ຂປລ
ການແຂ່ງຂັນກິລາແລ່ນ-ລານ ໃນມະຫະກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ແຂ່ງຂັນມາໃນລະຫວ່າງວັນທີ 15-16 ທັນວາຜ່ານມາ ແລະ ມີການຊີງຫລຽນຄຳແລ້ວ 17 ຫລຽນ.
*ການແຂ່ງຂັນກິລາແລ່ນ-ລານ ໃນມະຫະກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ແຂ່ງຂັນມາໃນລະຫວ່າງວັນທີ 15-16 ທັນວາຜ່ານມາ ແລະ ມີການຊີງຫລຽນຄຳແລ້ວ 17 ຫລຽນ. ຂະນະທີ່ນະຄອນຫລວງວຽງຈັນ ຍາດໄດ້ 6 ຫລຽນຄໍາ, ແຂວງຫລວງນ້ຳທາ, ສະຫວັນນະເຂດ ແລະ ແຂວງວຽງຈັນ ຍາດໄດ້ແຂວງລະ 2 ຫລຽນຄຳ. ສຳລັບແຂວງຈຳປາສັກ, ຄຳມ່ວນ, ຫົວພັນ, ອຸດົມໄຊ ແລະ ແຂວງໄຊຍະບູລີ ຍາດໄດ້ແຂວງລະ 1 ຫລຽນຄໍາ.
ສຳລັບນັກກິລາເຈົ້າພາບແຂວງສາລະວັນ ຍາດໄດ້ພຽງຫລຽນເງິນ ແລະ ຫລຽນທອງ ເຊິ່ງເປັນຫລຽນເງິນທຳອິດໃຫ້ກັບແຂວງສາລະວັນ ໂດຍໄດ້ຈາກ ທ.ແບ໋ງ ເທບສີທາ ໃນລາຍການຊັດຫລາວຊາຍ ແລະ ໄດ້ອີກ 2 ຫລຽນເງິນ ຈາກ ທ້າວ ໃໝ່ ນາມນະຄອນ ໃນລາຍການແລ່ນ 800 ແມັດຊາຍ ແລະ ນາງ ບຸດສະບາ ໄຊຍະແສງ ລາຍການຍ່າງ 3.000 ແມັດຍິງ. ສ່ວນຫລຽນທອງ ໄດ້ຈາກ ນາງ ອິນທະຫວາ ກຽດຕິວົງສາ ແລ່ນ 800 ແມັດຍິງ ແລະ ທ້າວ ແຊັກ ວໍນາວິນ ລາຍການແລ່ນ 200 ແມັດ ເຊິ່ງໃນປະເພດກິລາແລ່ນ-ລານ ຂອງທັບນັກກິລາແຂວງສາລະວັນ ຍັງສືບຕໍ່ລຸ້ນ ແລະ ຕັ້ງເປົ້າຍາດຫລຽນຄຳໃນລາຍການຕໍ່ໄປ. ແຂວງສາລະວັນ ຍາດໄດ້ທັງໝົດ 7 ຫລຽນ.ໃນນັ້ນ, ຫລຽນເງິນ 4 ຫລຽນເງິນ ແລະ 3 ຫລຽນທອງ.
ພິທີມອບຫລຽນໃຫ້ກັບນັກກິລາ, ຈັດຂຶ້ນໃນວັນທີ 16 ທັນວານີ້, ທີ່ສະໜາມກິລາຂອງແຂວງ, ໃຫ້ກຽດມອບຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ, ຮອງປະທານຈັດງານ, ທ່ານ ອຳພາວັນ ກວ້າງມະນີວັນ ຮອງຫົວໜ້າກົມກິລາມວນຊົນພະລະ ແລະ ສິລະປະສຶກສາ, ຫົວໜ້າກໍາມະການເຕັກນິກຈັດການແຂ່ງຂັນ, ພ້ອມດ້ວຍບັນດາທ່ານຄະນະນໍາພະແນກສຶກສາທິການ ແລະ ກິລາແຂວງທີ່ກ່ຽວຂ້ອງເຂົ້າຮ່ວມ.
ພາບ-ຂ່າວໂດຍ: ຢ່າຕຢ່ງ
KPL
