ຂປລ
ໃນຕອນເຊົ້າວັນທີ 28 ກັນຍາ 2026, ກອງປະຊຸມຄົບຄະນະວິສາມັນ ຂອງຄະນະບໍລິຫານງານສູນກາງພັກ ສະໄໝທີ XII ໄຂຂຶ້ນຢ່າງເປັນທາງການ ທີ່ສໍານັກງານສູນກາງພັກ ພາຍໃຕ້ການເປັນປະທານຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ.
ຂປລ.ກອງປະຊຸມວິສາມັນຄັ້ງນີ້, ໄຂຂຶ້ນໃນຂະນະທີ່ສະພາບແວດລ້ອມສາກົນ ຍັງສືບຕໍ່ບໍ່ມີຄວາມແນ່ນອນ, ບັນຫາໄພທໍາມະຊາດທີ່ນັບມື້ນັບຮຸນແຮງຂ້ຶນ, ສະພາບຄວາມເຄ່ັງຕຶງ, ຈຸດເຄັ່ງຮ້ອນຢູ່ຫລາຍພາກພື້ນຂອງໂລກ ສືບຕໍ່ເປັນສິ່ງທ້າທາຍ ແລະ ກະທົບຕໍ່ສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ເສດຖະກິດຂອງໂລກ. ຢູ່ພາຍໃນປະເທດກຳລັງຜະເຊີນໜ້າກັບສິ່ງທ້າທາຍ ແລະ ທົດສອບຫລາຍປະການໃຫ້ແກ່ການນໍາພາ - ຊີ້ນໍາຂອງສູນກາງພັກ ກໍຄື ການຄຸ້ມຄອງ-ບໍລິຫານຂອງລັດ ເພື່ອການແກ້ໄຂບັນຫາຕ່າງໆ ເປັນຕົ້ນບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ໄພນໍ້າຖ້ວມຢູ່ຫລາຍທ້ອງຖ່ິນ ໄດ້ສົ່ງຜົນກະທົບຮ້າຍແຮງຕໍ່ຊີວິດ ແລະ ຊັບສິນຂອງປະຊາຊົນ, ສ້າງຄວາມເສຍຫາຍຕໍ່ພື້ນຖານເສດຖະກິດ, ການແພ່ລະບາດຂອງພະຍາດອະຫິວາໝູອາຟຣິກາ ຊຶ່ງໄດ້ສົ່ງຜົນກະທົບຕໍ່ການພັດທະນາ, ການຜະລິດ-ທຸລະກິດໃນວົງກວ້າງ. ການບຸກລຸກ ແລະ ລັກລອບຂຸດຄົ້ນຊັບພະຍາກອນທໍາມະຊາດ, ກຸ່ມແກ້ງສໍ້ໂກງທາງໂທລະຄົມມະນາຄົມ (ສະແກັມເມີ, ຄໍເຊັນເຕີ) ບັນຫາອາວຸດເຖື່ອນ, ລົດເຖື່ອນ, ຢາເສບຕິດ, ການກໍ່ອາຊະຍາກໍາ ແລະ ປະກົດການຫຍໍ້ທໍ້ຕ່າງໆໃນສັງຄົມ ກໍຍັງແຜ່ລາມ ແລະ ຍັງບໍ່ສາມາດແກ້ໄຂໄດ້ໃຫ້ຂາດຕົວເທື່ອ. ທັງໝົດນັ້ນ, ໄດ້ສົ່ງຜົນກະທົບເຮັດໃຫ້ຊີວິດການເປັນຢູ່ ຂອງປະຊາຊົນ, ພະນັກງານ, ທະຫານ, ຕໍາຫລວດ ມີຄວາມຫຍຸ້ງຍາກ-ຝືດເຄືອງຫລາຍສົມຄວນ.
ກອງປະຊຸມດັ່ງກ່າວ ຈະໄດ້ດຳເນີນໃນລະຫວ່າງວັນທີ 28 ກັນຍາ ຫາ 2 ຕຸລາ 2026 ຊຶ່ງຈະໄດ້ຮັບຟັງການລາຍງານ, ຄົ້ນຄວ້າ, ປຶກສາຫາລື ແລະ ໃຫ້ທິດຊີ້ນຳຕໍ່ເນື້ອໃນເອກະສານສຳຄັນຈຳນວນໜຶ່ງ ເພື່ອເປັນການຜັນຂະຫຍາຍເນື້ອໃນມະຕິກອງປະຊຸມໃຫຍ່ ຄັ້ງທີ XII ຂອງພັກ ເປັນຕ້ົນການປັບປຸງ ແລະ ພັດທະນາບັນດາພາກສ່ວນເສດຖະກິດ ຕາມທິດສ້າງເສດຖະກິດເອກະລາດ ເປັນເຈົ້າຕົນເອງ; ການຍົກສູງຄຸນນະພາບ ຂອງຊັບພະຍາກອນມະນຸດ ຕອບສະໜອງໃຫ້ແກ່ການພັດທະນາໃນເງື່ອນໄຂໃໝ່; ນະໂຍບາຍນໍາໃຊ້ປັນຍາຊົນໃນເງື່ອນໄຂໃໝ່. ນອກນັ້ນ, ຍັງຈະໄດ້ຮັບຟັງລັດຖະບານ ລາຍງານຄວາມຄືບໜ້າການແກ້ໄຂບັນຫາລົດເຖື່ອນ ແລະ ການລັກລອບຂຸດຄົ້ນຊັບພະຍາກອນທໍາມະຊາດ (ແຮ່ທາດ) ໃນຂອບເຂດທົ່ວປະເທດ ແລະ ປຶກສາຫາລືວຽກງານສຳຄັນຈຳນວນໜຶ່ງ. ໃນໂອກາດດ່ັງກ່າວ, ສະຫາຍ ທອງລຸນ ສີສຸລິດ ໄດ້ມີຄຳເຫັນ ແລະ ຮຽກຮ້ອງມາຍັງບັນດາສະຫາຍກໍາມະການສູນກາງພັກ ຈົ່ງຍົກສູງຄວາມຮັບຜິດຊອບການເມືອງ, ສຸມສະຕິປັນຍາເຂົ້າໃນການຄົ້ນຄວ້າ, ວິເຄາະ, ວິໄຈ ແຕ່ລະບັນຫາໃຫ້ເລິກເຊິ່ງ, ເສີມຂະຫຍາຍປະຊາທິປະໄຕ ປະກອບຄໍາເຫັນຢ່າງພາວະວິໄສ ເພື່ອໃຫ້ທິດຊີ້ນໍາຖືກເປົ້າໝາຍ; ສະເໜີວິທີການ ແລະ ມາດຕະການແກ້ໄຂບັນຫາໃຫ້ຖືກຕ້ອງ-ຈະແຈ້ງ ແລະ ເຊື່ອໝັ້ນວ່າ ກອງປະຊຸມສູນກາງຄົບຄະນະວິສາມັນຄັ້ງນີ້ ຈະເປັນກອງປະຊຸມແຫ່ງການເສີມຂະຫຍາຍປະຊາທິປະໄຕພາຍໃນພັກ, ການສະຫລຸບທິດສະດີ-ພຶດຕິກໍາ, ການບຸກເບີກ- ປະດິດສ້າງໃໝ່ ໃນການນໍາພາຂອງພັກ, ການບຸກທະລຸສ້າງການຫັນປ່ຽນທີ່ແຂງແຮງ ແລະ ຕັ້ງໜ້າ ໃນການນໍາພາຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກເຮົາໃຫ້ປະກົດຜົນເປັນຈິງ.
ພາບ: ປະຊາຊົນ
KPL
