ຂປລ
ທາດໂຜ່ນ ຖືເປັນປະດິດສະຖານວັດທະນະອັນເກົ່າແກ່ ທີ່ເປັນສູນລວມຈິດໃຈຂອງປະຊາຊົນ ແຂວງສະຫວັນນະເຂດ ລວມເຖິງປວງຊົນລາວທັງຊາດ ທີ່ມີຄວາມເຫລື່ອມໃສສັດທາເພື່ອຂໍພອນອັນປະເສີດໃຫ້ແກ່ຕົນເອງ, ຄອບຄົວ ແລະ ປະເທດຊາດໃຫ້ຢູ່ເຢັນເປັນສຸກ ເພາະວ່າທາດໂຜ່ນເປັນພະທາດທີ່ເກົ່າແກ່ມີອາຍຸປະມານ 2.500 ປີ;
*ທາດໂຜ່ນ ຖືເປັນປະດິດສະຖານວັດທະນະອັນເກົ່າແກ່ ທີ່ເປັນສູນລວມຈິດໃຈຂອງປະຊາຊົນ ແຂວງສະຫວັນນະເຂດ ລວມເຖິງປວງຊົນລາວທັງຊາດ ທີ່ມີຄວາມເຫລື່ອມໃສສັດທາເພື່ອຂໍພອນອັນປະເສີດໃຫ້ແກ່ຕົນເອງ, ຄອບຄົວ ແລະ ປະເທດຊາດໃຫ້ຢູ່ເຢັນເປັນສຸກ ເພາະວ່າທາດໂຜ່ນເປັນພະທາດທີ່ເກົ່າແກ່ມີອາຍຸປະມານ 2.500 ປີ ຈຶ່ງເປັນສະຖານທີ່ທ່ອງທ່ຽວທາງວັດທະນະທຳຂອງແຂວງສະຫວັນນະເຂດ ທີ່ມີນັກທ່ອງທ່ຽວນິຍົມໄປກາບໄຫວ້ແລະສັກກາລະບູຊາເປັນຈຳນວນຫລາຍ ໂດຍສະເພາະແມ່ນນັກທ່ອງທ່ຽວພາຍໃນ.
ທາດໂຜ່ນ ຫລື ເຈົ້າແທ່ນຄໍາເຫລືອງ ຕາມຕຳນານໄດ້ກ່າວໄວ້ວ່າ: ພະທາດອົງນີ້ສ້າງຂຶ້ນໃນຕອນຄ່ຳຂອງວັນພຸດເດືອນ 12 ພສ236. ສ້າງດ້ວຍຫີນເຂົ້າຈີ່ ຫລື ເອີ້ນວ່າ (ຫີນໜາມໜໍ່) ກໍເປັນທາດອຸໂມງ (ຮູບໂອຂວ້ຳ)ກວ້າງດ້ານລະ12 ວາ ສ້າງມື້ໜຶ່ງກັບຄືນໜຶ່ງ ກໍສຳເລັດມາເຖິງປັດຈຸບັນນີ້ມີອາຍຸເຖິງ 2.500 ປີ, ໂດຍມີສົມເດັດພະພຸດທະວົງສາເປັນລາຊະອຸປະຖຳສືບຕໍ່ມາ ແລະ ເພີ່ນຈະຈັດງານບຸຸນສະເຫລີມສະຫລອງພະທາດນີ້ ຂຶ້ນ 15 ຄໍ່າ ເດືອນສາມ (ເດືອນສາມເພັງ) ຂອງທຸກໆປີ. ສະນັ້ນ ສະຖານທີ່ແຫ່ງນີ້, ຈຶ່ງຖືວ່າເປັນມໍລະດົກຕົກທອດ, ເປັນຊັບສົມບັດມິ່ງເມືອງທີ່ມີຄ່າສູງ, ໂດດເດັ່ນທາງດ້ານວັດທະນະທຳອັນລ້ຳຄ່າ ແລະ ເປັນປະຫວັດສາດ ຊຶ່ງຕິດພັນກັບແບບແຜນດຳລົງຊີວິດຂອງປະຊາຊົນລາວບັນດາເຜົ່າມາແຕ່ດຶກດຳບັນ ແລະ ຍັງເປັນສະຖານທີ່ທ່ອງທ່ຽວທາງດ້ານ ວັດທະນະທຳທີ່ສຳຄັນ ແລະ ມີຊື່ສຽງອີກແຫ່ງໜຶ່ງຂອງແຂວງ ສະຫວັນນະເຂດ. ເຊື່ອກັນວ່າໃຜທ່ີມາຂໍພອນ ແລະ ບົນບະ ກໍຈະມັກຈະໄດ້ດັ່ງຄວາມມຸ່ງມາດປາຖະໜາຢ່າງອັດສະຈັນ ແຕ່ລະມື້ກໍຈະມີທັງຄົນລາວ ແລະ ຄົນໄທ ມາກາບໄຫວ້ຂໍພອນ ຖືວ່າເປັນພະທາດທີ່ສັກສິດ ແລະ ມີປະຫວັດຄວາມເປັນມາອັນຍາວນານ. ທາດໂຜ່ນ: ຕັ້ງຢູ່ວັດເຈຕິຍາຣາມ ບ້ານໂພນທາດ, ເມືອງໄຊພູທອງ, ແຂວງສະຫວັນນະເຂດ, ຕັ້ງຢູ່ຫ່າງຈາກເທສະບານເມືອງໄຊພູທອງ ປະມານ 22 ກິໂລແມັດ ຕາມເສັ້ນທາງເລກທີ 13 ໃຕ້ມຸ່ງໜ້າສູ່ແຂວງຈໍາປາສັກ ແລະ ຫ່າງຈາກເທດສະບານນະຄອນໄກສອນ ພົມວິຫານ ປະມານ 65 ກິໂລແມັດ.
ໂດຍ: ມາລີດາ
KPL
