ຂປລ
ຄອບຄົວ ນາງ ຫລອຍມະນີ ໄຊຍະອິ້ວ ຢູ່ບ້ານດາກຢອຍ ເມືອງ ດາກຈຶງ ແມ່ນນອນຢູ່ໃນກຸ່ມຜະລິດກາເຟປອດສານພິດຂອງໂຄງການຊຸບເປີວີ ຄອັບຟີ (Super we coffee) ເສີມສ້າງຄວາມເຂັ້ມແຂງໃຫ້ແກ່ແມ່ຍິງ ໂດຍຜ່ານລະບົບຕ່ອງໂສ້ມູນຄ່າເພ່ີມຂອງຜະລິດຕະພັນກາເຟທີ່ມີຈັນຍາບັນ ແລະ ເປັນມິດຕໍ່ສິ່ງແວດລ້ອມ.
*ຄອບຄົວ ນາງ ຫລອຍມະນີ ໄຊຍະອິ້ວ ຢູ່ບ້ານດາກຢອຍ ເມືອງ ດາກຈຶງ ແມ່ນນອນຢູ່ໃນກຸ່ມຜະລິດກາເຟປອດສານພິດຂອງໂຄງການຊຸບເປີວີ ຄອັບຟີ (Super we coffee) ເສີມສ້າງຄວາມເຂັ້ມແຂງໃຫ້ແກ່ແມ່ຍິງ ໂດຍຜ່ານລະບົບຕ່ອງໂສ້ມູນຄ່າເພ່ີມຂອງຜະລິດຕະພັນກາເຟທີ່ມີຈັນຍາບັນ ແລະ ເປັນມິດຕໍ່ສິ່ງແວດລ້ອມ, ເພື່ອເສີມສ້າງອາຊີບທີ່ຍືນຍົງໃຫ້ແກ່ປະຊາຊົນເຂດພູດອຍ ແລະ ສ້າງລາຍຮັບເພີ່ມຂຶ້ນ.
ນາງ ຫລອຍມະນີ ໄຊຍະອິ້ວ ໄດ້ເລົ່າສູ່ຟັງວ່າ: ຄອບຄົວຕົນເອງແມ່ນມີສະມາຊິກທັງໝົດ 5 ຄົນ, ຍິງ4 ຄົນ, ແຮງງານຫລັກ 3 ຄົນ ມີອາຊີບປູກກາເຟເປັນຕົ້ນຕໍ ໂດຍມີເນື້ອທີ່ການປູກກາເຟ 3 ເຮັກຕາ ເຊິ່ງຜ່ານມາການປູກກາເຟແມ່ນປູກແບບພື້ນບ້ານສ້າງລາຍຮັບໄດ້ໜ້ອຍ. ຍ້ອນພົບຄວາມຫຍຸ້ງຍາກ ແລະ ມີສິ່ງທ້າທາຍຫລາຍ ໂດຍສະເພາະແມ່ນສະພາບດິນຟ້າອາກາດມີການປ່ຽນແປງ, ຜົນຜະລິດບໍ່ໄດ້ຄຸນນະພາບເຮັດໃຫ້ລາຄາຕົກຕ່ຳ ແລະ ທັງບໍ່ສາມາດເຂົ້າເຖິງຕະຫລາດໄດ້ຢ່າງກວ້າງຂວາງ.
ມາໃນປີ 2017 ໄດ້ມີໂຄງການ ຊຸບເປີວີ ຄອັບຟີ ເຂົ້າມາຊຸກຍູ້ສະໜັບສະໜູນປະຊາຊົນເມືອງດາກຈຶງ ປູກກາເຟປອດສານພິດເປັນມິດຕໍ່ສິ່ງແວດລ້ອມ ແລະ ຄອບຄົວຕົນເອງກໍ່ໄດ້ເຂົ້າຮ່ວມໃນກຸ່ມການຜະລິດກາເຟຂອງບ້ານດາກຢອຍ ເປັນຕົ້ນມາ ໂດຍທາງໂຄງການໄດ້ຊ່ວຍຍົກລະດັບຄວາມຮູ້ດ້ານເຕັກນິກວິທີການປູກ, ການບົວລະບັດຮັກສາ, ການໃສ່ຝຸ່ນຊີວະພາບຈາກທຳມະຊາດ ໂດຍບໍ່ນຳໃຊ້ຝຸ່ນເຄມີ, ແນະນຳວິທີການເກັບກູ້, ຂັ້ນຕອນການຄັດເລືອກໝາກກາເຟ ແລະ ພ້ອມທັງສະໜອງວັດຖຸອຸປະກອນການຜະລິດຈຳນວນໜຶ່ງ ເຮັດໃຫ້ຄອບຄົວທີ່ເຂົ້າກຸ່ມດັ່ງກ່າວ ມີຜົນຜະລິດ ແລະ ລາຍຮັບດີຂຶ້ນ. ມາຮອດປີ 2023 ສະເພາະຄອບຄົວຂອງຕົນເອງແມ່ນສາມາດສ້າງລາຍຮັບເຂົ້າຄອບຄົວໄດ້ 50 ລ້ານກວ່າກີບ. ສຳລັບປີ 2024 ໄດ້ມີການຂະຫຍາຍເນື້ອທີ່ການຜະລິດເພີ່ມອີກ 1 ເຮັກຕາ ໂດຍປັດຈຸບັນແມ່ນກຳລັງຂຸ້ນຂ້ຽວເກັບກ່ຽວຜົນຜະລິດ.
ຂໍສະແດງຄວາມຂອບໃຈໂຄງການຊຸບເປີວີ ທີ່ໃຫ້ການສະໜັບສະໜູນກຸ່ມການຜະລິດບ້ານດາກຢອຍ ກໍ່ຄືເມືອງດາກຈຶງ ແຂວງເຊກອງ ພ້ອມທັງສະເໜີໃຫ້ໂຄງການສືບຕໍ່ຖອດຖອນບົດຮຽນຄວາມຮູ້ໃໝ່ໃຫ້ກຸ່ມຜະລິດກາເຟຂອງບ້ານດາກຢອຍ ເພື່ອເຮັດໃຫ້ການຜະລິດກາເຟພູດອຍດາກຈຶງ ມີຄຸນນະພາບສາມາດນຳໄປຂາຍອອກສູ່ຕະຫລາດພາຍໃນ ແລະ ຕ່າງປະເທດໄດ້ຕາມທິດສີຂຽວ ແລະ ຍືນຍົງ.
ໂດຍ: ຢ່າຕົ່ງ
KPL
