ຂປລ. ທັບນັກກິລາຈາກນະຄອນຫລວງວຽງຈັນ ຕັ້ງເປົ້າສູ້ຊົນຈະຍາດໃຫ້ໄດ້ແຊ໋ມ 6 ໄໝຊ້ອນ ໃນການແຂ່ງຂັນກິລາມະຫະກຳນັກຮຽນ ມັດທະຍົມສຶກສາທົ່ວປະເທດ ຄັ້ງທີ 7 ທີ່ແຂວງສາລະວັນ ເປັນເຈົ້າພາບ.

ທ່ານ ຫົງແກ້ວ ທຳມະວົງ ຫົວໜ້າຂະແໜງກິລາກາຍະກຳ ຫົວໜ້ານຳພາທັບນັກກິລາ ນະຄອນຫລວງວຽງຈັນ ໃຫ້ສຳພາດວ່າ: ທັບນັກກິລານະຄອນຫລວງ ມີທັງໝົດ 200 ກວ່າຄົນ. ໃນນັ້ນ, ໄດ້ສົ່ງນັກກິລາເຂົ້າຮ່ວມແຂ່ງຂັນ 12 ປະເພດ (ເຂົ້າຮ່ວມທຸກປະເພດກິລາ). ຢ່າງໃດກໍ່ດີຖືວ່າ ນະຄອນຫລວງແມ່ນ ໄດ້ກຽມຄວາມພ້ອມ ຂອງນັກກິລາທີ່ເຂົ້າຮ່ວມແຂ່ງຂັນ ແລະ ກໍ່ໄດ້ວາງຄາດໝາຍວ່າ ຈະເປັນແຊ໋ມຕໍ່ 6 ສະໄໝຊ້ອນ ເຊິ່ງຜ່ານມາ ນະຄອນຫລວງວຽງຈັນໄດ້ເປັນແຊ໋ມ 5 ສະໄໝຊ້ອນ. ຄວາມຄາດຫວັງດັ່ງກ່າວ ແມ່ນຍ້ອນໄດ້ກະກຽມຄວາມພ້ອມ ທາງດ້ານເຕັກນິກການແຂ່ງຂັນຂອງກິລາ ແຕ່ລະປະເພດທຸກຢ່າງ. ຝາກໃຫ້ພໍ່ແມ່ປະຊາຊົນ, ນັກຮຽນທົ່ວນະຄອນຫລວງວຽງຈັນ ຈົ່ງໝັ້ນໃຈ ແລະ ທັບກິລາຈະນຳເອົາ ຫລຽນ ແລະ ແຊ໋ມໄປຕ້ອນໃຫ້ຢ່າງສົມກຽດແນນອນ. ສຳລັບຄວາມຫວັງຫລຽນຄຳຫລາຍທີ່ສຸດ ກໍ່ແມ່ນກິລາແລ່ນ-ລານ ເຊິ່ງແຕ່ລະຄັ້ງຜ່ານມາໄດ້ຫລຽນຄຳຫລາຍ ແມ່ນກິລາປະເພດແລ່ນ-ລານ 5 ສະໄໝຕິດຕໍ່ກັນ.

ສຳລັບແຂວງສະຫວັນນະເຂດ. ທ່ານ ອານຸສອນ ສຸທິວົງ ຄະນະພະແນກສຶກສາທິການ ແລະ ກິລາແຂວງ (ນຳທັບນັກກິລາ) ໃຫ້ຮູ້ວ່່າ: ແຂວງສະຫວັນນະເຂດ ສົ່ງນັກກິລາເຂົ້າຮ່ວມກວ່າ 200 ຄົນ. ໃນນັ້ນ, ສົ່ງເຂົ້າຮ່ວມ 8 ປະເພດກິລາໃນຈຳນວນ 12 ປະເພດກິລາ ເຊິ່ງກ່ອນການເຂົ້າຮ່ວມແຂ່ງຂັນຄັ້ງນີ້, ກໍ່ໄດ້ມີການເກັບໂຕນັກກິລາ ເຂົ້າຝຶກຊ້ອມມາແຕ່ ເດືອນ ຕຸລາ ແລະ ເຫັນວ່ານັກກິລາ 8 ປະເພດ ແມ່ນມີຄວາມພ້ອມເຕັມທີ່ ເຊິ່ງສັງເກດເຫັນການລົງແຂ່ງຂັນບາງປະເພດແຕ່ວັນທີ 9 ເຫັນວ່າມີໄຊຊະນະມາຕະຫລອດ. ສຳລັບ ການແຂ່ງຂັນກໍ່ໄດ້ເນັ້ນ ທາງດ້ານທັດສະ, ທາງດ້ານຄຸນສົມບັດ ໂດຍສະເພາະແມ່ນໃຫ້ຮູ້ເສຍ, ຮູ້ຊະນະ, ຮູ້ອະໄພເຊິ່ງກັນ ແລະ ກັນ. ພ້ອມນີ້, ກໍ່ຈະສູ້ຊົນໃຫ້ຢູ່ໃນອັນດັບ 1 ໃນ 5 ເຊິ່ງໃນໄລຍະຜ່ານມາ ແຂວງ ສະຫວັນນະເຂດ ແມ່ນຢູ່ໃນອັນດັບ 1 ໃນ 2 ຂອງຕາຕະລາງຫລຽນ.

ໂດຍ:ຢ່າຕົ່ງ

KPL