ຂປລ. ການຈັດຕັ້ງປະຕິບັດກິດຈະກຳ ປີທ່ອງທ່ຽວລາວ 2024 ປະກອບສ່ວນເຮັດໃຫ້ ການທ່ອງທ່ຽວ ຢູ່ແຂວງຈຳປາສັກ ໄດ້ຮັບການພັດທະນາ ຢ່າງຕໍ່ເນື່ອງ ແລະ ຂະຫຍາຍຕົວດີຂຶ້ນກວ່າເກົ່າ, ສາມາດດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວຢູ່ ແຂວງຈຳປາສັກ ທັງໝົດ 647.325 ຄົນ. ໃນນັ້ນ, ນັກທ່ອງທ່ຽວຕ່າງປະເທດ 322.357 ຄົນ, ທຽບໃສ່ແຜນການ ປະຕິບັດໄດ້ລື່ນແຜນ, ສາມາດສ້າງລາຍຮັບໄດ້ 90 ລ້ານກວ່າໂດລາສະຫະລັດ.
ທ່ານ ວັນນະໄຊ ຊາດຕະກຸນ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງຈໍາປາສັກ ໄດ້ໃຫ້ຮູ້ ໃນກອງປະຊຸມສະຫລຸບ ການຈັດຕັ້ງປະຕິບັດປີທ່ອງທ່ຽວລາວ 2024 ໃນວັນທີ 5 ກຸມພາ 2025 ຜ່ານມານີ້ວ່າ: ການຈັດຕັ້ງປະຕິບັດກິດຈະກຳສົ່ງເສີມປີທ່ອງທ່ຽວລາວ 2024 ຢູ່ແຂວງຈໍາປາສັກ, ພາຍຫລັງທີ່ມີທິດຊີ້ນໍາຂອງລັດຖະບານ ແລະ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ອົງການປົກຄອງແຂວງຈຳປາສັກ ໄດ້ຄົ້ນຄວ້າບັນດາກິດຈະກຳອັນພົ້ນເດັ່ນ ທັງໝົດ 12 ກິດຈະກຳ ເປັນວາລະການຈັດງານ ສົ່ງເສີມການທ່ອງທ່ຽວລາວ. ໃນນັ້ນ, ມີກິດຈະກຳລະດັບເມືອງ 10 ກິດຈະກຳ, ລະດັບ ແຂວງ 1 ກິດຈະກຳ ແລະ ລະດັບຊາດ 1 ກິດຈະກຳ ໂດຍເລີ່ມຈາກງານສົມໂພດຕົ້ນໄມ້ມະນີໂຄດ ຢູ່ຄອນພະເພັງ ເມືອງໂຂງ ເປັນກິດຈະກຳທໍາອິດໃນເດືອນມັງກອນ. ນອກນີ້, ໃນແຕ່ລະເດືອນ ກໍໄດ້ຈັດງານຕ່າງໆຕາມວາລະ ແລະ ງານແຫ່ພະສາດເຜິ້ງ, ກາບໄວ້ພະທາດຄູຂີ້ຫອມ ຢູ່ບ້ານວັດທາດ ເມືອງຈຳປາສັກ ເປັນກິດຈະກຳສຸດທ້າຍໃນກາງເດືອນພະຈິກ 2024. ອັນພົ້ນເດັ່ນ ແມ່ນການຈັດງານສັບປະດາການທ່ອງທ່ຽວແຂວງຈຳປາສັກ ຕິດພັນກັບພິທີເປີດປີທ່ອງທ່ຽວລາວ ໂດຍໄດ້ຈັດໃຫ້ມີຫລາກຫລາຍກິດຈະກຳ ເຊິ່ງສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາຮ່ວມງານເປັນຈຳນວນຫລວງຫລາຍ.
ຄຽງຄູ່ກັບການຈັດກິດຈະກຳ ທີ່ໄດ້ຖືກຮັບຮອງ ໃນປີທ່ອງທ່ຽວລາວ ແລ້ວ, ອົງການປົກຄອງແຕ່ລະຂັ້ນ ຂອງແຂວງຈຳປາສັກ ກໍໄດ້ສົ່ງເສີມງານປະເພນີ ແລະ ເທສະການຂອງທ້ອງຖິ່ນ ພາຍໃນແຂວງ ໃຫ້ໄດ້ຮັບການໂຄສະນາເຜີຍແຜ່ ຢ່າງກວ້າງຂວາງ ພ້ອມກັບການຈັດງານແຂ່ງຂັນກິລາ ເນື່ອງໃນໂອກາດຕ່າງໆ ເປັນຕົ້ນ ການແຂ່ງຂັນບານເຕະແຂວງພາກກາງ-ພາກໃຕ້, ງານ Pakse Half Marathon, ງານແຂ່ງຂັນເປຕັງ ຊີງຂັນທ່ານນາຍົກ, ແຂ່ງຂັນກ໊ອຟ ແລະ ອື່ນໆ ໃນໄລຍະປີທ່ອງທ່ຽວ. ພ້ອມທັງ ການຊຸກຍູ້ຄາລາວານ ທ່ອງທ່ຽວ ດ້ວຍລົດຈາກປະເທດໄທ, ກຳປູເຈຍ ແລະ ຫວຽດນາມ ເຂົ້າມາແຂວງຈໍາປາສັກ ເຊື່ອມຕໍ່ກັບບັນດາແຂວງພາກໃຕ້ ເປັນຈໍານວນຫລາຍ. ນອກນີ້, ຍັງໄດ້ຮັບການປະກອບສ່ວນ ທາງດ້ານວັດຖຸ-ງົບປະມານ ຈາກ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ພາກທຸລະກິດ, ຜູ້ປະກອບການ ເປັນຈຳນວນຫລາຍ ເຂົ້າໃນການຊຸກຍູ້ ການຈັດຕັ້ງປະຕິບັດກິດຈະກຳຕ່າງໆ ຂອງປີທ່ອງທ່ຽວລາວ 2024 ໂດຍສຸມໃສ່ໃນການພັດທະນາສິ່ງອໍານວຍຄວາມສະດວກ ໃຫ້ແກ່ການທ່ອງທ່ຽວ, ປັບປຸງພື້ນຖານໂຄງລ່າງ ທີ່ຈໍາເປັນຈໍານວນໜຶ່ງ ໃນສະຖານທີ່ທ່ອງທ່ຽວ ທີ່ມີຂອງແຂວງໃຫ້ດີຂຶ້ນ, ເຮັດໃຫ້ສະຖານທີ່ທ່ອງທ່ຽວສ່ວນໃຫຍ່ ໃນຈໍານວນ 244 ແຫ່ງ ໄດ້ຮັບການບັບປຸງໃຫ້ດີຂຶ້ນ, ສາມາດດຶງດູດ ນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວຢູ່ ແຂວງຈຳປາສັກ ໄດ້ທັງໝົດ 647.325 ຄົນ. ໃນນັ້ນ, ນັກທ່ອງທ່ຽວຕ່າງປະເທດ 322.357 ຄົນ, ສ້າງລາຍຮັບໄດ້ 90 ລ້ານກວ່າໂດລາສະຫະລັດ.
ພ້ອມນີ້, ອົງການປົກຄອງແຂວງຈຳປາສັກ ໄດ້ກຳນົດເອົາຍຸດທະສາດການພັດທະນາວຽກງານທ່ອງທ່ຽວ ສີຂຽວ ແລະ ຍືນຍົງ ເຂົ້າໃນມະຕິ VIII ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ (2021-2025) ໂດຍສ້າງການທ່ອງທ່ຽວແບບປະຊາຊົນມີສ່ວນຮ່ວມ ໃຫ້ຫລາຍຂຶ້ນ ຕິດພັນກັບວຽກງານການສ້າງຮາກຖານການເມືອງ, ການພັດທະນາຊົນນະບົດ ແລະ ແກ້ໄຂຄວາມທຸກຍາກ, ສ້າງຄວາມເຂົ້າໃຈ ແລະ ມີສ່ວນຮ່ວມຂອງປະຊາຊົນ ໃນການປົກປັກຮັກສາສິ່ງແວດລ້ອມ, ຄຸ້ມຄອງນໍາໃຊ້ຊັບພະຍາກອນທຳມະຊາດ ໃຫ້ເກີດປະໂຫຍດສູງສຸດ ແລະ ເປັນເຈົ້າການອະນຸລັກ- ສົ່ງເສີມປະເພນີ, ວັດທະນະທຳ ກໍຄື ມໍລະດົກພູມປັນຍາຂອງທ້ອງຖິ່ນ ໃຫ້ໄດ້ຮັບການເສີມຂະຫຍາຍ ແລະ ສືບທອດໄປສູ່ຄົນຮຸ່ນຫລັງ.
ຂ່າວ: ທະນູທອງ
ພາບ: ຂັນໄຊ
