ຂປລ
ທ່ານ ໄຊຍະບັດ ຊຸມມະນີວົງ ຮອງເຈົ້າເມືອງສັງທອງ ຜູ້ຊີ້ນໍາວຽກງານວັດທະນະທໍາສັງຄົມ ໄດ້ຖະແຫລງຂ່າວໃຫ້ຮູ້ວ່າ: ເມືອງສັງທອງ ຂອງພວກເຮົາໄດ້ກໍານົດເອົາ 21-23 ມັງກອນ 2025 ເຊິ່ງກົງກັບມື້ແຮມ 8 ຄໍ່າ ເດືອນ 2 ລາວ ພສ 2567 ເປັນມື້ຈັດບຸນ ກອງເຂົ້າຫອມ.
*ທ່ານ ໄຊຍະບັດ ຊຸມມະນີວົງ ຮອງເຈົ້າເມືອງສັງທອງ ຜູ້ຊີ້ນໍາວຽກງານວັດທະນະທໍາສັງຄົມ ໄດ້ຖະແຫລງຂ່າວໃຫ້ຮູ້ວ່າ: ເມືອງສັງທອງ ຂອງພວກເຮົາໄດ້ກໍານົດເອົາ 21-23 ມັງກອນ 2025 ເຊິ່ງກົງກັບມື້ແຮມ 8 ຄໍ່າ ເດືອນ 2 ລາວ ພສ 2567 ເປັນມື້ຈັດບຸນ ກອງເຂົ້າຫອມໃນວັນທີ 21 ເປັນມື້ເປີດງານ ວັນທີ 23 ເປັນມື້ໃສ່ບາດພະສົງ 9 ອົງ ຕິດພັນກັບງານຕະຫລາດນັດວາງສະແດງ ແລະ ຂາຍສິນຄ້າປະຈໍາປີຂຶ້ນຢູ່ທີ່ບ້ານ ເພຍລາດ ເມືອງສັງທອງ ນະຄອນຫລວງວຽງຈັນ.
ການຈັດງານຄັ້ງນີ້ ກໍ່ເພື່ອເປັນການອະນຸລັກຮັກສາວັດທະນະທໍາອັນເກົ່າແກ່ ແລະ ກໍ່ເປັນການສຶກສາອົບຮົມປູກຈິດສໍານຶກຖັນແຖວຊາວໜຸ່ມເຍົາວະຊົນ, ອະນຸຊົນໃຫ້ມີຄວາມສາມັກຄີມີນໍ້າໃນຮັກເຊື້ອແພງຊາດ ຮັກບ້ານເກີດເມືອງນອນ ຮັບຮູ້ເຂົ້າໃຈກ່ຽວກັບແຜນການດໍາລົງຊີວິດຂອງປະຊາຊົນບັນດາເຜົ່າໃນເມື່ອກ່ອນໂດຍມີການສົມທົບກັບປັດຈຸບັນ. ກິດຈະກໍາໃນວັນບຸນດັ່ງກ່າວ ຈະມີກ້ອນກໍາລັງແຫ່ຕິດຕໍ່ກັນ 6 ຂະບວນເຊັ່ນ: ຂະບວນການນໍາຂັ້ນສູນກາງ ແລະ ທ້ອງຖິ່ນ (ຖືໝາກເບັງ ແລະ ກັນຕົ້ນ) ຂະບວນຊາວ ໜຸ່ມ-ເຍົາວະຊົນ, ຂະບວນກໍາລັງ ປກຊ-ປກສ, ຂະບວນສີລະປະຂະບວນຂອງມວນຊົນ.
ຫລັງຈາກນັ້ນ ບັນດາທ່ານຍັງ ຈະໄດ້ທ່ຽວຊົມກອງເຂົ້າຫອມສັງທອງ ຈໍານວນ 5 ກອງ (ກອງໃຫຍ່ 1 ກອງ ກວ້າງ 4 ແມັດ ສູງ 4 ແມັດ, ກອງນ້ອຍ 4 ກອງ ກວ້າງ 175 ແມັດ ສູງ 2 ແມັດ) ປະກອບກັບອຸປະກອນການຜະລິດຫລາກຫລາຍສີສັນ, ມີວາງສະແດງ ແລະ ຂາຍສິນຄ້າຂອງປະຊາຊົນມາຈາກພາກສ່ວນຕ່າງໆ. ໃນຕອນທ້າຍຈະໄດ້ຮັບຊົມການສະແດງສິລະປະ-ວັນນະຄະດີ ຈໍານວນ 3 ລາຍການ, ມີການແຂ່ງຂັນສີລະປະຂອງຊາວໜຸ່ມ ແລະ ເຍົາວະຊົນ. ນອກຈາກນີ້, ພາຍໃນງານຈະໄດ້ມີການຄັດເລືອກນາງສາວງາມເຂົ້າຫອມສັງທອງ ແລະ ແຂ່ງຂັນອາຫານພື້ນບ້ານທີ່ປຸງແຕ່ງຈາກປະຊາຊົນ ຂອງບັນດາບ້ານຕ່າງໆພາຍໃນເມືອງສັງທອງ.
KPL
