ຂປລ
ຂປລ. ຫລາຍກວ່າໜຶ່ງສ່ວນສາມຂອງຄູ ໃນ ສປປ ລາວ ສອນຫ້ອງຄວບ ທີ່ມີນັກຮຽນສອງຂັ້ນຮຽນຂຶ້ນໄປ ຮຽນຮ່ວມກັນໃນຫ້ອງຮຽນດຽວ ຊຶ່ງອາດເປັນສິ່ງທ້າທາຍ ແລະ ຮຽກຮ້ອງ ໃຫ້ຄູປັບບົດຮຽນ ຂອງເຂົາເຈົ້າ ພ້ອມທັງຕ້ອງແບ່ງ ຄວາມເອົາໃຈໃສ ຕໍ່ທຸກຂັ້ນຮຽນໃນຫ້ອງຮຽນໃຫ້ທົ່ວເຖິງ.
ຂປລ. ຫລາຍກວ່າໜຶ່ງສ່ວນສາມຂອງຄູ ໃນ ສປປ ລາວ ສອນຫ້ອງຄວບ ທີ່ມີນັກຮຽນສອງຂັ້ນຮຽນຂຶ້ນໄປ ຮຽນຮ່ວມກັນໃນຫ້ອງຮຽນດຽວ ຊຶ່ງອາດເປັນສິ່ງທ້າທາຍ ແລະ ຮຽກຮ້ອງ ໃຫ້ຄູປັບບົດຮຽນ ຂອງເຂົາເຈົ້າ ພ້ອມທັງຕ້ອງແບ່ງ ຄວາມເອົາໃຈໃສ ຕໍ່ທຸກຂັ້ນຮຽນໃນຫ້ອງຮຽນໃຫ້ທົ່ວເຖິງ. ໃນຂະນະທີ່ຕ້ອງຮັບປະກັນ ໃຫ້ນັກຮຽນທຸກຄົນ ມີສ່ວນຮ່ວມໃນ ຂະບວນການຮຽນຮູ້ ແລະ ສາມາດບັນລຸຜົນການຮຽນຕາມເປົ້າໝາຍ ພ້ອມນີ້, ຫ້ອງຄວບຍັງສາມາດເປັນສະພາບແວດລ້ອມ ທີ່ເຕັມໄປດ້ວຍຄວາມຮູ້ ແລະ ສົ່ງເສີມການຮຽນຮູ້ ເນື່ອງຈາກມີ ນັກຮຽນທີ່ມີອາຍຸ ແລະ ຂັ້ນຮຽນຕ່າງກັນ ທີ່ຈະສາມາດແບ່ງປັນປະສົບການ ການຮຽນຮູ້ ໂດຍອີງໃສ່ຄວາມຮູ້ ແລະ ປະສົບການຂອງເດັກແຕ່ລະຄົນ.
ທີມງານໂທລະພາບ, ວິທະຍຸ ແລະ ໜັງສືພິມ ຈາກສູນໂຄສະນາຂ່າວສານການສຶກສາ ແລະ ກິລາ (ສຄຂ) ຮ່ວມກັບ ສະຖາບັນຄົ້ນຄວ້າວິທະຍາສາດ ການສຶກສາ (ສວສ) ໂດຍໄດ້ຮັບການ ສະໜັບສະໜູນຈາກ ລັດຖະບານອົດສະຕຣາລີ ແລະ ອົງການພັດທະນາສາກົນ ປະເທດສະຫະລັດອາເມຣິກາ ໂດຍຜ່ານແຜນງານບີຄວາ ສ້າງສາລະຄະດີ ຄູຕົວແບບ ຕອນໃໝ່ ໄດ້ເດີນທາງໄປບ້ານແຫ່ງໜຶ່ງທີ່ຢູ່ເຂດຫ່າງໄກ ໃນເມືອງສິງ ແຂວງຫລວງນ້ຳທາ ເມື່ອບໍ່ດົນມານີ້, ເພື່ອພົບຄູສອນຫ້ອງຄວບ ຜູ້ທີ່ອຸທິດຕົນ ເພື່ອການສອນ ແລະ ມີຄວາມຮູ້ຄວາມສາມາດ ໂດຍສະເພາະ ທ່ານ ນາງ ສີວອນ ເຊຍຊົວລີ ທີ່ເປັນຄູສອນຫ້ອງຮຽນຫລາຍຂັ້ນຮຽນ ແລະ ມີນັກຮຽນເວົ້າຫລາຍພາສາເຜົ່າ, ຊຶ່ງໃນສາລະຄະດີຕອນນີ້, ຄູໄດ້ອະທິບາຍ ເຖິງຄວາມ ກະຕືລືລົ້ນ ໃນການສອນ ແລະ ຍຸດທະສາດຂອງລາວ ເພື່ອຮັບປະກັນໃຫ້ນັກຮຽນ ສາມາດມີສ່ວນຮ່ວມໄດ້ຢ່າງເຕັມສ່ວນ ໃນທຸກກິດຈະກຳການຮຽນ.
ທ່ານ ອານຸລົມ ວິໄລພອນ ຜູ້ອຳນວຍການ ສວສ ໄດ້ກ່າວວ່າ: ຂ້າພະເຈົ້າປະທັບໃຈຫລາຍ ເມື່ອເຫັນການສອນຂອງຄູ ສີວອນ ເຊຍຊົວລີ, ຊຶ່ງເລື່່ອງລາວຂອງລາວ ໄດ້ເປັນແຮງບັນດານໃຈ ແລະ ສະແດງໃຫ້ເຫັນເຖິງວິທີ ທີ່ຄູມີຄວາມຕັ້ງໃຈ ເພື່ອສາມາດສ້າງຄວາມແຕກຕ່າງ ໃນການຮຽນຮູ້ຂອງນັກຮຽນ ຜູ້ໜຸ່ມນ້ອຍໄດ້ຢ່າງແທ້ຈິງ. ການສອນຫ້ອງຄວບ ແມ່ນມີຕົວຈິງ ໃນຫລາຍໆ ໂຮງຮຽນໃນລາວ. ສິ່ງສຳຄັນຫລາຍທີ່ສຸດ ຄູສອນຄວນຮູ້ວິທີການກະກຽມ ແລະ ຈັດການຮຽນການສອນ ທີ່ມີຫລາຍກວ່າໜຶ່ງຂັ້ນຮຽນ ເພື່ອໃຫ້ນັກຮຽນມີສ່ວນຮ່ວມ ແລະ ຮຽນຢູ່ສະເໝີ.
ຄູ ສີວອນ ເປັນຄູສອນມາໄດ້ ສິບແປດປີ ແລະ ເປັນຄູສອນຫ້ອງຄວບ ມາໄດ້ເຄິ່ງໜຶ່ງຂອງປີການສອນຂອງລາວ. ໃນສາລະຄະດີຕອນນີ້ ລາວໄດ້ບອກເລົ່າປະສົບການ ແລະ ໃຫ້ຄໍາແນະນໍາ ສໍາລັບ ການສອນຫ້ອງຄວບ, ຊຶ່ງຄູສີວອນ ໄດ້ກ່າວວ່າ: ຂ້າພະເຈົ້າໄດ້ກະກຽມກິດຈະກໍາເລີ່ມຕົ້ນ ແລະ ກິດຈະກຳລໍຖ້າສະເພາະ ເພື່ອບໍ່ໃຫ້ນັກຮຽນ ຈາກຂັ້ນຮຽນໜຶ່ງ ລໍຖ້າ ແລະ ເບື່ອໜ່າຍ ຫລື ລົບກວນ ໃນຂະນະທີ່ຂ້າພະເຈົ້າກຳລັງສອນອີກຂັ້ນຮຽນໜຶ່ງ. ເພື່ອບັນລຸ ຈຸດປະສົງດັ່ງກ່າວ, ຂ້າພະເຈົ້າໄດ້ອ່ານປຶ້ມຄູ່ມືຄູຢ່າງລະອຽດ ສໍາລັບທັງສອງຂັ້ນຮຽນ ແລະ ດັດແປງກິດຈະກໍາ ໃຫ້ເໝາະສົມກັບກຸ່ມຫ້ອງຮຽນຂອງຂ້າພະເຈົ້າ.
ທ່ານ ນາງ ວາເນັດຊ້າ ເຮັກກາທີ້ ເລຂາເອກ, ສະຖານທູດອົດສະຕຣາລີປະຈຳ ສປປ ລາວ ໄດ້ກ່າວວ່າ: ລັດຖະບານອົດສະຕຣາລີ ມີຄວາມພາກພູມໃຈທີ່ໄດ້ສະໜັບສະໜູນ ກະຊວງສຶກສາ ທິການ ແລະ ກິລາ ໃນການສ້າງສາລະຄະດີ ຄູຕົວແບບ ເພື່ອບອກເລົ່າເລື່ອງລາວຂອງຄູ ທີ່ມີຄວາມກະຕືລືລົ້ນ ແລະ ອຸທິດຕົນເພື່ອວຽກງານ. ຈຸດປະສົງຂອງວິດີໂອເຫລົ່ານີ້ ເພື່ອສົ່ງເສີມ ແລະ ບອກຕໍ່ການປະຕິບັດທີ່ດີທີ່ສຸດ ແລະ ເນັ້ນໃຫ້ເຫັນວິທີການສ້າງສັນແບບໃໝ່ ເພື່ອແກ້ໄຂສິ່ງທ້າທາຍໃນການຮຽນການສອນ ແລະ ຫວັງວ່າແຕ່ລະຕອນ ຂອງສາລະຄະດີ ຈະເປັນແຮງ ບັນດານໃຈໃຫ້ຄູ ທົດລອງການປະຕິບັດທີ່ດີດ້ວຍຕົນເອງ, ຊຶ່ງມັນຈະສ້າງຄວາມແຕກຕ່າງ ອັນຍິ່ງໃຫຍ່ ແກ່ນັກຮຽນຂອງເຂົາເຈົ້າ ທີ່ເປັນອະນາຄົດຂອງຊາດ.
ເລື່ອງລາວຂອງຄູ ສີວອນ ສາມາດຕິດຕາມໄດ້ທາງຊ່ອງໂທລະພາບການສຶກສາ ແລະ ກິລາ, ທາງໂທລະພາບລາວສະຕາຣ໌ ຊ່ອງ 8, ຄັງປັນຍາລາວ ແລະ ທາງຊ່ອງຢູທູບ ວິດີໂອສຳລັບການພັດທະນາຄູ Teachers Development Videos. ກົດຮັບຊົມໄດ້ທີ່ລີ້ງນີ້: https://youtu.be/pfgIeUOzjzA?si=jiZsS4znHV5z2JyE
KPL
