ຂປລ. ໃນວາລະດຳເນີນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 25 ພະຈິກ 2024 ນີ້, ທ່ານ ນາງ ປິ່ງຄຳ ລາຊະສິມມາ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດ ລ້ອມ  ໄດ້ຕາງໜ້າໃຫ້ຄະນະປະຈຳສະພາແຫ່ງຊາດ ປະກອບຄຳເຫັນຕໍ່ຮ່າງວິໄສທັດ ຮອດປີ 2040, ແຜນຍຸດທະສາດການຄຸ້ມຄອງ  ແລະ ພັດທະນາທີ່ດິນກະສິກຳຮອດປີ 2030 ໂດຍສະເໜີ ລັດຖະບາຍ ກໍຄື ກະຊວງກະສິກໍາ ແລະ ປ່າໄມ້ ເອົາໃຈໃສ່ປົກປັກຮັກສາທີ່ດິນກະສິກຳ ໂດຍສະເພາະ ເນື້ອທີ່ດິນນາ, ດິນຮັບນໍ້າຊົນລະປະທານ ທີ່ລັດໄດ້ມີການພັດທະນາແລ້ວ ເພື່ອເປັນປັດໄຈສະໜອງໃຫ້ແກ່ ແຜນງານຄໍ້າປະກັນ ການຜະລິດສະບຽງອາຫານ ແລະ ຜະລິດເປັນສິນຄ້າ ເພື່ອຊົມໃຊ້ພາຍໃນ ແລະ ສົ່ງອອກ ໂດຍມີມາດຕະການຄຸ້ມຄອງ, ມີການຕິດຕາມກວດກາ, ຈຳ ກັດການຫັນປ່ຽນທີ່ດິນກະສິກຳ ໄປເປັນທີ່ດິນປະເພດອື່ນ ເພື່ອຮັບປະກັນບໍ່ໃຫ້ເນື້ອທີ່ກະສິກຳຫລຸດລົງ ໃນໄລຍະຍາວ.

ໂອກາດນີ້, ທ່ານ ນາງ ປິ່ງຄໍາ ລາຊະສິມມາ ໄດ້ສະແດງຄວາມຊົມເຊີຍຕໍ່ລັດຖະບານ ໃນການຮ່າງວິໄສທັດ ຮອດ ປີ 2040, ແຜນຍຸດທະສາດການຄຸ້ມຄອງ  ແລະ ພັດທະນາທີ່ດິນກະສິກຳ ຮອດປີ 2030  ຊຶ່ງຈະເປັນທິດທາງ ແລະ ບ່ອນອີງໜຶ່ງທີ່ສຳຄັນໃຫ້ແກ່ ການພັດທະນາທີ່ດິນກະສິກຳ, ເປັນທ່າແຮງພື້ນຖານ ໃນການພັດທະນາ ເສດຖະກິດ-ສັງຄົມ ຂອງປະເທດໃຫ້ມີຈຸດສຸມພັດທະນາ, ໃຫ້ມີປະສິດທິພາບ, ປະສິດທິຜົນ ແລະ ຍືນຍົງ ທັງເປັນພື້ນຖານ ໃຫ້ແກ່ຂະແໜງການກ່ຽວຂ້ອງ ແລະ ອົງການປົກຄອງທ້ອງຖິ່ນ ໃນການຄຸ້ມຄອງ, ຕິດຕາມດກວດກາ ແລະ ການນຳໃຊ້ທີ່ດິນກະສິກຳໃນຕໍ່ໜ້າ.

ເພື່ອຮັບປະກັນເຮັດໃຫ້ ການຄຸ້ມຄອງ ແລະ ພັດທະນາທີ່ດິນກະສິກຳ ໃຫ້ມີປະສິດທິພາບ ແລະ ປະສິດທິຜົນ, ຄະນະປະຈຳສະພາແຫ່ງຊາດ ສະເໜີຕໍ່ລັດຖະບານ ຄື: ວິໄສທັດ ຮອດປີ 2040 ແລະ ຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2030 ຕ້ອງໃຫ້ສອດຄ່ອງກັບຍຸດທະສາດ ຂອງຂະແໜງການທີ່ກ່ຽວຂ້ອງ ເປັນຕົ້ນ ຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ, ໂຍທາທິການ ແລະ ຂົນສົ່ງ, ພະລັງງານ ແລະ ບໍ່ແຮ່ ແລະ ແຜນແມ່ບົດຈັດສັນທີ່ດິນແຫ່ງຊາດ ລວມທັງວຽກງານປ່າໄມ້ ຂອງຂະແໜງກະສິກຳ ແລະ ປ່າໄມ້; ສືບຕໍ່ມີກົນໄກຄຸ້ມຄອງ ແລະ ພັດທະນາທີ່ດິນກະສິກຳ ໄປຄຽງຄູ່ກັບການຍົກສູງ ຄຸນນະພາບການຜະລິດກະສິກຳ ໃຫ້ກ້າວໄປສູ່ການຜະລິດທີ່ທັນສະໄໝ, ພ້ອມທັງມີການຍົກສູງຄຸນນະພາບທີ່ດິນກະສິກຳ ໃຫ້ຮັບປະກັນຕໍ່ການນໍາໃຊ້ ແລະ ການພັດທະນາທີ່ດິນຕາມທິດສີຂຽວ ແລະ ຍືນຍົງ; ໃນການຈັດຕັ້ງຜັນຂະຫຍາຍ ຍຸດທະສາດສະບັບນີ້ ສະເໜີໃຫ້ມີກົນໄກປະສານສົມທົບ ກັບພາກສ່ວນທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ ຢ່າງກົມກຽວ ແລະ ເປັນເອກະພາບກັນ, ມີການສະໜອງຂໍ້ມູນຂ່າວສານ, ເຄື່ອງມືອຸປະກອນ ແລະ ການແບ່ງຄວາມຮັບຜິດຊອບຢ່າງຂາດຕົວ ບົນຫລັກການ ການມີສ່ວນຮ່ວມ ຈາກທຸກພາກສ່ວນທີ່ກ່ຽວຂ້ອງ ແລະ ໄປຕາມທິດ 3 ສ້າງ ເພື່ອຮັບປະກັນເຮັດໃຫ້ ການຈັດຕັ້ງປະຕິບັດ ຍຸດທະສາດດັ່ງກ່າວ ມີປະສິດທິພາບ ແລະ ປະສິດທິຜົນ, ຮັບປະກັນຄວາມຊັດເຈນ ທາງດ້ານໂຕເລກເນື້ອທີ່ດິນ ທີ່ຈະຖືກນໍາໃຊ້ໃນແຕ່ລະປະເພດ; ສ້າງ ແລະ ພັດທະນາບຸກຄະລາກອນ ທີ່ຮັບຜິດຊອບວຽກງານການຄຸ້ມຄອງ ແລະ ພັດທະນາທີ່ດິນກະສິກຳ ໃຫ້ໄດ້ທັງປະລິມານ ແລະ ຄຸນນະພາບ ສາມາດຕອບສະໜອງໄດ້ ຕາມຄວາມຮຽກຮ້ອງຕ້ອງການ ຂອງວຽກງານດັ່ງກ່າວ, ພ້ອມທັງເອົາໃຈໃສ່ໃນການໂຄສະນາ ເຜີຍແຜ່ຂໍ້ມູນຂ່າວສານ ການຄຸ້ມຄອງ ແລະ ພັດທະນາທີ່ດິນກະສິກຳ ຢ່າງກວ້າງຂວາງ ໃຫ້ທຸກພາກສ່ວນໃນສັງຄົມ, ປະຊາຊົນເຂົ້າໃຈ, ເຂົ້າຮ່ວມ ແລະ ມີສ່ວນຮ່ວມ ໃນການຈັດຕັ້ງປະຕິບັດວຽກງານດັ່ງກ່າວ.

ທ່ານ ນາງ ປິ່ງຄໍາ ລາຊະສິມມາ ຍັງໄດ້ສະເໜີອີກວ່າ: ຕໍ່ກັບມາດຕະການດ້ານງົບປະມານ ແລະ ແຫລ່ງທຶນ, ສະເໜີໃຫ້ກະຊວງກ່ຽວຂ້ອງເອົາໃຈໃສ່ຄົ້ນຄວ້າ ນໍາສະເໜີເຂົ້າແຜນງົບປະມານຂອງລັດ ແລະ ຄົ້ນຄ້ວາແຫລ່ງທຶນຕ່າງໆ ເພື່ອໝູນໃຊ້ເຂົ້າໃສ່ບັນດາ ວຽກງານຢ່າງມີຈຸດສຸມ, ພຽງພໍ ແລະ ຮັບປະກັນໃຫ້ຮ່າງວິໄສທັດ ແລະ ຍຸດທະສາດສະບັບນີ້ ສາມາດຈັດຕັ້ງປະຕິບັດໄດ້ຢ່າງມີປະສິດທິຜົນ.

ຂ່າວ: ສົມຫວັງ

ພາບ: ຂັນໄຊ

KPL