ຫົວຂໍ້: ກ້າວເຂົ້າສູ່ 30 ປີ ຂອງຖະແຫລງການ ແລະ ແຜນປະຕິບັດງານປັກກິ່ງ: ຮ່ວມກັນ ເພື່ອຢຸດຕິການ ໃຊ້ຄວາມຮຸນແຮງ ຕໍ່ແມ່ຍິງ ແລະ ເດັກຍິງ”

• ບັນດາທ່ານການນຳພັກ-ລັດ ທີ່ນັບຖື ແລະ ຮັກແພງ!
• ພີ່ນ້ອງຮ່ວມຊາດ ທີ່ຮັກແພງທັງຫລາຍ!

ມື້ນີ້ ເປັນອີກຄັ້ງໜຶ່ງ ທີ່ຂ້າພະເຈົ້າ ໃນນາມຕາງໜ້າລັດຖະບານ ໄດ້ມາກ່າວ ເນື່ອງໃນໂອກາດລະນຶກວັນ ສາກົນ ເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ (to End VAWG) ວັນທີ 25 ພະຈິກ; ຊຶ່ງເປັນວັນທີ່ ບັນດາປະຊາຊາດໃນທົ່ວໂລກ ໄດ້ໃຫ້ຄວາມສຳຄັນ ແລະ ພ້ອມກັນສຸມໃສ່ ເພື່ອລຶບລ້າງທຸກຮູບແບບ ຂອງຄວາມຮຸນ ແຮງຕໍ່ແມ່ຍິງ ແລະ ເດັກຍິງ.

ດັ່ງທີ່ບັນດາທ່ານຮູ້ ຄວາມຮຸນແຮງຕໍ່ແມ່ຍິງ ແລະ ເດັກຍິງ ຍັງເເຜ່ລາມໄປທົ່ວທຸກມູມໂລກ ແລະ ເກີດຂຶ້ນ ໃນຫລາຍຮູບແບບ ທີ່ເປັນການລະເມີດ ສິດທິມະນຸດພື້ນຖານຂອງແມ່ຍິງ ແລະ ເດັກຍິງ. ອີງຕາມຂໍ້ມູນ ຈາກອົງການ ສະຫະປະຊາຊາດ ເພື່ອສິດທິຂອງແມ່ຍິງ (UNWomen) ໃຫ້ຮູ້ວ່າ: ໃນທົ່ວໂລກ ຍັງມີແມ່ຍິງປະມານ 736 ລ້ານ ຄົນ ເກືອບ 1 ໃນ 3 ທີ່ໄດ້ປະສົບກັບຄວາມຮຸນແຮງ ທາງຮ່າງກາຍ ຫລື ທາງເພດໂດຍຄູ່ຮ່ວມຊີວິດ, ບຸກຄົນອື່ນ ຫລື ທັງສອງກຸ່ມຄົນຢ່າງໜ້ອຍສອງຄັ້ງ ໃນຊ່ວງຊີວິດຂອງຕົນ. ໃນປີທີ່ຜ່ານມາ ແມ່ຍິງ ແລະ ເດັກຍິງ ອາຍຸລະຫວ່າງ 15-49 ປີ 1 ໃນ 8 ຄົນ ໄດ້ຜະເຊີນກັບການໃຊ້ ຄວາມຮຸນແຮງຈາກຄູ່ຮ່ວມຊີວິດ.

ວັນທີ 25 ພະຈິກ 2024 ເປັນອີກປີໜຶ່ງ ທີ່ ສປປ ລາວ ແລະ ບັນດາປະເທດໃນທົ່ວໂລກ ພ້ອມກັນລະ ນຶກເຖິງວັນສາກົນ ເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ເພື່ອສະແດງຄວາມໝາຍໝັ້ນຂອງຕົນ ໃນການປ້ອງກັນ ແລະ ແກ້ໄຂຄວາມຮຸນແຮງຕໍ່ແມ່ຍິງ ແລະ ເດັກຍິງ; ຊຶ່ງການດຳເນີນຂະບວນການລະນຶກວັນສາ ກົນ ເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງໃນປີນີ້ ແມ່ນພາຍໃຕ້ຫົວຂໍ້: “ກ້າວເຂົ້າສູ່ 30 ປີ ຂອງຖະ ແຫລງການ ແລະ ແຜນປະຕິບັດງານປັກກິ່ງ: ຮ່ວມກັນ ເພື່ອຢຸດຕິການໃຊ້ຄວາມຮຸນແຮງ ຕໍ່ແມ່ຍິງ ແລະ ເດັກຍິງ” ເຊິ່ງຮຽກຮ້ອງບັນດາປະເທດໃນໂລກ ຕ້ອງໄດ້ພ້ອມກັນທົບທວນຄວາມຄືບໜ້າ ໃນການຈັດຕັ້ງປະຕິບັດຖະແຫລງ ການ ແລະ ແຜນປະຕິບັດງານປັກກິ່ງ ຄົບຮອບ 30 ປີ ເວົ້າລວມ, ເວົ້າສະເພາະ ບັນດາຄວາມໝາຍໝັ້ນ, ຄວາມ ຮັບຜິດຊອບ ແລະ ການຈັດສັນງົບປະມານເຂົ້າໃນ ການຈັດຕັ້ງປະຕິບັດ ວຽກງານປ້ອງກັນ ແລະ ການແກ້ໄຂຄວາມ ຮຸນແຮງຕໍ່ແມ່ຍິງ ແລະ ເດັກຍິງໃນປະເທດຕົນ.

• ພີ່ນ້ອງຮ່ວມຊາດທີ່ຮັກແພງທັງຫລາຍ!

ຂ້າພະເຈົ້າ ຕາງໜ້າໃຫ້ລັດຖະບານແຫ່ງ ສປປ ລາວ ຮ່ວມກັບ ວົງຄະນາຍາດສາກົນ ໃນທົ່ວໂລກພ້ອມກັນ ລະນຶກເຖິງວັນສາກົນ ເພື່ອລຶບລ້າງຄວາມຮຸນແຮງ ຕໍ່ແມ່ຍິງ ປະຈຳ ປີ 2024 ພາຍໃຕ້ຫົວຂໍ້ “ກ້າວເຂົ້າສູ່ 30 ປີ ຂອງ ຖະແຫລງການ ແລະ ແຜນປະຕິບັດງານປັກກິ່ງ: ຮ່ວມກັນເພື່ອຢຸດຕິ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ”

ປີ 2024 ນີ້, ລັດຖະບານ ເວົ້າລວມ, ເວົ້າສະເພາະ ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງ ແມ່ຍິງ ແລະ ແມ່ເດັກ (ຄຊກມດ) ໄດ້ມີການທົບທວນຄືນການຈັດຕັ້ງ ປະຕິບັດຖະແຫລງການ ແລະ ແຜນປະຕິບັດ ປະຕິບັດງານປັກກິ່ງ ຄົບຮອບ 30 ປີ ຢູ່ ສປປ ລາວ ໃນ 12 ຂົງເຂດທີ່ໜ້າເປັນຫ່ວງ, ພິເສດຄະນະຜູ້ແທນຂັ້ນ ສູງຂອງ ສປປ ລາວ ໄດ້ເຂົ້າຮ່ວມການພິຈາລະນາ ກ່ຽວກັບບົດລາຍງານແຫ່ງຊາດ ປະຈຳໄລຍະທີ 10 ໃນການຈັດ ຕັ້ງປະຕິບັດສົນທິສັນຍາ ວ່າດ້ວຍການລຶບລ້າງທຸກຮູບ ການຈາແນກຕໍ່ແມ່ຍິງ ຢູ່ ສປປ ລາວ ລະຫວ່າງ ລັດຖະບານ ລາວ ແລະ ຄະນະກຳມະການຊີດສາກົນອົງການ ສະຫະປະຊາຊາດ ຊຶ່ງເຫັນໄດ້ວ່າ ມີຄວາມຄືບໜ້າທີ່ພົ້ນເດັ່ນຫລາຍ ດ້ານ ໂດຍສະເພາະ ການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ໃນໄລຍະຜ່ານມາ ສປປ ລາວ ໄດ້ມີຫລາຍບົດຮຽນ ແລະ ພາກປະຕິບັດຕົວຈິງອັນດີ ເປັນຕົ້ນ:

ລັດຖະບານ ແຫ່ງ ສປປ ລາວ ເວົ້າລວມ, ເວົ້າສະເພາະ ຄຊກມດ ໄດ້ມີຄວາມພະຍາຍາມ ໃນການຕິດຕາມ ການຈັດຕັ້ງປະຕິບັດກົດໝາຍ, ບັນດາແຜນການ, ແຜນງານ ພ້ອມທັງ ອອກນິຕິກຳລະບຽບການຕ່າງໆ ເພື່ອຮັບປະ ກັນ ການຈຳກັດທຸກຮູບແບບ ໃນການໃຊ້ຄວາມຮຸນແຮງ ໂດຍສະເພາະ ແຜນດຳເນີນງານແຫ່ງຊາດ ເພື່ອປ້ອງກັນ ຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງ ຕໍ່ເດັກໃນແຕ່ລະໄລຍະ. ພ້ອມກັນນັ້ນ, ສປປ ລາວ ຍັງມີມາດ ຕະການຊ່ວຍເຫລືອແມ່ຍິງ ທີ່ເຄີຍຖືກຄວາມຮຸນແຮງ ແລະ ຖືກບາດເຈັບຈາກການໃຊ້ຄວາມຮຸນແຮງ ໃຫ້ສາມາດ ເຂົ້າເຖິງຂະບວນການຍຸຕິທໍາ ແລະ ໄດ້ຮັບການຊ່ວຍເຫລືອຕ່າງໆ ໂດຍລັດຖະບານໄດ້ອອກດຳລັດ ວ່າດ້ວຍການແກ້ ໄຂຂໍ້ຂັດແຍ່ງຂັ້ນບ້ານ ສະບັບເລກທີ 626/ລບ, ລົງວັນທີ 22 ຕຸລາ 2021; ສປປ ລາວ ໄດ້ມີການປຶກສາຫາລື ຮ່ວມກັບບັນດາຂະແໜງການ ເພື່ອໃຫ້ຄວາມຮູ້ກັບຂະແໜງການພາກລັດ ກ່ຽວກັບຊຸດບໍລິການທີ່ຈຳເປັນຂັ້ນພື້ນ ຖານ ໃນການຊ່ວຍເຫລືອດ້ານສຸຂະພາບ, ຍຸຕິທໍາ ແລະ ສັງຄົມ ສໍາລັບ ຜູ້ລອດຊີວິດຈາກຄວາມຮຸນແຮງ; ສປປ ລາວ ໄດ້ຜັນຂະຫຍາຍຊຸດບໍລິການ ທີ່ຈຳເປັນເຂົ້າໃນແຜນ ດຳເນີນງານແຫ່ງຊາດ ເພື່ອປ້ອງກັນ ແລະ ລຶບລ້າງຄວາມ ຮຸນແຮງຕໍ່ແມ່ຍິງ 5 ປີ ຄັ້ງທີ II (2021-2025) ໂດຍການສະໜັບສະໜູນ ຈາກອົງການ UNFPA ປະຈຳພາກພື້ນ ອາຊີປາຊີຟິກ ແລະ ປະຈຳ ສປປ ລາວ ເຊິ່ງແຜນດຳເນີນງານດັ່ງກ່າວ ໄດ້ລະບຸແຜນວຽກບູລິມະສິດ ແລະ ຕົວຊີ້ບອກ ທີ່ຈໍາເປັນ ໃນການພັດທະນາມາດຕະຖານດຳເນີນງານ ໃນແຕ່ລະຂະແໜງການ ໂດຍໃຫ້ສອດຄ່ອງກັບຊຸດບໍລິການທີ່ ຈຳເປັນ.

ເພື່ອສະໜັບສະໜູນການຈັດຕັ້ງປະຕິບັດ ແຜນດຳເນີນງານແຫ່ງຊາດ ເພື່ອປ້ອງກັນ ແລະ ລຶບລ້າງຄວາມ ຮຸນແຮງຕໍ່ແມ່ຍິງ ແລະ ເພື່ອຮັບປະກັນໃຫ້ຜູ້ລອດ ຊີວິດສາມາດເຂົ້າເຖິງ ແລະ ໄດ້ຮັບການບໍລິການອັນຈຳເປັນ ທີ່ ຕ້ອງແກ້ໄຂ ແລະ ທັນເວລານັ້ນ, ມາດຕະຖານດຳເນີນງານ ສຳລັບການບໍລິການດ້ານສຸຂະພາບ, ການບໍລິການດ້ານສັງ ຄົມ, ການບໍລິການດ້ານຂະບວນການຍຸຕິທໍາ ແລະ ມາດຕະຖານດຳເນີນງານການປະສານງານ, ຄຸ້ມຄອງການປະ ສານງານ ແລະ ການສົ່ງຕໍ່ ໄດ້ຖືກໂຄສະນາເຜີຍແຜ່ ແລະ ຈັດຕັ້ງປະຕິບັດໃນຂັ້ນສູນກາງ ແລະ ທ້ອງຖິ່ນ ຂອງ ສປປ ລາວ.

ໃນປີ 2024 ນີ້, ສປປ ລາວ ໄດ້ເອົາໃຈໃສ່ສ້າງຄວາມເຂັ້ມແຂງ ໃຫ້ກົນໄກທີ່ໃຫ້ບໍລິການຊ່ວຍເຫລືອ ແມ່ຍິງ ແລະ ເດັກທີ່ຖືກເຄາະຮ້າຍຈາກຄວາມຮຸນແຮງ ໂດຍໄດ້ຮັບຮອງເອົາຫລັກ ການຊ່ວຍເຫລືອທີ່ວ່າ “ບໍ່ມີປະຕູໃດ ທີ່ຜິດ''(No Wrong Door). ພ້ອມນັ້ນ ກໍໄດ້ຝຶກອົບຮົມໃຫ້ກັບພະນັກງານ, ເຈົ້າໜ້າທີ່ ທີ່ໃຫ້ບໍລິການຊ່ວຍເຫລືອ ຜູ້ຖືກເຄາະຮ້າຍ ຂັ້ນສູນກາງ ໃນ 6 ແຂວງ ແລະ 10 ເມືອງ ລວມທັງໝົດ 700 ເທື່ອຄົນ, ຍິງ 630 ເທື່ອຄົນ, ຊາຍ 70 ເທື່ອຄົນ. ແຕ່ງຕັ້ງຄະນະປະສານງານ ແລະ ສົ່ງຕໍ່ ໃນ 6 ແຂວງ ແລະ 6 ເມືອງ; ຂະຫຍາຍສູນໃຫ້ຄຳປຶກສາ ແລະ ປົກປ້ອງແມ່ຍິງ-ເດັກນ້ອຍ ໄດ້ 5 ສູນ, ປັບປຸງສະຖານທີ່ບໍລິ ການຊ່ວຍເຫລືອ ຜູ້ຖືກເຄາະຮ້າຍໃຫ້ໂຮງໝໍສູນ ກາງ 2 ແຫ່ງ ຄື: ໂຮງໝໍມະໂຫສົດ, ໂຮງໝໍແມ່ ເເລະ ເດັກ ເເລະ ສ້າງຈຸດບໍລິການປະຕູດຽວ (ການບໍລິການ ສຸຂະພາບ) ແຫ່ງທຳອິດຂອງ ສປປ ລາວ ທີ່ໂຮງໝໍມະໂຫສົດ ແລະ ມີເບີສາຍດ່ວນ 1527.

ຄຽງຄູ່ກັນນັ້ນ, ໄດ້ສ້າງຄວາມເຂັ້ມແຂງ ທາງດ້ານເສດຖະກິດ ໃຫ້ແມ່ຍິງໄດ້ເຂົ້າເຖິງແຫລ່ງທຶນ ເພື່ອສາມາດ ປະກອບ ແລະ ດຳເນີນທຸລະກິດ ຜ່ານກອງທຶນພັດທະນາ SME ດ້ວຍການສ້າງຄວາມເຂັ້ມແຂງ ໃນການເຂົ້າເຖິງ ດ້ານການເງິນ, ການພັດທະນາຂີດຄວາມສາມາດ ໃນການປັບປຸງການບໍລິການດ້ານການເງິນ, ເພີ່ມຄວາມຮູ້ໃຫ້ກັບ ຜູ້ບໍລິການດ້ານການເງິນ ກ່ຽວກັບການປະຕິບັດທີ່ດີ ໃນການອອກແບບ ແລະ ສົ່ງເສີມຜະລິດຕະພັນຂອງສະມາຊິກ SME ເພື່ອໃຫ້ເຂົາເຈົ້າດຳເນີນທະລະກິດຂະໜາດນ້ອຍ ແລະ ຂະໜາດກາງ ໃນແຕ່ລະຂະແໜງການ, ສົ່ງເສີມແມ່ຍິງ ຊາວກະສິກອນ ໄດ້ຮັບການຝຶກອົບຮົມວິຊາຊີບ, ເຕັກນິກວິຊາການ ເປັນຕົ້ນ ການຜະລິດກະສິກຳ, ການປູກຝັງ, ການລ້ຽງສັດ, ຫັດຖະກຳ, ການບໍລິການດ້ານການເງິນ, ການດຳເນີນທຸລະກິດ ສົ່ງຜົນໃຫ້ຊາວກະສິກອນເພດຍິງ ໄດ້ເຂົ້າເຖິງຊັບພະຍາກອນເສດຖະກິດ, ທີ່ດິນປູກຝັງ-ລ້ຽງສັດ; ໃຫ້ເງິນສົດ ເພື່ອອຸດໜູນແກ່ແມ່ຍິງຖືພາ ແລະ ເດັກກ່ອນໄວຮຽນ ສຳລັບເມືອງທີ່ທຸກຍາກ ໃນ ສປປ ລາວ; ພັດທະນາສີມືແຮງງານ ແລະ ຝຶກອົບຮົມເຄື່ອນ ທີ່ຕາມສາຂາອາຊີບຕ່າງໆ ພ້ອມທັງສົ່ງເສີມການຈັດຫາ ວຽກເຮັດງານທຳເຂົ້າສູ່ ຕະຫລາດແຮງງານພາຍໃນ ແລະ ຕ່າງ ປະເທດ ໃຫ້ແກ່ແມ່ຍິງ ແລະ ໄວໜຸ່ມ ທີ່ຢູ່ເຂດຫ່າງໄກສອກຫລີກ, ຜູ້ທຸກຍາກ ແລະ ຜູ້ດ້ອຍໂອກາດ. ທັງໝົດນີ້, ກໍເພື່ອຮັບປະກັນໃຫ້ແມ່ຍິງມີລາຍຮັບ, ສາມາດເພິ່ງພາຕົນເອງໄດ້, ພັດທະນາຊີວິດການເປັນຢູ່ໃຫ້ດີຂຶ້ນເປັນກ້າວໆ ເຮັດໃຫ້ແມ່ຍິງປາສະຈາກ ການຖືກຄວາມຮຸນແຮງ, ຄອບຄົວມີຄວາມສະຫງົບສຸກ, ສັງຄົມມີຄວາມສີວິໄລ.

• ພີ່ນ້ອງຮ່ວມຊາດ ທີ່ຮັກແພງທັງຫລາຍ!

ຂ້າພະເຈົ້າ, ຂໍຖືໂອກາດນີ້ ຕາງໜ້າໃຫ້ລັດຖະບານ ສະແດງຄວາມຊົມເຊີຍ ມາຍັງການຈັດຕັ້ງພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ, ອົງການປົກຄອງທ້ອງຖິ່ນ, ພາກເອກະ ຊົນ ຕະຫລອດຮອດປະຊາຊົນບັນດາເຜົ່າ ທີ່ໄດ້ປະກອບສ່ວນໃນວຽກງານຕ້ານ ແລະ ສະກັດກັ້ນຄວາມຮຸນແຮງ ເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງຢ່າງຕັ້ງໜ້າ.

ສະແດງຄວາມຂອບໃຈຢ່າງຈິງໃຈ ມາຍັງບັນດາປະເທດເພື່ອນມິດ, ຄູ່ຮ່ວມພັດທະນາ, ອົງການຈັດຕັ້ງສາ ກົນ ແລະ ອົງການຈັດຕັ້ງທາງສັງຄົມ ທີ່ໄດ້ໃຫ້ການສະໜັບສະໜູນ ສປປ ລາວ ໃນການຈັດຕັ້ງປະຕິບັດນະໂຍບາຍ ຂອງລັດຖະບານ ໃນວຽກງານດັ່ງກ່າວ.

ພວກເຮົາຕ້ອງສະແດງຈຸດຢືນຮ່ວມກັນ ເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ; ຮຽກຮ້ອງໃຫ້ທຸກພາກສ່ວນ ໃນຂະແໜງການພາກລັດ, ຄູ່ຮ່ວມພັດທະນາ, ອົງການຈັດຕັ້ງສັງຄົມ ແລະ ພາກທຸລະ ກິດເອກະຊົນ ຈົ່ງໄດ້ພ້ອມກັນຈັດຕັ້ງປະຕິບັດກົດໝາຍ ແລະ ນະໂຍບາຍທີ່ເປັນການສົ່ງເສີມ ຄວາມກ້າວໜ້າຂອງ ແມ່ຍິງ, ຄວາມສະເໝີພາບຍິງ-ຊາຍ ແລະ ລຶບລ້າງທຸກຮູບການຈຳແນກຕໍ່ແມ່ຍິງ ກໍຄື ການຈັດຕັ້ງປະຕິບັດ ແຜນ ດຳເນີນງານແຫ່ງຊາດ ເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງໃນຊຸມປີຕໍ່ໜ້າໃຫ້ ມີປະສິດທິພາບ ແລະ ປະສິດທິຜົນກວ່າເກົ່າ, ເອົາໃຈໃສ່ຢ່າງຕັ້ງໜ້າໃນການເພີ່ມທະວີ ການສ້າງຄວາມເຂັ້ມແຂງ ໃຫ້ ກົນໄກ ແລະ ບຸກຄະລາກອນ ທີ່ເຮັດວຽກງານດັ່ງກ່າວ ຢ່າງເປັນລະບົບຕໍ່ເນື່ອງ. ເຮັດໃຫ້ຜູ້ກະທໍາຄວາມຮຸນແຮງ ຕໍ່ແມ່ຍິງ ແລະ ເດັກຍິງຕ້ອງມີຄວາມຮັບຜິດຊອບ ຕໍ່ການກະທໍາຂອງຕົນ ແລະ ຕໍ່ໜ້າກົດໝາຍ; ຈັດສັນຊັບພະຍາ ກອນ ແລະ ລົງທຶນໃສ່ການຈັດຕັ້ງປະຕິບັດ ວຽກງານຄວາມ ກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ ແລະ ລຶບລ້າງທຸກຮູບການຈຳແນກຕໍ່ແມ່ຍິງ ຜ່ານຂະບວນການ ແລະ ວິທີການຕ່າງໆ ເພື່ອໃຫ້ທຸກຄົນໃນສັງຄົມ ປັບປ່ຽນ ທັດສະນະຄະຕິ ແລະ ພຶດຕິກໍາ ທີ່ເປັນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ແລະ ຕ້ອງເຂົ້າໃຈຮ່ວມກັນ ວ່າການກະທໍາຄວາມຮຸນແຮງຕໍ່ແມ່ຍິງ ແລະ ເດັກຍິງ ເປັນການລະເມີດສິດທິມະນຸດພື້ນຖານຂອງແມ່ຍິງ ແລະ ມີຄວາມຜິດທາງດ້ານກົດໝາຍ.

ທ້າຍສຸດນີ້, ຂ້າພະເຈົ້າ ຂໍອວຍພອນໃຫ້ການລະນຶກເຖິງ ວັນສາກົນ ເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ພາຍໃຕ້ຄຳຂວັນ “ກ້າວເຂົ້າສູ່ 30 ປີ ຂອງຖະແຫລງການ ແລະ ແຜນປະຕິບັດງານປັກກິ່ງ: ຮ່ວມກັນເພື່ອຢຸດຕິ ການໃຊ້ຄວາມຮຸນແຮງ ຕໍ່ແມ່ຍິງ ແລະ ເດັກຍິງ” ໃນປີ 2024 ນີ້ ຈົ່ງບັນລຸຜົນສຳເລັດຕາມລະດັບຄາດ ໝາຍທີ່ວາງໄວ້, ອວຍພອນໃຫ້ພີ່ນ້ອງຮ່ວມຊາດ ປາສະຈາກຄວາມຮຸນແຮງທຸກປະເພດ, ສັງຄົມມີສະເໝີພາບຍິງ-ຊາຍ, ປະເທດຊາດມີຄວາມສີວິໄລ.

KPL