ຂປລ. ຫ້ອງການເມືອງ ໂຮງຮຽນວັດທະນະທຳຊົນເຜົ່າກອງທັບ (ຮວຜທ) ຈັດກອງປະຊຸມສະຫລຸບວຽກງານຮອບດ້ານ ປະຈຳປີ 2024 ແລະ ວາງທິດທາງແຜນການ ປີ 2025 ໃນວັນທີ 19 ທັນວາ 2024 ໂດຍການເປັນປະທານຂອງ ສະຫາຍ ພັນເອກ ສັງທອງ ສຸກສີສະຫວາດ ຫົວໜ້າຫ້ອງສຶກສາ ໂຮງຮຽນວັດທະນະທຳຊົນເຜົ່າກອງທັບ, ມີ ຄະນະຫ້ອງ 4 ຫ້ອງ, 2 ກອງພັນ, ພະນັກງານ-ນັກຮົບ ທົ່ວຫ້ອງການເມືອງ ເຂົ້າຮ່ວມ.

ສະຫາຍ ພັນຕີ ອຸໄລກອນ ກົມມະເມືອງ ຮອງຫົວໜ້າຫ້ອງການເມືອງ ໄດ້ຍົກໃຫ້ເຫັນຜົນງານຫລາຍດ້ານທີ່ພົ້ນເດັ່ນ. ໃນນີ້, ໄດ້ເອົາໃຈໃສ່ສຶກສາອົບຮົມການເມືອງນຳພາແນວຄິດ ໃຫ້ພະນັກງານ-ນັກຮົບ ເຂົ້າໃຈຮັບຮູ້ເຊື່ອມຊຶມບັນດາ ເອກກະສານມູນເຊື້ອຕ່າງໆຂອງພັກ, ຂອງກອງທັບ ແລະ ແນວທາງນະໂຍບາຍຂອງພັກ ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກ. ນອກນີ້, ຍັງໄດ້ຫັນລົງກໍ່ສ້າງຮາກຖານ ການເມືອງຕາມຂອບເຂດກົມກອງຮັບຜິດຊອບ ມີຄວາມສະຫງົບໂດຍພື້ນຖານ; ວຽກງານຈັດຕັ້ງພັກໄດ້ເຄື່ອນໄຫວຕາມພາລະບົດບາດຢ່າງແຂງແຮງ ເຮັດໃຫ້ວຽກງານ ພັກສາມາດເຄື່ອນໄຫວ ໄດ້ຕາມແຜນການທີ່ວາງໄວ້; ວຽກງານພະນັກງານ ສາມາດເກັບກຳສະຖິຕິປະຫວັດພະນັກງານໄດ້ທັງໝົດ 258 ສະຫາຍ, ຍິງ 64 ສະຫາຍ; ເປັນເຈົ້າການເຜີຍແຜ່ເຊື່ອມຊຶມກຳແໜ້ນນະໂຍບາຍຂອງພັກ-ລັດ, ບັນດາມູນເຊື້ອ ນິຕິກຳຕ່າງໆ, ເຄື່ອນໄຫວຢ່າງຕັ້ງໜ້າໃນການໂຄສະນາເຜີຍແຜ່ບັນດານິຕິກຳຂອງກອງທັບ ກໍຄື ຂອງໂຮງຮຽນ; ສະເໜີຈົດປະຫວັດສ້າງຄອບຄົວໃໝ່, ປະຕິບັດນະໂຍບາຍເຈັບເປັນ ຄອບຄົວ, ພໍ່-ແມ່ ນາຍ ແລະ ພົນທະຫານທີ່ເສຍຊີວິດ ຈຳນວນ 7 ສະຫາຍ ລວມເປັນເງິນ ເກືອບ 13 ລ້ານກີບ. ສ່ວນວຽກງານຊາວໜຸ່ມ ໄດ້ຕັ້ງໜ້າເຄື່ອນໄຫວຕາມພາລະບົດບາດໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງຊາວໜຸ່ມວາງອອກ ແລະ ສ້າງແຜນການເຄື່ອນໄຫວ ກິດຈະກຳແຂ່ງຂັນກິລາ, ອອກແຮງງານລວມ ຢ່າງເປັນປົກກະຕິ; ວຽກງານສະຫະພັນແມ່ຍິງ ໄດ້ສົມທົບກັບອົງການຈັດຕັ້ງຊາວໜຸ່ມ ຈັດຕັ້ງຂະບວນການຕ່າງໆ, ນຳພາເອື້ອຍນ້ອງສະຫະພັນແມ່ຍິງ ຝຶກຊ້ອມຟ້ອນລຳວົງ ແລະ ເຂົ້າຮ່ວມວຽກງານຕ່າງໆ. ນອກນີ້, ຍັງມີວຽກງານອື່ນໆ ປິ່ນອ້ອມກົມກອງກໍມີຜົນສຳເລັດເປັນຢ່າງສູງ.

ໂອກາດນີ້, ສະຫາຍ ພັນເອກ ສັງທອງ ສຸກສີສະຫວາດ ໄດ້ຍ້ອງຍໍຊົມເຊີຍຜົນສຳເລັດໃນການການປະຕິບັດເຄື່ອນໄຫວວຽກງານທີ່ຜ່ານມາ, ພ້ອມທັງເນັ້ນໃຫ້ ຄະນະພັກ-ຄະນະບັນຊາ ຫ້ອງການເມືອງ ເອົາໃຈໃສ່ຢ່າງຕັ້ງໜ້າໃນ ການເພີ່ມທະວີບົດບາດການນຳພາ ແລະ ສຶກສາອົບຮົມການເມືອງນຳພາແນວຄິດ ໃຫ້ພະນັກງານ ນັກຮົບຢ່າງຕໍ່ເນື່ອງ, ສຸມສະຕິປັນຍາ, ພາລະກຳລັງ, ຄວາມຮູ້ຄວາມສາມາດ ເຂົ້າໃນການເຄື່ອນໄຫວຈັດຕັ້ງປະຕິບັດ ແນວທາງນະໂຍບາຍຂອງພັກ-ລັດ ປະຕິບັດຄຳສັ່ງຂອງຂັ້ນເທິງຢ່າງເຂັ້ມງວດ, ເຮັດວຽກແບບລວມສູນປະຊາທິປະໄຕ ຖືກຕ້ອງສອດຄ່ອງກັບວິທະຍາສາດ, ມີຄວາມສາມັກຄີພາຍໃນ ໃຫ້ແໜ້ນແຟ້ນ, ຕ້ານສະກັດກັ້ນ ປະກົດການຫຍໍ້ທໍ້ ທີ່ຈະເກີດຂຶ້ນໃຫ້ທັນເວລາ, ປະກອບສ່ວນຢ່າງຕັ້ງເຂົ້າໃນ ທຸກຂະບວນການຂອງກົມກອງ, ພ້ອມກັນນຳເອົາເນື້ອໃນກອງປະຊຸມ ໄປຈັ້ງຕັ້ງຜັນຂະຫຍາຍໃຫ້ເກີດ ດອກອອກຜົນ ແລະ ເປັນຮູບປະທຳຕົວຈິງ.

ຂ່າວ: ໂອລິນ ມິ່ງມີໄຊ

KPL