມ, ປະດິດສ້າງສິ່ງໃໝ່ທີ່ສອດຄ່ອງກັບສະພາບການໃໝ່, ສ້າງການຫັນປ່ຽນອັນຕັ້ງໜ້າດ້ານແບບແຜນນໍາພາ ແລະ ວິທີເຮັດວຽກເພື່ອບັນລຸຈຸດໝາຍສັງຄົມນິຍົມ, ເຮັດໃຫ້ປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີເປັນປຶກແຜ່ນ, ປະຊາທິປະໄຕ, ຍຸຕິທໍາ ແລະ ສີວິໄລ.
ສະຫາຍ ພັນເອກ ສະແຫວງ ແດນນາມົນ ຍັງໃຫ້ຮູ້ອີກວ່າ: ໂຮງຮຽນວັດທະນະທໍາຊົນເຜົ່າກອງທັບ ແມ່ນໂຮງຮຽນໜຶ່ງໃນລະບົບໂຮງຮຽນຂອງກອງທັບ ທີ່ຂຶ້ນກັບກະຊວງປ້ອງກັນປະເທດ ມີຖານະບົດບາດທຽບເທົ່າກັບກອງພົນ ໂດຍພາຍໃຕ້ການຊີ້ນໍາ-ນໍາພາເດັດຂາດ, ໂດຍກົງ, ຮອບດ້ານຂອງຄະນະພັກກະຊວງປ້ອງກັນປະເທດ ເຊິ່ງໄດ້ຮັບການສ້າງຕັ້ງຂຶ້ນໃນວັນທີ 24 ມິຖຸນາ 2022. ຄະນະພັກໂຮງຮຽນວັດທະນະທໍາຊົນເຜົ່າກອງທັບ ໄດ້ຖືເອົາວຽກງານສຶກສາອົບຮົມການເມືອງ-ນໍາພາແນວຄິດ ໃຫ້ສະມາຊິກພັກ, ພະນັກງານ-ນັກຮົບເປັນວຽກແຖວໜ້າ, ສອດຫ້ອຍເຂົ້າທຸກຂົງເຂດວຽກງານ ເຮັດໃຫ້ພະນັກງານ-ນັກຮົບ ມີແນວຄິດອຸ່ນອ່ຽງທຸ່ນທ່ຽງເຊື້ອໝັ້ນຕໍ່ການນໍາພາຂອງພັກ, ມີຄວາມຮັບຜິດຊອບສູງຕໍ່ໜ້າທີ່ການເມືອງຂອງຕົນ ທີ່ພັກ-ລັດ, ກອງທັບ ແລະ ປະຊາຊົນມອບໝາຍໃຫ້. ໃນໄລຍະ 2 ປີຜ່ານມາ, ສາມາດສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໄດ້ 50%, ສະມາຊິກພັກແຂງ 76,39%; ພະນັກງານໄດ້ຮັບນະໂຍບາຍ ເລື່ອນຊັ້ນໃໝ່ 74 ສະຫາຍ, ສົ່ງພະນັກງານ-ນັກຮົບໄປຮຽນຢູ່ພາຍໃນ ແລະ ຕ່າງປະເທດ 20 ສະຫາຍ, ສ້າງໄດ້ຄູສອນດີ-ສອນເກັ່ງ, ນັກຮຽນດີ-ຮຽນເກັ່ງ ໄດ້ຈໍານວນໜຶ່ງ, ທັງໄດ້ຮັບໃບຢັ້ງຢືນຈາກກະຊວງສຶກສາທິການ-ກິລາ ໃຫ້ເປັນໂຮງຮຽນສີຂຽວ ແລະ ໂຮງຮຽນປອດຢາເສບຕິດ.
ໃນໂອກາດວັນສ້າງຕັ້ງກອງທັບປະຊາຊົນລາວຄົບຮອບ 70 ປີ ທີ່ຈະມາເຖິງນີ້, ສະຫາຍ ພັນເອກ ສະແຫວງ ແດນນາມົນ ໄດ້ຕາງໜ້າຄະນະພັກ-ຄະນະອໍານວຍການໂຮງຮຽນວັດທະນະທໍາຊົນເຜົ່າ ກອງທັບ ສະແດງຄວາມຮູ້ບຸນຄຸນຢ່າງສູງມາຍັງການນໍາພັກ-ລັດ, ການນໍາກະຊວງປ້ອງກັນປະເທດ, ການນໍາກົມໃຫຍ່ການເມືອງກອງ ທັບຕະຫລອດຮອດພະນັກງານ-ນັກຮົບທົ່ວກອງທັບ ແລະ ບັນດາບຸກຄົນ-ນິຕິບຸກຄົນ ທີ່ໄດ້ໃຫ້ການຊີ້ນໍາ, ອູ້ມຊູຊ່ວຍເຫລືອໂຮງຮຽນວັດທະນະທໍາຊົນເຜົ່າກອງທັບ ໄດ້ດີຕະຫລອດມາ, ອວຍພອນໄຊອັນປະເສີດໃຫ້ບັນດາສະ ຫາຍຈົ່ງມີສຸຂະພາບເຂັ້ມແຂງ, ມີອາຍຸໝັ້ນຍືນຍາວ, ສືບຕໍ່ໃຫ້ການຊີ້ນໍາໂຮງຮຽນວັດທະນະທໍາຊົນເຜົ່າກອງທັບ ນັບມື້ນັບເຕີບໃຫຍ່ເຂັ້ມແຂງຂຶ້ນຢ່າງບໍ່ຢຸດຢັ້ງ.
ຂ່າວ: ທະນູທອງ
ພາບ: ຮວຜທ
