ຂປລ
ຂປລ. ກົມສ່ວຍສາອາກອນ ສປປ ລາວ ຮ່ວມກັບ ທະນາຄານໂລກ WB ເປີດຊຸດອົບຮົມ ໃນຫົວຂໍ້: ການບໍລິຫານຄວາມສ່ຽງ ໃນການປະຕິບັດລະບຽບ ການດ້ານສ່ວຍສາອາກອນ ໃນລະຫວ່າງວັນທີ 20-22 ມັງກອນ 2025 ໂດຍການເປັນປະທານຂອງ ທ່ານ ຄໍາພັນ ພັນທຸລັກ ຮອງຫົວໜ້າກົມສ່ວຍສາອາກອນ, ມີຊ່ຽວຊານອາວຸໂສ ດ້ານການບໍລິຫານພາກລັດປະຈຳທະນາຄານໂລກ (WB), ທີ່ປຶກສາຈາກທະນາຄານໂລກ, ບັນດາຫົວໜ້າ, ຮອງຫົວໜ້າພະແນກ ແລະ ວິຊາການ ຈາກບັນດາພະແນກອ້ອມຂ້າງກົມສ່ວຍສາອາກອນ, ຕາງໜ້າຈາກສ່ວຍສາອາກອນປະຈຳແຂວງ ແລະ ນະຄອນຫລວງວຽງຈັນ ເຂົ້າຮ່ວມ
ຂປລ. ກົມສ່ວຍສາອາກອນ ສປປ ລາວ ຮ່ວມກັບ ທະນາຄານໂລກ WB ເປີດຊຸດອົບຮົມ ໃນຫົວຂໍ້: ການບໍລິຫານຄວາມສ່ຽງ ໃນການປະຕິບັດລະບຽບ ການດ້ານສ່ວຍສາອາກອນ ໃນລະຫວ່າງວັນທີ 20-22 ມັງກອນ 2025 ໂດຍການເປັນປະທານຂອງ ທ່ານ ຄໍາພັນ ພັນທຸລັກ ຮອງຫົວໜ້າກົມສ່ວຍສາອາກອນ, ມີຊ່ຽວຊານອາວຸໂສ ດ້ານການບໍລິຫານພາກລັດປະຈຳທະນາຄານໂລກ (WB), ທີ່ປຶກສາຈາກທະນາຄານໂລກ, ບັນດາຫົວໜ້າ, ຮອງຫົວໜ້າພະແນກ ແລະ ວິຊາການ ຈາກບັນດາພະແນກອ້ອມຂ້າງກົມສ່ວຍສາອາກອນ, ຕາງໜ້າຈາກສ່ວຍສາອາກອນປະຈຳແຂວງ ແລະ ນະຄອນຫລວງວຽງຈັນ ເຂົ້າຮ່ວມ ແບບເຊິ່ງໜ້າ ແລະ ແບບອອນລາຍ.
ທ່ານ ຄໍາພັນ ພັນທຸລັກ ໄດ້ໃຫ້ຮູ້ວ່າ: ຊຸດຝຶກອົບຮົມໃນຄັ້ງນີ້, ຈັດຂຶ້ນພາຍໃຕ້ ໂຄງການປັບປຸງການຄຸ້ມຄອງການເງິນແຫ່ງລັດ ໄລຍະ 3. ໃນນັ້ນ, ກົມສ່ວຍສາອາກອນ ແມ່ນນອນໃນແຜນງານທີ 2 ກໍຄື ການປັບປຸງການຄຸ້ມຄອງລາຍຮັບ ເຊິ່ງໄດ້ຮັບທຶນສະໜັບສະໜູນຈາກ ສະຫະພາບເອີຣົບ, ທະນາ ຄານໂລກ ແລະ ລັດຖະບານ ອົດສະຕຣາລີ. ການຝຶກອົບຮົມຄັ້ງນີ້, ຈະຊ່ວຍໃນການເພີ່ມການປະຕິບັດ ຕາມກົດໝາຍສ່ວຍສາອາກອນ, ການນຳໃຊ້ຊັບພະຍາກອນຢ່າງມີປະສິດທິພາບ, ສົ່ງເສີມຄວາມຍຸຕິທຳ, ຫລຸດລາຍຈ່າຍງົບປະມານ ທີ່ນຳໃຊ້ໃນວຽກງານກວດກາລົງ, ສ້າງຄວາມໄວ້ເນື້ອເຊື່ອໃຈຈາກຜູ້ເສຍອາກອນ.
ຊຸດອົບຮົມຄັ້ງນີ້, ຜູ້ທີ່ເຂົ້າຮ່ວມໄດ້ຮັບຟັງ ແລະ ຮຽນຮູ້ບົດຮຽນສາກົນຈາກຊ່ຽວຊານ ທີ່ປະສົບການ ເພື່ອຮຽນຮູ້, ແລກປ່ຽນບົດຮຽນໃນຫລາຍຫົວຂໍ້ ເປັນຕົ້ນ ການທົບທວນຄືນການຈັດຕັ້ງປະຕິບັດ ວຽກງານກວດກາໄລ່ລຽງ ຂອງກົມສ່ວຍສາອາກອນໃນປີ 2024 ທີ່ຜ່ານມາ (ບັນຫາສຳຄັນ ແລະ ສິ່ງທ້າທາຍ ໃນການຈັດຕັ້ງປະຕິບັດ ລະບຽບການກວດກາໄລ່ລຽງທີ່ມີການປັບປຸງ), ຄວາມເປັນມາ ແລະ ເຫດຜົນໃນການບໍລິຫານຄວາມສ່ຽງ ໃນການປະຕິບັດ ລະບຽບການດ້ານສ່ວຍສາອາກອນ (CRM); ສິ່ງສໍາຄັນກ່ຽວກັບການອອກແບບ ແລະ ການຈັດຕັ້ງປະຕິບັດໂຄງການ (CRM); ໂຄງການ/ຂອບວຽກງານ ການຄຸ້ມຄອງຄວາມສ່ຽງ ໃນການປະຕິບັດລະບຽບ ການດ້ານສ່ວຍສາອາກອນ.
ໂອກາດນີ້, ທ່ານຮອງຫົວໜ້າກົມສ່ວຍສາອາກອນ ຍັງໄດ້ເນັ້ນໃຫ້ສຳມະນາກອນ ຕ້ອງໄດ້ຍົກສູງຄວາມເອົາໃຈໃສ່ດ້ວຍຄວາມຮັບຜິດຊອບ ໃນແຕ່ລະຫົວຂໍ້ທີ່ຊ່ຽວຊານສະເໜີ, ຖ້າຫາກມີປະເດັນໃດທີ່ຍັງບໍ່ຊັດເຈນ ແມ່ນໃຫ້ສຳມະນາກອນເຈາະຈີ້ມ ແລະ ຕັ້ງຄຳຖາມ ເພື່ອໃຫ້ສາມາດແລກປ່ຽນບົດຮຽນຈາກຊ່ຽວຊານ ເພື່ອມາດັດປັບເຂົ້າໃນ ການຈັດຕັ້ງປະຕິບັດຕົວຈິງ ໃນໜ້າວຽກຂອງບັນດາທ່ານ ໃຫ້ມີຜົນສໍາເລັດດີຂຶ້ນ.
ຂໍ້ມູນ-ພາບ: ກະຊວງການເງິນ
KPL
