ຂປລ
ເມື່ອມໍ່ໆນີ້, ຄະນະຫ້ອງວ່າການສູນກາງພັກ ພ້ອມດ້ວຍຄະນະຫ້ອງວ່າການ 4 ແຂວງພາກກາງໄດ້ຂຶ້ນພິຊິດຈອມພູເບ້ຍ ຢູ່ແຂວງໄຊສົມບູນ ໂດຍການນຳພາຂອງ ທ່ານ ນາງ ໃບຄູນ ສົມບັດດວງ ຫົວໜ້າກົມທ້ອງຖິ່ນ-ຮາກຖານຫ້ອງວ່າການສູນກາງພັກ.
*ເມື່ອມໍ່ໆນີ້, ຄະນະຫ້ອງວ່າການສູນກາງພັກ ພ້ອມດ້ວຍຄະນະຫ້ອງວ່າການ 4 ແຂວງພາກກາງໄດ້ຂຶ້ນພິຊິດຈອມພູເບ້ຍ ຢູ່ແຂວງໄຊສົມບູນ ໂດຍການນຳພາຂອງ ທ່ານ ນາງ ໃບຄູນ ສົມບັດດວງ ຫົວໜ້າກົມທ້ອງຖິ່ນ-ຮາກຖານຫ້ອງວ່າການສູນກາງພັກ, ມີຄະນະຫ້ອງວ່າການ 4 ແຂວງພາກກາງຄື: ແຂວງໄຊສົມບູນ, ນະຄອນຫລວງວຽງຈັນ, ແຂວງວຽງຈັນ ແລະ ແຂວງບໍລິຄຳໄຊ ເຂົ້າຮ່ວມຢ່າງເປັນຂະບວນການຟົດຟື້ນ.
ການຂຶ້ນພິຊິດຈອມພູເບ້ຍຂອງຄະນະໃນຄັ້ງນີ້ ກໍເພື່ອສຳຜັດຕົວຈິງກັບສະພາບອາກາດອັນ ບໍລິສຸດໂປ່ງໃສ, ທິວທັດທຳມະຊາດທີ່ສວຍສົດງົດງາມ ແລະ ພືດພັນນາໆຊະນິດເວົ້າລວມ, ເວົ້າສະເພາະກໍຄືຈອມພູເບ້ຍ ເຊິ່ງເປັນຈອມພູທີ່ສູງທີ່ສຸດໃນ ສປປ ລາວ ໂດຍມີຄວາມສູງໃນລະດັບ 2.820 ແມັດ, ມີທິວທັດທໍາມະຊາດທີ່ສວຍສົດງົດງາມທີ່ເປັນເອກະລັກ ເຊິ່ງພື້ນທີ່ເທິງເນີນພູ ຖືກປົກຄຸມໄປດ້ວຍມ່ານໝອກທີ່ໜ້າປະທັບໃຈ ບວກກັບສະພາບອາກາດອັນບໍລິສຸດປອດໂປ່ງ ແລະ ໜາວເຢັນຕະຫລອດປີ. ນອກນັ້ນ ອັນພິເສດກໍຄື ພູເບ້ຍ ຍັງຖືກອ້ອມຮອບໄປດ້ວຍຕົ້ນໄມ້ໃຫຍ່ນ້ອຍ ແລະ ຕົ້ນດອກກຸຫລາບລ້ານປີ ທີ່ມີພຽງແຕ່ເທິງພູເບ້ຍ ເເຂວງໄຊສົມບູນແຫ່ງນີ້ແຫ່ງດຽວກໍວ່າໄດ້ ທີ່ເກີດສະລັບຊັບຊ້ອນເທິງຈອມພູ ທີ່ທຳມະຊາດສ້າງໄວ້ຢ່າງຫລວງຫລາຍ.
ຄວາມມະຫະສະຈັນ ແລະ ຄວາມອຸດົມ ສົມເຫລົ່ານັ້ນ ຍັງລໍຄອຍທຸກໆ ຄົນ ທີ່ມີຄວາມມັກຮັກທຳມະຊາດຂຶ້ນໄປສຳຜັດດ້ວຍຕົນເອງນັ້ນກໍຄື ເທິງຈອມພູເບ້ຍ ພູທີ່ສູງທີ່ສຸດຢູ່ປະເທດລາວເຮົາ. (ຂໍ້ມູນ ໂທລະພາບໄຊສົມບູນ).
KPL
