ຂປລ
ຂປລ. ເມື່ອບໍ່ດົນມານີ້, ມູນນິທິພັດທະນາລ້ານຊ້າງ-ແມ່ຂອງ ມອບອຸປະກອນການຮຽນ ແລະ ເຄື່ອງນຸ່ງຫົ່ມ ທີ່ໄດ້ຈາກການລະດົມຂອງ 6 ພາກສ່ວນຈາກ ສປ ຈີນ ໃຫ້ກະຊວງສຶກສາທິການ ແລະ ກິລາ ສປປ ລາວ (ສສກ) ລວມມູນຄ່າ 90 ລ້ານກວ່າກີບ ເພື່ອນໍາໄປມອບຕໍ່ໃຫ້ບັນດາ ສະຖານການສຶກສາ ໃນຂອບເຂດທົ່ວປະເທດ ໂດຍສະເພາະ ບັນດາໂຮງຮຽນທີ່ຢູ່ຫ່າງໄກສອກຫລີກ ແລະ ພາກສ່ວນທີ່ຖືກຜົນກະທົບ ໄພພິບັດນໍ້າຖ້ວມ ຢູ່ ສປປ ລາວ
ຂປລ. ເມື່ອບໍ່ດົນມານີ້, ມູນນິທິພັດທະນາລ້ານຊ້າງ-ແມ່ຂອງ ມອບອຸປະກອນການຮຽນ ແລະ ເຄື່ອງນຸ່ງຫົ່ມ ທີ່ໄດ້ຈາກການລະດົມຂອງ 6 ພາກສ່ວນຈາກ ສປ ຈີນ ໃຫ້ກະຊວງສຶກສາທິການ ແລະ ກິລາ ສປປ ລາວ (ສສກ) ລວມມູນຄ່າ 90 ລ້ານກວ່າກີບ ເພື່ອນໍາໄປມອບຕໍ່ໃຫ້ບັນດາ ສະຖານການສຶກສາ ໃນຂອບເຂດທົ່ວປະເທດ ໂດຍສະເພາະ ບັນດາໂຮງຮຽນທີ່ຢູ່ຫ່າງໄກສອກຫລີກ ແລະ ພາກສ່ວນທີ່ຖືກຜົນກະທົບ ໄພພິບັດນໍ້າຖ້ວມ ຢູ່ ສປປ ລາວ, ຕາງໜ້າມອບໂດຍ ທ່ານ ນາງ ພູຄໍາ ວົງວິຈິດ ປະທານມູນນິທິພັດທະນາລ້ານຊ້າງ-ແມ່ຂອງ ແລະ ຮັບໂດຍ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ, ມີບັນດາຫົວໜ້າກົມ-ຮອງຫົວໜ້າກົມ, ພະແນກການ ແລະ ພາກສ່ວນ ກ່ຽວຂ້ອງ ເຂົ້າຮ່ວມເປັນສັກຂີພິຍານ.
ໂອກາກນີ້, ທ່ານ ພຸດ ສິມມາລາວົງ ໄດ້ສະແດງຄວາມຂອບໃຈ ຕໍ່ມູນນິທິພັດທະນາລ້ານຊ້າງ-ແມ່ຂອງ ທີ່ໄດ້ລະດົມທຶນຈາກ 6 ພາກສ່ວນ ຄື: ໂຮງຮຽນມິງທົງ ຄຸນໝິງ, ຢູບີເທັກ ໂລໂບທິກ ຄັອບ, ຫ້ອງທົດລອງການອະນຸລັກຊີວະພາບ ແລະ ການຟື້ນຟູລະບົບນິເວດ ມະຫາວິທະຍາໄລຄຸນໝິງ, ທະນາ ຄານ ຫົວເຊ່ຍ (ສາຂາຄຸນໝິງ), ບໍລິສັດ ເຕັກໂນໂລຊີຂໍ້ມູນຂ່າວສານ ຢູນນານ ຈົວຢູນ ຈໍາກັດ, ມູນນິທິປົກປັກຮັກສາສິ່ງແວດລ້ອມພູພຽງຢູນນານ ສປ ຈີນ ໃນຄັ້ງນີ້, ຖືເປັນການປະກອບສ່ວນສຳຄັນ ເຂົ້າໃນການສະໜັບສະໜູນ ຊ່ວຍເລືອຂະແໜງການສຶກສາ.
ສໍາລັບເຄື່ອງຊ່ວຍເຫລືອ ທີ່ນໍາມາມອບໃນຄັ້ງນີ້ ປະກອບມີ: ແລັບທັອບ 2 ໜ່ວຍ, ເສື້ອກັນໜາວ, ຜ້າຫົ່ມ ແລະ ອຸປະກອນການຮຽນ ເປັນຕົ້ນ ປຶ້ມ, ບິກ, ສໍ ລວມມູນຄ່າປະມານ 90 ລ້ານກວ່າກີບ.
KPL
