*ຄວາມດຸໝັ່ນຄືສິ່ງທີ່ຂາດບໄດ້, ຄອບຄົວໃດມີຄວາມດຸໝັ່ນຄອບຄົວນັ້ນມີຢູ່ມີກິນຫລຸດພົ້ນອອກຈາກຄວາມທຸກຍາກເທື່ອລະກ້າວ. ມີພຽງຄວາມດຸໝັ່ນພຽງຢ່າງດຽວກໍ່ບໍ່ພຽງພໍ ຕ້ອງມີແນວທາງນະໂຍບາຍອັນຖືກຕ້ອງຂອງພັກ-ລັດຖະບານຕື່ມອີກ. ດັ່ງຄອບຄົວ ທ່ານ ແອ ລັດສະໝີ ອາຍຸ 51 ປີ ປັດຈຸບັນຢູ່ບ້ານວຽງສະໄໝ ເມືອງກາສີ ແຂວງວຽງຈັນ ເຊິ່ງເປັນຄອບຄົວຕົວແບບດ້ານການປູກໝາກກ້ຽງນ້ອຍ ໄດ້ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນອົງຄະນະພັກ ເມືອງກາສີ ຄັ້ງທີ VIII  ທີ່ໄຂຂຶ້ນເມື່ອມໍ່ໆມານີ້ ເຊິ່ງທ່ານກໍ່ກໍາເນີດໃນຄອບຄົວທຸກຍາກ, ໃນປີ 1990 ໄດ້ແຕ່ງງານກັບນາງມີ, ມີລູກຮ່ວມກັນ 3 ຄົນ, ຍິງ 2 ຄົນ ນັບແຕ່ໄດ້ສ້າງຄອບຄົວເປັນຕົ້ນມາຄອບຄົວແມ່ນ ຂາດເນື້ອທີ່ການຜະລິດອາໄສເຮັດນຳພໍ່ແມ່ເນື້ອທີ່ກໍ່ມີໜ້ອຍ. ມາຮອດ ປີ 2013 ໄດ້ເລີ່ມປູກໝາກກ້ຽງ 600 ຕົ້ນ ໃນເນື້ອທີ່ປະມານ 1,5 ເຮັກຕາຜ່ານການຕິດຕາມຕົ້ນໝາກກ້ຽງເຫັນວ່າມີຄວາມເຕີບໂຕໄວໃນປີ 2014 ຈຶ່ງໄດ້ເອົາແກ່ນໝາກກ້ຽງມາກ້າໄວ້ປູກເອງຕໍ່ຈາກນັ້ນມາ ຄອບຄົວແມ່ນທັງກ້າເບ້ຍ ແລະ ປູກເພີ່ມມາເລື້ອຍໆ.

   ມາຮອດ ປີ 2018 ໝາກກ້ຽງຕົ້ນທີ່ປູກກ່ອນ ເລີ່ມເປັນໝາກ ແລະ ສາມາດເກັບຂາຍໄດ້ເງິນ 20 ລ້ານກີບ ເຊິ່ງຕົນເອງໄດ້ເອົາເງິນຈຳນວນດັ່ງກ່າວມາຊ້ືລົດຊ້ິງ 1 ຄັນ ມູນຄ່າ 15 ລ້ານກີບ ສ່ວນເງິນທ່ີເຫລືອແມ່ນເອົາມາພັດທະນາຄອບຄົວ ແລະ ສົ່ງໃຫ້ລູກຢູ່ທາງບ້ານ. ຮອດປີ 2019-2020 ໄລຍະ 2 ປີນ້ີ ເຫັນວ່າໝາກກ້ຽງເປັນໝາກຫລາຍສົມຄວນແຕ່ເກີດພະຍາດໂຄວິດ-19 ລະບາດ ເຮັດໃຫ້ໝາກກ້ຽງບ່ໍໄດ້ຂາຍ, ໄລຍະ 2 ປີ ຂາຍໝາກ ກ້ຽງໄດ້ແຕ່ 73 ລ້ານກີບເທົ່ານັ້ນເຮັດໃຫ້ໝາກກ້ຽງຫລົ່ນຖິ້ມຄາຕົ້ນ. ມາຮອດປີ 2021 ສາມາດເກັບໝາກກ້ຽງຂາຍໄດ້ 110 ລ້ານກີບ ແລ້ວນໍາເອົາເງິນໄປປຸກເຮືອນ 1 ຫລັງມູນຄ່າ 90 ລ້ານກີບ ຈໍານວນໜຶ່ງແມ່ນໄປຊື້ດິນເພື່ອຂະຫຍາຍສວນໝາກກ້ຽງຕື່ມ.

     ຂະນະທ່ີປີ 2022 ຂາຍໝາກກ້ຽງໄດ້ 200 ລ້ານກີບ, ປີ 2023 ຂາຍໄດ້ 320 ລ້ານກີບ ພ້ອມນີ້, ໄດ້ຊື້ລົດຮຸນໄດ 1 ຄັນ, ລົດຈັກອີກ 3 ຄັນ, ຊື້ດິນນາ 2 ຕອນ ແລະ ໄປບຸກເບີກເນື້ອທີ່ນາ 1 ເຮັກຕາ, ຊື້ງົວມາລ້ຽງ 12 ໂຕ. ປັດຈຸບັນເຮັດໃຫ້ຄອບຄົວມີເງິນເກັບຈຳນວນໜຶ່ງ, ມີເນື້ອທີ່ດິນທັງໝົດ 7,5 ເຮັກຕາ ແລະ ມີຕົ້ນໝາກກ້ຽງປະມານ 2.800 ກວ່າຕົ້ນ ໃນເນື້ອທີ່ 4,5 ເຮັກຕາ ເຊິ່ງລາຍຮັບທີ່ໄດ້ຈາກການຂາຍໝາກກ້ຽງ 300 ລ້ານກວ່າກີບຕໍ່ປີ ແລະ ລາຍຮັບຈາກການຂາຍງົວອີກຈໍານວນໜຶ່ງ ເຮັດຄອບຄົວໄດ້ຫລຸດພົ້ນອອກຈາກຄວາມທຸກຍາກຢ່າງສິ້ນເຊີງ ໂດຍມີເຮືອນຢູ່ແໜ້ນໜາຖາວອນ, ມີລົດຈັກ, ລົດໃຫຍ່, ມີສວນ, ມີນາເຮັດກິນໃນແຕ່ລະປີ, ມີເງິນເກັບຈໍານວນໜຶ່ງ ເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນກວ່າເກົ່າ.

KPL