*ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ ໃນມື້ນີ້ (20/1/1949- 20/1/2025) ໄດ້ໝູນວຽນມາຮອດອີກເທື່ອໜຶ່ງ ເຊິ່ງທົ່ວພັກ-ລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດລ້ວນແຕ່ ໄດ້ສ້າງຜົນງານຂໍ່ານັບຮັບຕ້ອນ, ຊົມເຊີຍວັນສຳຄັນດັ່ງກ່າວ ຢ່າງເປັນຂະບວນຟົດຟື້ນມີຄວາມໝາຍເລິກເຊິ່ງ. ແນວໃດກໍ່ດີ ໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີນີ້, ໜັງສືພິມປະເທດລາວ ຂໍສະເໜີຜົນງານອັນພົ້ນເດັ່ນ ຂອງກະຊວງປ້ອງກັນປະເທດໃນໜຶ່ງປີຜ່ານມາ ໃຫ້ພວກເຮົາໄດ້ຮັບໄປພ້ອມໆກັນ ເພື່ອເປັນການຂໍ່ານັບ ຊົມເຊີຍວັນສ້າງຕັ້ງກອງທັບປະຊາຊົນລາວ ຢ່າງສຸດໃຈ.  

      ສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກ ລັດຖະມົນຕີກະຊວງປ້ອງກັນປະເທດ ໄດ້ໃຫ້ຮູ້ວ່າ: ໃນປີ 2024 ຜ່ານມາ, ຄະນະພັກ-ຄະນະນໍາກະຊວງປ້ອງກັນປະເທດໄດ້ຊີ້ນໍາ ແລະ ຈັດຕ້ັງເຊ່ືອມຊຶມ-ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິສະໄໝທີ V ຂອງອົງຄະນະພັກກະຊວງປ້ອງກັນປະເທດ ຢ່າງມີຈຸດສຸມ ແລະ ແທດກັບຕົວຈິງ, ມີໝາກຜົນໃນຫລາຍດ້ານ ເປັນຕົ້ນແມ່ນການເຮັດໜ້າທີ່ຮັກສາຄວາມສະຫງົບປອດໄພໃຫ້ການນໍາພັກ-ລັດ, ແຂກພາຍໃນ ແລະ ຕ່າງປະເທດ, ປ້ອງກັນບັນດາກອງປະຊຸມສໍາຄັນຕ່າງໆ, ບັນດາວັນບຸນປະຫວັດສາດທີ່ສໍາຄັນຂອງຊາດ, ຂອງພັກ, ຂອງກອງທັບ, ປ້ອງກັນສໍານັກງານອົງການ, ສະໜາມບິນ, ເສັ້ນທາງທຸລະກັນດານ, ບັນດາໂຄງການກ່ໍສ້າງຂອງລັດຖະບານໃຫ້ມີຄວາມສະຫງົບປອດໄພ 100%.

    ຜົນງານດັ່ງກ່າວ ແມ່ນຍ້ອນການຕັດສິນໃຈ, ເອົາໃຈໃສ່ຂອງອົງການ, ກົມກອງ-ທ້ອງຖິ່ນຕໍ່ໜ້າທີ່ການເມືອງຂອງຕົນໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກມີຜົນສໍາເລັດຫລາຍດ້ານ, ເຖິງວ່າສະພາບເສດຖະກິດ-ການເງິນມີຄວາມຫຍຸ້ງຍາກແຕ່ພະນັກງານ- ສະມາຊິກພັກຍັງມີແນວຄິດອຸ່ນອ່ຽນທຸ່ນທ່ຽງຫ້າວຫັນປະຕິບັດໜ້າທີ່ວຽກງານສະແດງອອກຫລາຍກົມກອງກຳລັງຫລວງ, ກຳລັງທ້ອງຖິ່ນຍັງສືບຕໍ່ສຸມໃສ່ເຄື່ອນໄຫວປະຕິບັດໜ້າທີ່ຢູ່ເຂດ ທຸລະກັນດານ-ຫ່າງໄກສອກຫລີກ, ຕັ້ງໜ້າບຸກບືນ, ຫ້າວຫັນເປັນແບບຢ່າງ, ຊີ້ນໍາ-ນໍາພາໃກ້ຊິດຕິດແທດ ແລະ ລົງເຮັດຕົວຈິງກັບອ້າຍນ້ອງດ້ວຍຄວາມຮັບຜິດຊອບສູງ ເຮັດສຳເລັດໜ້າທີ່ການເມືອງຂອງຕົນປະກອບສ່ວນໃນພາລະກິດປົກປັກຮັກສາ ແລະ ສ້າງສາພັດທະນາ ປະເທດຊາດ ໂດຍສະເພາະຮັບປະກັນໃຫ້ປະເທດຊາດມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ, ສ້າງເງື່ອນໄຂເອື້ອອໍານວຍໃຫ້ແກ່ການພັດທະນາເສດຖະກິດ-ສັງຄົມຂອງຊາດ, ສືບຕໍ່ຂະຫຍາຍຕົວຢ່າງຕໍ່ເນື່ອງ, ກອງທັບເຮົາຍັງມີຄວາມ ໜັກແໜ້ນມີຄວາມຈົ່ງຮັກພັກດີຕ່ໍພັກ, ຕໍ່ປະເທດຊາດ ແລະ ປະຊາຊົນຢ່າງສຸດໃຈ; ສືບຕ່ໍເປັນກຳລັງຫລັກແຫລ່ງໃນການປະຕິບັດແນວທາງ ປກຊ-ປກສ ທົ່ວປວງຊົນຮອບດ້ານຂອງພັກ.

   ສະຫາຍ ພົນໂທ ຄຳລຽງ ອຸທະໄກສອນ ກ່າວຕື່ມວ່າ: ສຳລັບປີນີ້ ຈະເພີ່ມທະວີຄວາມຮັບຜິດຊອບຕັ້ງໜ້າບຸກບືນເປັນເຈົ້າການໃນການແກ້ໄຂປະກົດການຫຍໍ້ທໍ້ຕ່າງໆ, ເອົາໃຈໃສ່ຈັດຕັ້ງປະຕິບັດແຜນວຽກຈຸດສຸມໃນປີ 2025 ໃຫ້ສໍາເລັດຕາມແຜນການ, ເຮັດໃຫ້ທຸກຂົງເຂດວຽກງານມີການຫັນປ່ຽນຢ່າງຕັ້ງໜ້າ ແລະ ໂດດເດັ່ນ. ສືບຕໍ່ເພີ່ມທະວີການຊີ້ນໍາ-ນໍາພາວຽກງານ ປກຊ-ປກສ, ຮັບປະກັນສະຖຽນລະພາບ ແລະ ຄວາມໝ້ັນຄົງຂອງປະເທດຊາດ. “ຕ້ອງຕັ້ງໜ້າຍົກສູງສະຕິສະກັດກັ້ນ ແລະ ຕ້ານທຸກກົນອຸບາຍລ່ຽມລາຍຂອງ ສັດຕູ, ທັບມ້າງຍຸດທະສາດຫັນປ່ຽນໂດຍສັນຕິຂອງອິດທິກຳລັງປໍລະປັກ, ເປັນເຈົ້າການໃນການປະຕິບັດແນວທາງ ປກຊ-ປກສ ທ່ົວປວງຊົນຮອບດ້ານຂອງພັກ, ປົກປັກຮັກສາລະບອບໃໝ່ ປະຊາທິປະໄຕ ປະຊາຊົນ ໄວ້ໃຫ້ໝັ້ນຄົງ”.

    ຮັບປະກັນໃຫ້ປະເທດຊາດ ມີສະຖຽນລະພາບທາງດ້ານການເມືອງ, ມີຄວາມສະຫງົບປອດໄພ ຢ່າງໜັກແໜ້ນດ້ວຍມາດຕະການ ຍຸດທະສາດສືບຕໍ່ຈັດຕັ້ງກຳລັງລົງກໍ່ສ້າງຮາກຖານການເມືອງ, ສ້າງທ່າສະໜາມ 3 ຂັ້ນຕິດພັນກັບວຽກງານ 3 ສ້າງ ໂດຍສຸມໃສ່ ບໍລິເວນຊາຍແດນ, ເຂດຫ່າງໄກສອກຫລີກ, ບັນດາຈຸດສຸມຂອງກະຊວງ; ສົມທົບແໜ້ນ 3 ດ້ານ ໄປພ້ອມໆກັນ (ດ້ານການເມືອງ, ເສດຖະກິດ ແລະ ການທະຫານ) ກັບການປັບປຸງລະບົບການຈັດຕັ້ງຢູ່ຮາກຖານໃຫ້ໜັກແໜ້ນເຂັ້ມແຂງໃນທຸກດ້ານ, ເອົາໃຈໃສ່ຍົກ ສູງສະຕິລະວັງຕົວ, ກຽມພ້ອມສູ້ຮົບ, ເດັດດ່ຽວຕອບຕ້ານທຸກການເຄື່ອນໄຫວຂອງສັດຕູຢ່າງທັນການ; ສຸມໃສ່ແກ້ໄຂເຂດທີ່ຍັງບໍ່ມີຄວາມສະຫງົບ, ໜໍ່ແໜງທີ່ຈະພາໃຫ້ເກີດຄວາມບໍ່ສະຫງົບ ແລະ ມີມາດຕະການແກ້ໄຂຄ່ອງແຄ້ວເດັດຂາດ.

    ໃນນ້ີ ໃຫ້ສຸມໃສ່ບາງຈຸດຂອງແຂວງເຂດໃຈກາງ; ສືບຕໍ່ປະຕິບັດມາດຕະການຍຸດທະສາດຫັນລົງຮາກຖານ “ປະຕິບັດ 4 ເນື້ອໃນ 4 ຄາດໝາຍ, ຈັດຕັ້ງກໍາລັງປະຈຳຢູ່ແຕ່ລະບ້ານ, ປັບປຸງອົງການປົກ ຄອງຂັ້ນຮາກຖານໃຫ້ໜັກແໜ້ນເຂັ້ມແຂງ, ເອົາໃຈໃສ່ວຽກງານສຶກສາອົບຮົມການເມືອງແນວຄິດໃຫ້ເລິກເຊິ່ງແທດເຖິງແຕ່ລະເປ້ົາໝາຍ, ຕ້ັງໜ້າສຶກສາອົບຮົມການເມືອງ-ແນວຄິດ, ອົບຮົມທາດແທ້ມູນເຊື້ອກອງທັບປະຕິວັດ, ກອງທັບປະຊາຊົນໃນເງື່ອນໄຂໃໝ່ໃຫ້ດີຕິດພັນກັບການເກັບກຳສະພາບການເມືອງ-ແນວຄິດຂອງພະນັກງານ-ນັກຮົບທົ່ວກອງທັບ; ສຸມໃສ່ຈັດຕັ້ງຜັນຂະຫຍາຍບັນດາມະຕິຂອງສູນກາງພັກ, ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງປ້ອງກັນປະເທດໃຫ້ເລິກເຊິ່ງ ແລະ ທົ່ວເຖິງ, ການສຶກສາອົບຮົມການເມືອງແນວຄິດຕ້ອງແຫລມຄົມ, ເຮັດດ້ວຍຫລາຍຮູບຫລາຍສີ, ຫລາຍວິທີການ ແລະ ມີເນື້ອໃນອຸດົມສົມບູນເພື່ອສ້າງ ຄວາມຮັບຮູ້-ເຂົ້າໃຈຕໍ່ແນວທາງນະໂຍບາຍ, ລະບຽບກົດໝາຍຂອງພັກ-ລັດຢ່າງເລິກເຊິ່ງ, ແທດເຖິງ ແລະ ສ້າງໃຫ້ມີການປ່ຽນແປງຢ່າງແທ້ຈິງ; ພ້ອມນັ້ນຕ້ອງຍູ້ຂະບວນການ ເພື່ອຂໍ່ານັບຮັບຕ້ອນວັນບຸນສໍາຄັນຕ່າງໆຂອງຊາດໃຫ້ມີຂະບວນການກວ້າງຂວາງ ແລະ ມີບັນຍາກາດຟົດຟື້ນ-ຕໍ່ເນື່ອງ, ຕັ້ງໜ້າປັບປຸງກໍ່ສ້າງກອງທັບໃຫ້ເຂັ້ມແຂງຮອບດ້ານ, ເພ່ີມທະວີການນໍາພາຂອງພັກຕໍ່ກຳລັງປະກອບອາວຸດຕິດພັນກັບການສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ, ສ້າງກົມກອງ 3 ປອດ, ກົມກອງ-ນັກຮົບວັດທະນະທໍາໃຫ້ມີຄຸນນະພາບ, ສ້າງພະນັກງານສືບທອດປ່ຽນແທນໃຫ້ຄົບເງື່ອນໄຂມາດຖານ ແລະ ເອົາໃຈໃສ່ຈັດຕັ້ງໃຫ້ຕໍ່ເນື່ອງ ແລະ ອື່ນໆ.

KPL