ຂປລ. ຄະນະ​ຜູ້​ແທນຈາກ ສປປ ລາວ ນໍາ​ໂດຍ ທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ສໍາ​ເລັດ​ການເຂົ້າຮ່ວມມະຫາກຳທ່ອງທ່ຽວອາຊຽນ (ATF2025) ຈັດຂຶ້ນລະຫວ່າງວັນທີ 19-20 ມັງກອນ 2025, ທີ່ ລັດຈໍຮໍ ປະເທດມາເລເຊຍ ພາຍໃຕ້ຄໍາຂວັນ “ສາມັກຄີໜຶ່ງດຽວ ສ້າງອະນາຄົດການທ່ອງທ່ຽວອາຊຽນດ້ວຍກັນ​”. ໃນ​ນັ້ນ, ​ໄດ້​ເຂົ້າ​ຮ່ວມກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 28, ກອງປະຊຸມລັດຖະມົນຕີທ່ອງທ່ຽວອາຊຽນ ບວກສາມ (ສປ ຈີນ ຢີ່ປຸ່ນ ສ ເກົາຫລີ) ຄັ້ງທີ 24, ກອງປະຊຸມ ລັດຖະມົນຕີທ່ອງທ່ຽວ ອາຊຽນ-ອິນເດຍ ຄັ້ງທີ 12 ແລະ ກອງປະຊຸມ ລັດຖະມົນຕີ ທ່ອງທ່ຽວອາຊຽນ-ຣັດເຊຍ ຄັ້ງທີ 4 ແລະ ງານວາງສະແດງການທ່ອງທ່ຽວອາຊຽນ.

ກອງປະຊຸມໄດ້ທົບທວນ ​ແລະ ຕີລາຄາການຈັດຕັ້ງປະຕິບັດ ບັນດາກິດຈະກໍາບຸລິມະສິດ ໄລຍະ 2016-2025 ແລະ ປະກອບຄໍາເຫັນໃສ່ແຜນຍຸດທະສາດ ການທ່ອງທ່ຽວອາຊຽນ ປີ 2026-2030, ໂດຍເນັ້ນເປົ້າໝາຍຍົກສູງຄຸນນະພາບ, ການທ່ອງທ່ຽວທີ່ມີຄວາມຮັບຜິດຊອບ, ຄວາມຍືນຍົງ, ການມີສ່ວນຮ່ວມ ແລະ ຄວາມສາມາດໃນການປັບຕົວ. ກອງປະຊຸມ ໄດ້ເນັ້ນໜັກເຖິງຄວາມສໍາຄັນຂອງການຮ່ວມມື ຂອງບັນດາປະເທດສະມາຊິກອາຊຽນ, ພາກສ່ວນຕ່າງໆທີ່ກ່ຽວຂ້ອງ ແລະ ພາກທຸລະກິດ ເພື່ອບັນລຸການພັດທະນາໃຫ້ມີຍືນຍົງ; ກອງປະຊຸມໄດ້ຕີລາຄາຜົນສໍາເລັດ ຂອງການຮ່ວມມື ໃນປີ 2024 ພາກພື້ນອາຊຽນ ໄດ້ຕ້ອນຮັບນັກທ່ອງທ່ຽວຕ່າງປະເທດ ເຖິງ 123 ລ້ານກວ່າຄົນ ເພີ່ມຂຶ້ນ 30,6% ຈາກປີ 2023, ເນື່ອງມາຈາກວ່າຫລາຍປະເທດໄດ້ມີນະໂຍບາຍຕ່າງໆ ເປັນຕົ້ນ ການນະໂຍບາຍວີຊາ ແລະ ການພັດທະນາຜະລິດຕະພັນ ການທ່ອງທ່ຽວໃໝ່ທີ່ຫລາກຫລາຍ. ພ້ອມກັນນີ້, ກອງປະຊຸມຍັງໄດ້ສະແດງຄວາມຍ້ອງຍໍຊົມເຊີຍຕໍ່ ສປປ ລາວ ທີ່ໄດ້ເປັນເຈົ້າການໃນສ້າງມາດຕະຖານ ການທ່ອງທ່ຽວອະນຸ ລັກອາຊຽນ (ASEAN Ecotourism Standard), ໃນໄລຍະທີ່ ສປປ ລາວ ເປັນປະທານອາຊຽນ ເຊິ່ງໄດ້ຮັບຮອງຢູ່ທີ່ກອງປະຊຸມ ສຸດຍອດອາຊຽນ ໃນເດືອນຕຸລາ 2024 ທີ່ນະຄອນຫລວງວຽງຈັນ ສປປ ລາວ.

ນອກຈາກນີ້, ກອງປະຊຸມຍັງໄດ້ເຫັນດີ ແລະ ເປັນເອກະພາບກັນ ສົ່ງເສີມ ແລະ ເພີ່ມທະວີຂອບການຮ່ວມມືດ້ານການທ່ອງທ່ຽວອາຊຽນ ໃຫ້ມີຄວາມເຂັ້ມແຂງ ໂດຍສະແດງພັນທະຢ່າງແຂງແຮງ ໃນການປະກອບສ່ວນ ແລະ ຈັດຕັ້ງປະຕິບັດ ບັນດາກິດຈະກຳທ່ອງທ່ຽວ ຢູ່ໃນພາກພື້ນອາຊຽນ ແລະ ພາຍໃນປະເທດຂອງຕົນ ໃຫ້ມີຄວາມເຂັ້ມແຂງ ແລະ ປະກົດຜົນເປັນຈິງ ແລະ ພ້ອມກັນເຂົ້າຮ່ວມປີທ່ອງທ່ຽວອາຊຽນ-ຈີນ 2025, ປີທ່ອງທ່ຽວອາຊຽນ-ອິນເດຍ 2025 ແລະ ກິດຈະກຳທ່ອງທ່ຽວອື່ນໆ  ທີ່ປິ່ນອ້ອມຢ່າງຕັ້ງໜ້າ.

KPL