ຂປລ. ສປປ ລາວ ກໍຄື ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ, ກະຊວງການຕ່າງປະເທດ ຮ່ວມກັບ ກອງເລຂາອາຊຽນ ຈັດກອງປະຊຸມ ເວທີສື່ມວນຊົນອາຊຽນ ຄັ້ງທີ 8 ໃນວັນທີ 25 ພະຈິກ 2024 ຢູ່ນະຄອນ ຫລວງວຽງຈັນ ໂດຍມີ ທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ນາງ ນິໂຄ ສະເຕັກແມນ (Nicole Stechmann) ອຸປະທູດເຢຍລະມັນ ປະຈໍາ ສປປ ລາວ, ພ້ອມດ້ວຍ ສື່ມວນຊົນຈາກປະເທດສະມາຊິກອາຊຽນ ເຂົ້າຮ່ວມ.

ກອງປະຊຸມດັ່ງກ່າວ, ເປັນການເປີດໂອກາດ ໃຫ້ສື່ມວນຊົນຈາກບັນດາປະເທດສະມາຊິກອາຊຽນ ໄດ້ແລກ ປ່ຽນບົດຮຽນ, ທັດສະນະ, ປະສົບການ ແລະ ອື່ນໆ ໃນຫລາຍຫົວຂໍ້, ຫລາຍບັນຫາສຳຄັນ ຕິດພັນກັບການປະຕິ ບັດແຜນວຽກງານການເຊື່ອມໂຍງ, ເຊື່ອມຈອດ ກໍຄື ຜົນໄດ້ຮັບ ແລະ ຄວາມຄາດຫວັງ ຕໍ່ໜ້າທີ່ວຽກງານອາຊຽນ. ທັງນີ້, ກໍເພື່ອເປັນການຮັດແໜ້ນ ການພົວພັນຮ່ວມມື ກໍຄື ການແລກປ່ຽນຂໍ້ມູນຂ່າວສານ, ແລກປ່ຽນຄວາມຮູ້ຄວາມສາມາດ, ແລກປ່ຽນວັດທະນະທຳ ເຊິ່ງກັນ ແລະ ກັນ ລະຫວ່າງສື່ມວນຊົນ ຂອງບັນດາປະເທດສະມາຊິກອາຊຽນ ໃຫ້ໄດ້ຮັບການພັດທະນາ ແລະ ສືບຕໍ່ຮັດແໜ້ນການຮ່ວມມື ດ້ານວຽກງານສື່ມວນຊົນ ລະຫວ່າງຊາດອາຊຽນ ໃຫ້ແໜ້ນແຟ້ນຂຶ້ນກວ່າເກົ່າ ໃນອະນາຄົດ ແລະ ຍາວນານ.

ທ່ານ ໂພສີ ແກ້ວມະນີວົງ ໄດ້ໃຫ້ຮູ້ວ່າ: ການຈັດ ເວທີສື່ມວນຊົນອາຊຽນ ໃນຄັ້ງນີ້, ມີຄວາມສຳຄັນ ເປັນເວທີ ສໍາລັບສື່ມວນຊົນໃນອາຊຽນ ໄດ້ແລກປ່ຽນຄໍາຄິດຄໍາເຫັນຮ່ວມກັນ, ທັງເປັນການສະແດງເຖິງການຮ່ວມມືກັນ ໃນການຈັດຕັ້ງປະຕິບັດວິໄສທັດ ການເຊື່ອມໂຍງ ເຊື່ອມຈອດຂອງອາຊຽນ,​ ລວມເຖິງການປະຕິບັດ ແຜນແມ່ບົດ ການສື່ສານອາຊຽນ ປີ 2018-2025, ທັງສະທ້ອນເຖິງຫົວຂໍ້ ຂອງການເປັນປະທານອາຊຽນຂອງ ສປປ ລາວ ໃນປີ 2024 ແລະ ສອດຄ່ອງກັບປີທ່ອງທ່ຽວລາວ 2024. ກອປະຊຸມຄັ້ງນີ້, ຈັດຂຶ້ນໃນທ່າມກາງບັນຍາກາດທີ່ ສປປ ລາວ ກໍາລັງກະກຽມຈະສະເຫລີມສະຫລອງວັນຊາດ ແຫ່ງ ສປປ ລາວ ທີ 2 ທັນວາ ຄົບ ຮອບ 49 ປີ ໃນອາທິດໜ້ານີ້.

ທ່ານ ກາວ ກິມຮຸນ (Kao Kim Hourn) ເລຂາທິການໃຫຍ່ອາຊຽນ ໄດ້ມີຄໍາເຫັນ ຜ່ານລະບົບອອນລາຍ ໂດຍມີ ບາງຕອນວ່າ: ໃນກອງປະຊຸມປະຈໍາປີ ໄດ້ຈັດໃຫ້ມີເວທີສົນທະນາ ທີ່ມີຄວາມໝາຍສໍາຄັນ ລະຫວ່າງຜູ້ກຳນົດນະໂຍບາຍຂອງອາຊຽນ ແລະ ບັນດາຜູ້ນຳສື່ມວນຊົນຂອງອາຊຽນ, ຊຸກຍູ້ການແລກປ່ຽນຄວາມ ຄິດເຫັນ ແລະ ເພີ່ມຄວາມເຂົ້າໃຈທັດສະນະຂອງອາຊຽນ ຕໍ່ບັນດາບັນຫາທີ່ພົ້ນເດັ່ນ. ນອກຈາກນີ້, ທ່ານຍັງໄດ້ເນັ້ນໜັກເຖິງບົດບາດສຳຄັນຂອງສື່ມວນຊົນ ໃນການຊຸກຍູ້ວາລະການເຊື່ອມໂຍງ ຂອງປະຊາຄົມອາຊຽນຫລັງປີ 2025.

ພາບ: ເກດສະໜາ

KPL