ຂປລ
ໃນວັນທີ 15 ທັນວາ 2024 ຜ່ານມານີ້, ທີ່ສະໜາມກິລາ ແຂວງສາລະວັນ ໄດ້ມີການແຂ່ງຂັນຊີງຫລຽນ 5 ລາຍການ.
*ໃນວັນທີ 15 ທັນວາ 2024 ຜ່ານມານີ້, ທີ່ສະໜາມກິລາ ແຂວງສາລະວັນ ໄດ້ມີການແຂ່ງຂັນຊີງຫລຽນ 5 ລາຍການຄື: ແລ່ນ-ລານ 5.000 ແມັດຊາຍ, 3.000 ແມັດຍິງ, ຊັດຫລາວ, ເຕັ້ນສູງ ແລະ ທີມປະສົມ 4x100 ເຊິ່ງມີນັກກິລາເຂົ້າຮ່ວມຈາກ 18 ແຂວງທົ່ວປະເທດໃນການແຂ່ງຂັນ.
ຜ່ານການແຂ່ງຂັນຜົນປະກົດວ່າ ນະຄອນຫລວງວຽງຈັນ ສາມາດຍາດມາໄດ້ 3 ຫລຽນຄຳ, 3 ຫລຽນເງິນ ແລະ 1 ຫລຽນທອງ. ໃນນີ້,3 ຫລຽນຄຳ ໄດ້ຈາກປະເພດກິລາເຕັ້ນສູງ ທ້າວ ກັນຍາ ຈັນທະວົງ ເຕັ້ນໄດ້ 1,65 ແມັດ, ຊັດຫລາວຈາກ ທ. ຊາດກາ ອິນທະ ວົງ ຊັດໄດ້ 41,66 ແມັດ ແລະ ແລ່ນປະສົມຍິງ-ຊາຍ 4x100 ຈາກ ນ. ໃບຕ້ອງ ຫານຊະນະ, ນ.ອັກສອນ ກຳແກ້ວ, ທ. ອານຸສິດ ແກ້ວວິໄລ, ທ. ອາທິດ ແກ້ວສີຫລວງລາດ. ສ່ວນຫລຽນເງິນໄດ້ມາຈາກ ນ. ປານເດືອນ ໄຊຍະວົງ ແລ່ນ 3000 ແມັດ, ນ. ແພໄມຄຳ ຊຳວັນ ຊັດຫລາວຍິງ ແລະ ເຕັ້ນສູງຍິງ ຈາກ ນ. ຕິງ ພອນໃຈຊໍາ. ຂະນະທີ່ 1 ຫລຽນທອງ ໄດ້ມາຈາກ ນ. ພຸດທະສອນ ສີສະຫວ່າງອ່ອນ ກິລາເຕັ້ນສູງເຊັ່ນດຽວກັນ. ຢ່າງໃດກໍ່ຕາມມາຮອດວັນທີ 15 ທັນວາ 2024 ຄະນະນັກກິລານັກຮຽນມັດທະຍົມສຶກສາ ຈາກນະຄອນຫລວງວຽງຈັນ ຍາດໄດ້ 4 ຫລຽນຄຳ, 4 ຫລຽນເງິນ ແລະ 2 ຫລຽນທອງ.
ສຳລັບການແຂ່ງຂັນກະຕໍ້ປະເພດທີມຄູ່ຊຸດຊາຍ ຮອບຊີງຫລຽນຄຳ ໃນວັນທີ 15 ທັນວາ 2024 ເຊິ່ງພົບກັນລະຫວ່າງ ແຂວງຄຳມ່ວນ ແລະ ແຂວງສະຫວັນນະເຂດ. ຜ່ານການແຂ່ງຂັນຜົນປະກົດວ່າ ແຂວງຄຳມ່ວນຫລິ້ນໄດ້ດີກວ່າ ສາມາດເອົາຊະນະໄປໄດ້ 2-1 ເຊັດ ຍາດຫລຽນຄຳໄປຄອງໄດ້ສຳເລັດ. ຂະນະທີ່ແຂວງສະຫວັນນະເຂດ ໄດ້ຫລຽນເງິນ. ສ່ວນຫລຽນທອງຮ່ວມໄດ້ແກ່ແຂວງສາລະວັນ ເຈົ້າພາບ ແລະ ແຂວງຈຳປາສັກ.
ສຳລັບການແຂ່ງຂັນກະຕໍ້ທີມຍິງ 4 ຄົນ ກໍ່ມີຂຶ້ນໃນວັນດຽວກັນ ໂດຍການພົບກັນລະຫວ່າງ ແຂວງບໍລິຄຳໄຊ ແລະ ແຂວງສະຫວັນນະເຂດ. ຜ່ານການແຂ່ງຂັນຜົນປະກົດວ່າ ແຂວງບໍລິຄຳໄຊ ຫລິ້ນໄດ້ດີກວ່າ ເອົາຊະນະໄປໄດ້ແບບສະບາຍ 2-0 ເຊັດ ຍາດຫລຽນຄຳໄປຄອງ ແລະ ຫລຽນເງິນຕົກເປັນຂອງດແຂວງສະຫວັນນະເຂດ. ສ່ວນຫລຽນທອງຮ່ວມໄດ້ແກ່ນະຄອນຫລວງວຽງຈັນ ແລະ ແຂວງຄຳມ່ວນ.
ພາບ-ຂ່າວ: ຢ່າຕົ່ງ
KPL
