ຂປລ
ທ່ານ ແລງ ໂກສົນ ໂຄສົກ ສຳນັກ ປະຕິບັດການ ເກັບກູ້ ລະເບີດ ແລະ ການຊ່ວຍເຫລືອ ຜູ້ເສຍຫາຍ ແຫ່ງກຳປູເຈຍ (CMAA) ເປີດເຜີຍວ່າ: ກໍໍາປູເຈຍ ໄດ້ເລື່ອນ ເວລາ ການບັນລຸ ເປົ້າໝາຍ ປາສະຈາກ ລະເບີດ ຈາກເດີມ ປີ 2025 ເປັນປີ 2030
ຂປລ.ສຳນັກຂ່າວ ຊິນຮວາ ຂອງ ສປຈີນ , ວັນທີ 20 ມັງກອນ, ທ່ານ ແລງ ໂກສົນ ໂຄສົກ ສຳນັກ ປະຕິບັດການ ເກັບກູ້ ລະເບີດ ແລະ ການຊ່ວຍເຫລືອ ຜູ້ເສຍຫາຍ ແຫ່ງກຳປູເຈຍ (CMAA) ເປີດເຜີຍວ່າ: ກໍໍາປູເຈຍ ໄດ້ເລື່ອນ ເວລາ ການບັນລຸ ເປົ້າໝາຍ ປາສະຈາກ ລະເບີດ ຈາກເດີມ ປີ 2025 ເປັນປີ 2030 ເນື່ອງຈາກສະພາບ ຄວາມຫຍຸ້ງຍາກ ທາງດ້ານ ພູມສັນຖານ ໃນການ ຄົ້ນຫາ ແລະ ເກັບກູ້ ລະເບີດ ຕາມເຂດ ຊາຍແດນ ເພາະວ່າ ພື້ນທີ່ ມີລະເບີດ ຢູ່ຕາມຊາຍແດນ ກຳປູເຈຍ-ໄທ ທີ່ມີ ລັກສະນະເປັນພູ ແລະ ປ່າຕຶບໜາ.
ໂດຍພື້ນທີ່ ດັ່ງກ່າວ ມີລະເບີດ ຢ່າງຫລວງຫລາຍ ສົ່ງຜົນໃຫ້ ຕ້ອງໃຊ້ເວລາ ແລະ ຊັບພະຍາກອນ ຫລາຍຂຶ້ນ ໃນການ ເຂົ້າໄປເຖິງ ແລະ ເກັບກູ້ລະເບີດ. ສະນັ້ນ ຄວາມທ້າທາຍ ດັ່ງກ່າວ ໄດ້ສົ່ງຜົນໃຫ້ ສຳນັກງານ ຕ້ອງຕັດສິນໃຈ ເລື່ອນເປົ້າໝາຍ ການປາສະຈາກ ລະເບີດ ແລະ ວັດຖຸລະເບີດ ຕົກຄ້າງ ຈາກ ສົງຄາມ(ERW) ອອກໄປ.
ຂະນະນີ້ ສຳນັກງານ ພວມຈັດການ ນະໂຍບາຍ ແຫ່ງຊາດ ດ້ານປະຕິບັດການ ເກັບກູ້ ລະເບີດ 2026-2030 ເພື່ອກໍານົດ ແຜນການປະຕິບັດ ແລະ ກົນລະຍຸດ ສໍາລັບ ການບັນລຸ ເປົ້າໝາຍໃໝ່. ສ່ວນກໍາປູເຈຍ ເປັນປະເທດ ທີ່ໄດ້ຮັບ ຜົນກະທົບ ຈາກລະເບີດ ແລະ ວັດຖຸລະເບີດ ຕົກຄ້າງ ຈາກສົງຄາມ ຫລາຍທີ່ສຸດ ໂດຍມີປະມານ 4-6 ລ້ານໜ່ວຍ ຈາກ ສົງຄາມ ແລະ ຄວາມຂັດແຍ່ງ ພາຍໃນ ເປັນເວລາ 3 ທົດສະວັດ ທີ່ສິ້ນສຸດໃນປີ 1998./
KPL
