*ຕະຫລອດໄລຍະແຫ່ງການຕໍ່ສູ້ ເພື່ອພາລະກິດປົດປ່ອຍທ້ອນໂຮມປະເທດຊາດ ແລະ ພາລະກິດປົກປັກຮັກສາພັດທະນາປະເທດຊາດຂອງປະທານໄກສອນ ພົມວິຫານ ແມ່ນເປັນຜູ້ນຳທີ່ມີໄຫວພິບ, ສະຫລາດສ່ອງໃສ, ຄາດເດົາແມ໋ນຢຳ, ເສຍສະລະ ແລະ ປະສົບຜົນສຳເລັດໃນການນຳພາການຕໍ່ສູ້ເພື່ອປົດປ່ອຍຊາດ ແລະ ທ້ອນໂຮມປະເທດຊາດ ໃຫ້ເປັນອັນໜຶ່ງອັນດຽວກັນ. ຜົນງານ ແລະ ຄຸນງາມດີຂອງປະທານ ຍັງຈາລຶກຢູ່ໃນດວງໃຈຂອງປວງຊົນລາວທັງຊາດ. ປະທານ ແມ່ນລູກຮັກຫລານແພງຂອງປະຊາຊົນລາວບັນດາເຜົ່າ, ແມ່ນຜູ້ຮັກຊາດ, ນັກປະຕິວັດທີ່ຍິ່ງໃຫຍ່ຂອງຊາດ, ວິລະບູລຸດ, ຜູ້ນຳຂອງພັກ-ລັດ ທີ່ປີຊາສາມາດ, ສະຫລາດສ່ອງໃສ ແລະ ສະດຸ້ງໄວ.

    ປະທານໄກສອນ ພົມວິຫານ ເປັນຜູ້ທີ່ມີຄຸນສົມບັດສິນທຳປະຕິວັດສູງສົ່ງ, ມີທັດສະນະມະຫາຊົນກວ້າງຂວາງ, ເປັນຜູ້ນຳທີ່ດຸໝັ່ນ, ດຳລົງຊີວິດແບບງ່າຍດາຍ, ປະຢັດ ແລະ ບໍລິສຸດປອດໃສ. ເພິ່ນໄດ້ຮັບຮູ້ຢ່າງຈະແຈ້ງ ແລະ ເລິກເຊິ່ງວ່າ: ຢາກນຳພາຄົນໄດ້, ຢາກເວົ້າໃຫ້ຄົນຟັງຕົນ ແລະຍິ່ງກວ່ານັ້ນແມ່ນຢາກເຮັດຫລ້ອນໜ້າທີ່ບໍ່ວ່າວຽກສຳຄັນທີ່ຍິ່ງໃຫຍ່ ຫລື ນ້ອຍກໍຕ້ອງມີຄວາມຮູ້. ຢາກມີຄວາມຮູ້ກໍຕ້ອງສຶກສາຮ່ຳຮຽນ ແລະ ສິ່ງສຳຄັນແມ່ນຮຽນຕ້ອງເຂົ້າໃຈ, ຖ້າຮຽນບໍ່ເຂົ້າໃຈກໍເຮັດຫຍັງບໍ່ໄດ້, ຖ້າຮຽນເຂົ້າໃຈແຕ່ບໍ່ເຮັດ, ບໍ່ໄດ້ນຳໃຊ້ເຂົ້າວຽກຕົວຈິງ, ການຮຽນຮູ້ນັ້ນກໍບໍ່ມີຄວາມໝາຍ. ສະນັ້ນ, ປະທານ ຈຶ່ງເວົ້າວ່າ: “ຮ່ຳຮຽນແມ່ນເພື່ອດັດສ້າງ ແລະ ກໍ່ສ້າງຕົນເອງໃຫ້ເປັນຄົນໃໝ່ສັງຄົມນິຍົມ, ຮຽນຕ້ອງສົມທົບກັບເຮັດ, ກັບການຝຶກຝົນຫລໍ່ຫລອມໃນຂະບວນການປະຕິວັດອັນຟົດຟື້ນ ຂອງຊາວຜູ້ອອກແຮງງານ, ນຳເອົາຄວາມຮູ້ທີ່ຮຽນມາໄດ້ນັ້ນ ເຂົ້າໃສ່ການປະຕິບັດໜ້າທີ່ປົກປັກຮັກສາປະເທດຊາດ ແລະ ກໍ່ສ້າງປະເທດໃຫ້ມັ່ງຄັ່ງເຂັ້ມແຂງຢ່າງມີໄຊ”.

     ສຳລັບຕໍ່ພະນັກງານສະມາຊິກພັກ ປະທານ ໄກສອນ ພົມວິຫານ ໄດ້ຕັກເຕືອນ, ບອກສອນຢ່າງເອົາໃຈໃສ່. ເພິ່ນຕັ້ງຄຳຖາມວ່າ: ສະມາຊິກພັກຕ້ອງເຮັດຫຍັງແດ່? ໃນນັ້ນ ປະທານໄດ້ຊີ້ແຈງສະມາຊິກພັກຕ້ອງ ຄົ້ນຄວ້າຮ່ຳຮຽນຍົກລະດັບ ຂອງຕົນຂຶ້ນ, ກ່ອນອື່ນໝົດຕ້ອງຮຽນແນວທາງນະໂຍບາຍ, ຮຽນຄວາມຮູ້ວິຊາສະເພາະ, ຮຽນນຳວຽກຕົວຈິງ, ຮຽນນຳປະຊາຊົນ, ໃກ້ຊິດຕິດແທດປະຊາຊົນ ແລະ ຢາກຊາບຊຶມແນວທາງກໍຕ້ອງມີລະດັບທິດສະດີມາກ-ເລນິນ. ດ້ານອື່ນກໍຕ້ອງມີລະດັບຄວາມຮູ້ກ່ຽວກັບພຶດຕິກຳຕົວຈິງຂອງປະເທດຊາດຕົນ. ຍ້ອນແນວນັ້ນ ຕ້ອງຖືສຳຄັນການຍົກລະດັບທິດສະດີມາກ-ເລນິນ ຂອງພະນັກງານສະມາຊິກພັກໃຫ້ສູງຂຶ້ນ. ມີແຕ່ກຳແນວທາງເທົ່ານັ້ນ ກໍຍັງບໍ່ທັນພໍເທື່ອ ເພື່ອເຮັດໃຫ້ແນວທາງປະກົດຜົນເປັນຈິງໄດ້, ຍັງຈະຕ້ອງຍົກລະດັບຄວາມສາມາດໃນການຈັດຕັ້ງປະຕິບັດໃຫ້ສູງຂຶ້ນອີກດ້ວຍ ແລະ ເພິ່ນເນັ້ນວ່າ: “ສະມາຊິກພັກ ຕ້ອງຍົກສູງຄວາມຮັບຜິດຊອບຕໍ່ໜ້າທີ່ວຽກງານ, ເຮັດວຽກດ້ວຍຄວາມພະຍາຍາມ,ດຸໝັ່ນຫ້າວຫັນ, ບໍ່ເຮັດພໍແປະໆບແມະໆ, ເຮັດວຽກຕ້ອງມີປະສິດທິພາບ, ເປັນແບບຢ່າງໃຫ້ຜູ້ອື່ນ.”

   ພ້ອມນັ້ນ, ປະທານ ໄກສອນ ພົມວິຫານ ກໍຮຽກຮ້ອງໃຫ້ພະນັກງານສະມາຊິກພັກຕ້ອງເອົາໃຈໃສ່ ແລະ ຫລີກລ່ຽງແນວຄິດຫຍໍ້ທໍ້ເຫັນແກ່ຕົວ, ເຫັນແກ່ສິດຜົນປະໂຫຍດຂອງສ່ວນຕົວເກີດສິດຜົນປະໂຫຍດຂອງສ່ວນລວມ ທີ່ວ່າຕ້ອງ ມີສະຕິຕໍ່ການຈັດຕັ້ງ ແລະ ເຄົາລົບລະບຽບກົດໝາຍ, ບໍ່ອາດຍາສິດລ່ວງອຳນາດ, ຍຶດໝັ້ນໃນຄວາມສາມັກຄີ ເປັນເອກະພາບ, ຈິງໃຈຕຳນິຊ່ວຍເຫລືອກໍ່ສ້າງກັນຖານສະຫາຍຮ່ວມພັກດຽວກັນ, ບໍ່ເອກະຊົນເອົາແຕ່ໃຈຕົນເອງ, ມີຄວາມສັດຊື່ບໍລິສຸດ,  ບໍ່ລັກໂລບສໍ້ໂກງ, ບໍ່ຮັບສິນບົນສໍ້ລາດບັງຫລວງ, ບໍ່ເກັນແກ່ແຕ່ເງິນແຕ່ຄຳ, ແລ່ນນຳວັດຖຸ, ຟູມເຟືອມ, ອວດຮັ່ງອວດມີອັນຈະນຳເອົາຄວາມເສື່ອມເສຍອັນຮ້າຍແຮງມາໃຫ້ພັກ, ເປັນຊ່ອງທາງໃຫ້ພວກສັດຕູ ແລະ ຄົນບໍ່ດີສວຍໃຊ້.

ຄັດຈາກ: ປຶ້ມແນວຄິດ ປະທານ ໄກສອນ ພົມວິຫານ

KPL