*ປັດຈຸບັນຫລາຍທ່ານກໍຫັນມາເຮັດການຜະລິດກະສິກໍາປູກຝັງ-ລ້ຽງສັດ ຫລາຍຂຶ້ນແບບກ້າວກະໂດດ ເພື່ຶອປະຕິຕາມນະໂຍບາຍຂອງພັກ-ລັດຖະບານໂດຍເພີ່ມທະວີເອົາໃຈໃສ່ຫັນເປັນເສດຖະກິດເອກະລາດເພີ່ງຕົນເອງກຸ້ມຕົນເອງເທື່ອລະກ້າວໃນຕໍ່ຫນ້າ, ພ້ອມດຽວກັນນີ້ຍັງເປັນການສົ່ງເສີ່ມໃຫ້ຖັນແຖວກອງທັບເພີ່ມທະວິການເຮັດພາລາກັບທີ່, ເພີ່ມຄວາມສະດຸ້ງໄວເຮັດໃຫ້ພະນັກງານ, ລັດຖະກອນ ແລະ ພໍ່ແມ່ປະຊາຊົນຮູ້ປູກຮູ້ລ້ຽງເພື່ອຮັບປະກັນຄັງສະບຽງອາຫານໃຫ້ພຽງພໍໃນການບໍລິໂພກ-ຂາຍເປັນສິນຄ້າ ແລະ ຈະຊ່ວຍແກ້ໄຂຄວາມທຸກຍາກເປັນກ້າວໆ ເຊິ່ງນັ້ນຈະສາມາດຊ່ວຍຫລຸດຜ່ອນລາຍຈ່າຍປະຈໍາວັນໄດ້ດີ ທ່າມກາງທ່າອ່ຽງເສດຖະກິດໂລກມີຫຍຸ້ງຍາກ,ເງິນເຟີ້ ແລະ ອື່ນໆ.

    ເມື່ອບໍ່ດົນມານີ້ ຜູ້ຂຽນເອງໄດ້ມີໂອກາດໄປຢ້ຽມຢາມສວນຂອງທ່ານ ນາງ ແພງພອນ ຂັນທະຍົງທອງ ວິລະຊົນແຫ່ງຊາດ, ຄົນຫຼ້າສຸດຂອງປະເທດລາວ, ອະດີດແພດທະຫານກ້າ ແລະ ເປັນໜຶ່ງໃນຈຳນວນແມ່ຍິງລາວ ທີ່ມີນຳ້ໃຈອົງອາດກ້າຫານ ທີ່ເສຍສະຫລະຕໍ່ປະເທດຊາດ ຊຶ່ງໄດ້ຍືນຢູ່ແຖວໜ້າ ແລະ ຕໍ່ສູ້ກູ້ຊາດ ຄຽງບ່າຄຽງໄຫລ ບໍ່ໜ້ອຍໜ້າເພດຊາຍ ເພື່ອຕ້ານຜູ້ຮຸກຮານນໍ້າແດນດິນ ແລະ ຜືນແຜ່ນດິນອັນຄົບຖ້ວນຂອງ ສາທາລະນະລັດ ປະຊາທິປະໄຕ ປະຊາຊົນລາວ ໂດຍສະເພາະ ແມ່ນບັນຮົບ 3 ໝູ່ບ້ານ ເມືອງບໍ່ແຕນ ແຂວງໄຊຍະບູລີ ຊຶ່ງໃນເວລານັ້ນ ທ່ານ ນາງ ແພງພອນ ຂັນທະຍົງທອງ ໄດ້ປະຕິບັດໜ້າທີ່ໃນການປິ່ນປົວພໍ່-ແມ່ປະຊາຊົນ ແລະ ບັນດາສະຫາຍນັກຮົບທີ່ບາດເຈັບ ແລະ ທັງຈັບປືນຕໍ່ສູ້ຕີຖອຍ ໂດຍບໍ່ຄິດເສຍດາຍຊີວິດ ເພື່ອປົກປ້ອງເອກະລາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດລາວ ນໍາເອົາຄວາມຊຸມເຢັນເປັນສຸກ, ຄວາມສີວິໄລ ມາສູ່ປະຊາຊົນລາວທັງຊາດ.

     ແນວໃດກໍດີ ພາຍຫລັງສິ້ນສຽງປືນແຕກ, ທ່ານ ນາງ ແພງພອນ ຂັນທະຍົງທອງ ໄດ້ກັບຄືນສູ່ບ້ານເກີດ ແລະ ສືບຕໍ່ຍຶດຫມັ້ນຕາມແນວທາງອັນຖືກຂອງພັກ-ລັດຖະບານຄື: ປົກປັກຮັກສາ ແລະ ສາ້ງສາພັດທະນາປະເທດຊາດຢ່າງຕັ້ງຫນ້າ ປັດຈຸບັນນີ້ ເພີ່ນໄດ້ກາຍເປັນປະທານບໍລິສັດ ແພງພອນ ກໍ່ສ້າງ ແລະ ຂົວທາງ ຈຳກັດພຽງຜູ້ດຽວ, ເຊິ່ງຍັງສືບຕໍ່ນຳພາອ້າຍນ້ອງລູກຫຼານຢູ່ ບ້ານນາທອນ ໂດຍສະເພາະກອງພັນ 513 ໃຫ້ເອົາໃສ່ການທໍາມາຫາກິນຄື:  ການເຮັດ “ພາລາກັບທີ່“ ຜະລິດກະສິກໍາພາຍໃນສວນ ບໍ່ວ່າຈະປູກເຂົ້າໄຮ່, ປູກຜັກ, ປູກໄມ້ກິນຫມາກ ແລະ ລ້ຽງສັດເຊັ່ນ: ປາ, ງົວ, ໄກ່, ເປັດ ແລະ ອື່ນໆ ເພື່ອສະຫນອງໃຫ້ອ້າຍນ້ອງທະຫານນຳມາປະກອບປຸງແຕ່ງອາຫານໃນຊີວິດປະຈຳວັນຕ່າງໆ ໂດຍສະເພາະສິ່ງທີ່ສົນໃຈແມ່ນໄດ້ນຳເອົາພັນເຂົ້າໄຮ່ ມາແຕ່ບ້ານເກີດຂອງເພີ່ນ(ຊຳເໜືອ)ມາປູກຄັ້ງທຳອິດແມ່ນໄດ້ຮັບຜົນດີຫລາຍ ໂດຍໃຊ້ວິທີປູກແບບທຳມະຊາດບໍ່ໄດ້ໃສ່ປຸ໋ຍເຄມີໃດໆພຽງ 3 ເດືອນເທົ່ານັ້ນແມ່ນໄດ້ເກັບກ່ຽວແລ້ວ ເຊິ່ງຜົນຜະລິດທັງຫມົດພາຍໃນສວນນັ້ນ ແມ່ນສະຫນອງເປັນສະບຽງອາຫານໃຫ້ລູກຫລານທະຫານເອງ.

     ທ່ານຍັງໃຫ້ຮູ້ອີກວ່າ: ນອກຈາກປູກເຂົ້າໄຮ່ແລ້ວ, ລ້ຽງສັດຫລາຍຊະນິດເພືີ່ອສະຫນອງໃຫ້ອ້າຍນ້ອງ, ລູກຫລານທະຫານຢູ່ບໍລິເວນໄກ້ຄຽງອີກດ້ວຍ. ນອກຈາກນັ້ນຍັງລະດົມໃຫ້ລູກຫລານ,ອ້າຍນ້ອງທະຫານເພີ່ມທະວີຮັກມູນເຊື້ອອົງອາດກ້າຫານ, ດຸຫມັ່ນ, ອົດທົນ, ຮັກຊາດຮັກການພັດທະນາ ໂດຍສະເພາະວັນເສົາ-ທິດອອກແຮງງານເກັບໄວ້ລົ້ມ ແລະ ໄມ້ເສດທີ່ຕາຍແລ້ວໃນປ່າໄກ້ຄຽງເອົາມາເຮັດຝືນດັງໄຟເພື່ອຫລຸດຜ່ອນການໃຊ້ຈ່າຍນໍາອີກ. ນັ້ນ ເປັນການປູກຈິດສໍານຶກໃຫ້ອ້າຍນ້ອງລູກຫຼານມູນເຊື້ອໃຊ້ໃຫ້ເປັນປະໂຫຍກໃນການດຳລົງຊິວິດເມື່ອຍາມອອກໄປສ້າງຄອບຄົວຂອງເຂົາເຈົ້າ.

     ທ່ານຍັງເລົ່າໃຫ້ຟັງອີກວ່າ: ພວກນ້ອງເຫັນບໍ່ທາງທີ່ພວກນ້ອງເຂົ້າມາຫາສວນ ນັ້ນແມ່ນຜົນງານຂອງເອື້ອຍທີ່ໄດ້ນຳເອົາທຶນຮອນສ່ວນຕົວ ຊ່ວຍເຫືຼອເຮັດທາງຈົນສຳເລັດ ແລະ  ມີຄວາມສະດວກສະບາຍຈົນເຂົ້າເຖິງຄາຍທະຫານກອງພັນ 513 ນັ້ນ ແມ່ນທາງກອງພັນເພີ່ນໄດ້ມອບດິນສ່ວນແຫ່ງນີ້ໃຫ້ເອື້ອຍເພື່ອຕອບແທນທີ່ຊ່ວຍນຳທຶນສ່ວນຕົວມາສ້າງທາງໃຫ້ ສະນັ້ນເອື້ອຍກໍຂໍຂອບໃຈ ນໍ້າໃຈຂອງເພິ່ນທີ່ມອບໃຫ້ໃນຄັ້ງນີ້. ນອກຈາກນັ້ນຍັງເປັນການບໍ່ໃຫ້ບາງກຸ່ມຄົນເຂົ້າໃຈຜິດວ່າເອື້ອຍໄປເອົາດິນຂອງເພິ່ນມາຫຼ້າໆ, ການຈັດຕັ້ງເພິ່ນໄດ້ເຫັນຄວາມສຳຄັນຕໍ່ຜົນງານຂອງຂ້າພະເຈົ້າ ຍ້ອນພັກ-ລັດ ເພິ່ນເຫັນນຳໃຈຄວາມດີເຊື່ອໝັ້ນຂອງເຮົາຈົນມາຮອດທຸກມື້ນີ້.