ຂປລ
ຍີ່ປຸ່ນ ມີແຜນຈະສົ່ງເສີມ ກຸ່ມຜູ້ຜະລິດລົດໃນການຜະລິດລົດນັ່ງ ສ່ວນບຸກຄົນລຸ້ນໃໝ່ທຸກຄັນໃຫ້ສາມາດ ໃຊ້ງານຮ່ວມກັບ ນ້ຳມັນເຊື້ອໄຟຊີວະພາບໄດ້ພາຍໃນປີ 2030 ເພື່ອຫລຸດຜ່ອນ ການປ່ອຍອາຍແກັສກາກບອນໄດອອກໄຊ ຈາກຍານພາຫະນະທີ່ໃຊ້ນໍ້າມັນ ແອັດຊັງ.
ຂປລ.ສຳນັກຂ່າວຊິນຮວາຂອງ ສປຈີນ, ນັກຂ່າວ ຍີ່ປຸ່ນ ລາຍງານວ່າ: ຍີ່ປຸ່ນ ມີແຜນຈະສົ່ງເສີມ ກຸ່ມຜູ້ຜະລິດລົດ ໃນການຜະລິດລົດນັ່ງ ສ່ວນບຸກຄົນລຸ້ນໃໝ່ ທຸກຄັນໃຫ້ສາມາດ ໃຊ້ງານຮ່ວມກັບ ນ້ຳມັນເຊື້ອໄຟ ຊີວະພາບໄດ້ພາຍໃນປີ 2030 ເພື່ອຫລຸດຜ່ອນ ການປ່ອຍອາຍແກັສ ກາກບອນໄດອອກໄຊ ຈາກຍານພາຫະນະ ທີ່ໃຊ້ນໍ້າມັນ ແອັດຊັງ. ສຳລັບ ເປົ້າໝາຍໃໝ່ນີ້ ແນໃສ່ກະຕຸ້ນ ໃຫ້ຜູ້ຄ້າສົ່ງນໍ້າມັນ ເລີ່ມຈັດຫານ້ຳມັນ ແອັດຊັງປະສົມ ໄບໂອເອທານໍລ(bioethanol) ໃນອັດຕາສ່ວນ 10% ພາຍໃນປີ 2030 ແລະ ມີແຜນ ຈະເພີ່ມ ອັດຕາສ່ວນເປັນ 20% ພາຍໃນປີ 2040, ຊຶ່ງກະຊວງອຸດສາຫະກຳ ພວມພິຈາລະນາ ບັງຄັບໃຊ້ແຜນການນີ້ ດ້ວຍການອອກ ເປັນກົດໝາຍ. ນອກນີ້ທາງກະຊວງ ຍັງໄດ້ກຽມແຜນການ ປະຕິບັດງານ ຊຶ່ງຄາດວ່າ ຈະໄດ້ຂໍ້ສະຫລຸບ ໃນໄລຍະ 2025 ແລະ ຈະສະໜັບສະໜູນ ການປັບປຸງ ສະຖານີ ບໍລິການນໍ້າມັນ ທີ່ຈຳເປັນ ເພື່ອຮອງຮັບ ນ້ຳມັນເຊື້ອໄຟ ປະສົມ ໄບໂອເອທານໍລ ທີ່ເປັນມິດຕໍ່ສິ່ງແວດລ້ອມ. ສຳລັບ bioethanolແມ່ນຜະລິດ ຈາກສາລີແລະອ້ອຍ ຊຶ່ງຊ່ວຍດູດຊຶມ ອາຍກາກບອນໄດອອກໄຊ ໃນລະຫວ່າງ ການສັງເຄາະແສງ ໂດຍເຊື່ອວ່າ ຂະບວນການ ທໍາມະຊາດນີ້ ມີສ່ວນ ຊ່ວຍຊົດເຊີຍ ການປ່ອຍອາຍພິດ ກາກບອນໄດອອກໄຊ ຈາກການເຜົາໃໝ້ ຂອງນໍ້າມັນເຊື້ອໄຟປະສົມ bioethanol./.
KPL
