*ເຖິງແມ່ນວ່າງານກິລາໂອລິມປິກລະດູຮ້ອນຄັ້ງທີ 33 (ສິງຫາ2024) ແລະ ງານກິລາໂອລິມປິກຄົນພິການປາຣີຄັ້ງທີ 17( 28 ສິງຫາ ຫາ ວັນທີ 8 ກັນຍາ2024) ທີ່ໄດ້ຈັດຂຶ້ນຢູ່ນະຄອນຫຼວງປາຣີ ຂອງຝຣັ່ງໄດ້ອັດລົງແລ້ວ, ແຕ່ສິ່ງໜຶ່ງທີ່ຊາວໂລກຍັງຈົດຈໍາຕະຫຼອດມາແມ່ນຜົນງານການປະກອບສວ່ນຂອງຄະນະນັກກິລາທີມຊາດຈີນ, ໃນນັ້ນນັກກິລາຄົນພິການທີມຊາດຈີນ ຊີງໄດ້ທັງໝົດ 220 ຫລຽນ, ໃນນັ້ນໄດ້ 94 ຫລຽນຄຳ, 76 ຫລຽນເງິນ ແລະ 50 ຫລຽນທອງ, ເຊິ່ງໄດ້ສ້າງຜົນງານທີ່ໜ້າອັດສະຈັນໃຫ້ແກ່ຊາວໂລກ. ນັບແຕ່ງານກິລາໂອລິມປິກ ຄົນພິການ ອາແຕນ 2004 ເປັນຕັ້ນມາ, ຈີນໄດ້ຄອງເຈົ້າຫລຽນຄຳ ມາໂດຍຕະຫລອດ ແລະ ເປັນອັນດັບທີ 1 ໃນຕາຕະລາງ ສະຫລຸບຫລຽນງານກິລາໂອລິມປິກຄົນພິການເຖິງ 6 ຄັ້ງຕິດຕໍ່ກັນ. ສວ່ນໃນງານກິລາໂອລິມປິກລະດູຮ້ອນຄັ້ງທີ 33 ເຖິງແມ່ນວ່າຈະບໍ່ໄດ້ຕິດເປັນອັນດັບໜຶ່ງຂອງຕາຕະລາງທີ່ໄດ້ຮັບຫຼຽນຫຼາຍທີ່ສຸດ, ແຕ່ຄະນະນັກກິລາທີມຊາດຈີນກໍສາມາດສ້າງຜົນງານໄດ້ດີທີ່ສຸດໃນງານກິລາໂອລິມປິກປາຣີ 2024 ຄືຍາດໄດ້ 40 ຫຼຽນຄຳ, 27 ຫຼຽນເງິນ ແລະ 24 ຫຼຽນທອງ ລວມທັງໝົດ 91 ຫຼຽນ,ເຊິ່ງໃນງານຄັ້ງນີ້, ຈີນໄດ້ສົ່ງຄະນະນັກກິລາທີມຊາດເຂົ້າຮ່ວມທັງໝົດ 404 ຄົນ ລົງແຂ່ງຂັນ 30 ກວ່າຊະນິດກິລາ ມີຈຳນວນ 200 ກວ່າລາຍການ.

     ໃນນັ້ນ ມີ 12 ລາຍການໄດ້ຮັບຫຼຽນຄຳງານກິລາໂອລິມປິກເປັນເທື່ອທຳອິດ, ມີ 8 ລາຍການໄດ້ຮັບຫຼຽນໂອລິມປິກເປັນເທື່ອທຳອິດ ແລະ ຍັງມີ 13 ລາຍການໄດ້ສ້າງສະຖິຕິດີທີ່ສຸດໃນປະຫວັດສາດທີ່ເຂົ້າຮ່ວມງານກິລາໂອລິມປິກ. ໃນບົດນີ້, ຜູ້ຂຽນຂໍຍົກໃຫ້ເຫັນເຖິງຄວາມໂດດເດັ່ນຂອງນັກກິລາຈີນ ແມ່ນນັກກິລາລຸ້ນສືບທອດສາມາດຍາດໄດ້ຫຼຽນຄຳກິລາໂອລິມປິກປາຣີລະດູຮ້ອນຄັ້ງທີ 33 ເຊັ່ນນາງສວນຫົງສານອາຍຸພຽງແຕ່ 17 ປີ ແລະ ນາງເສິນຢູ້ຊີອາຍຸ 19 ປີ ທັງສອງຍາດໄດ້ຫຼຽນຄຳໂດດນ້ຳຈາກແທ່ນ 10 ແມັດຄູ່ຍິງ. ສວ່ນນາງເຈິ້ນຊິນເວີນອາຍຸພຽງ 21 ປີຄວ້າໄດ້ຫຼຽນຄຳຍິງດ່ຽວໃນການແຂ່ງຂັນເຕັນນິດຂອງງານກິລາໂອລິມປິກປາຣີເປັນຄັ້ງປະຫວັດສາດ. ພ້ອມນັ້ນ, ທ້າວ ພານຈານເລີ ທີ່ມີອາຍຸ 20 ປີຍັງໄດ້ທຳ ລາຍສະຖິຕິໂລກ ແລະ ຍາດໄດ້ຫຼຽນຄຳໃນການແຂ່ງຂັນລອຍນ້ຳທ່າຟຣີສະໄຕ 100 ແມັດຊາຍ, ນາງເຊິ້ງລີຮາວ ອາຍຸ 19 ປີ ແລະ ນາງຮວງຢູຖິງ ອາຍຸ 17 ປີຍາດໄດ້ຫຼຽນຄຳຫຼຽນທຳອິດໃຫ້ແກ່ທີມຊາດຈີນໃນງານກິລາໂອລິມປິກປາຣີຈາກລາຍການຍິງປືນ ແລະ ນາງ ເຈິ້ງຮາວຮາວ ອາຍຸພຽງ 11 ປີ ເປັນນັກກິລາສະເກັດທີ່ໜຸ່ມທີ່ສຸດໃນທີມຊາດຂອງຈີນຊຸດນີ້ ແລະ ປີ 2024 ນີ້ ລາວຫາກໍຮຽນຈົບໂຮງຮຽນປະຖົມເທົ່ານັ້ນ. ພິເສດ,ໃນການແຂ່ງຂັນລາຍການປີ່ງປ່ອງ, ທີມປິ່ງປ່ອງຊາຍຈີນໄດ້ຊະນະທີມປິ່ງປ່ອງຊາຍຊູູແອດດ້ວຍ 3:0, ຊີງໄດ້ຫຼຽນຄຳເປັນຄັ້ງທີ 5 ລຽນຕິດ. ທ້າວ ໝ້າລົງ(Ma Long) ອາຍຸ 35 ປີ ນັກກິລາປິ່ງປ່ອງອາວຸໂສຂອງຈີນ ໄດ້ຮັບຫຼຽນຄຳຫຼຽນທີ 6 ຂອງງານກິລາໂອລິມປິກ,ກາຍເປັນນັກກິລາຂອງຄະນະນັກກິລາຈີນທີ່ໄດ້ຮັບຫຼຽນຄຳຫຼາຍທີ່ສຸດໃນປະຫວັດສາດຂອງງານກິລາໂອລິມປິກ ແລະ ໃນການແຂ່ງຂັນປີ່ງປ່ອງປະເພດທີມຍິງຮອບຊີງຊະນະເລີດຂອງງານກິລາໂອລິມປິກປາຣີ, ທີມຈີນໄດ້ຊະນະທີມຍີ່ປຸ່ນ, ຊີງໄດ້ຫຼຽນຄຳ ເຊິ່ງເປັນການຊີງໄດ້ຫຼຽນຄຳ 5 ຄັ້ງລຽນຕິດກັນໃນງານກິລາໂອລິມປິກ. ທີມຈີນໄດ້ຄວ້າຫຼຽນຄຳ 5 ຫຼຽນ ຄືເປັນຫຼຽນຄຳທັງໝົດຂອງລາຍການປິ່ງປ່ອງໃນງານກິລາໂອລິມປິກເປັນຄັ້ງທຳອິດ.ສວ່ນໃນການແຂ່ງຂັນລອຍນ້ຳຟຣີສະໄຕ 100 ແມັດຊາຍ, ທ້າວ ພ່ານຈັນເລີ້ ນັກກິລາຈີນໄດ້ບຸກທະລຸສະຖິຕິໂລກທີ່ຕົນເອງເຄີຍສ້າງຂຶ້ນມາແລ້ວ ແລະ ຍາດໄດ້ຮັບຫຼຽນຄຳດ້ວຍ ເວລາ 46 ວິນາທີ 40 ລິບດາ.

     ນີ້ແມ່ນຫຼຽນຄຳຫຼຽນທຳອິດ ໃນລາຍການລອຍນ້ຳຟຣີສະໄຕຊາຍຂອງງານກິລາໂອລິມປິກໃນປະຫວັດສາດກິລາລອຍນ້ຳຂອງຈີນ. ຫຼັງການແຂ່ງຂັນ, ທ້າວ ພ່ານຈັນເລີ້ໃຫ້ສຳພາດວ່າ:“ມື້ນີ້ ໄດ້ເອົາຊະນະໝົດທຸກຄົນທີ່ເຄີຍດູໝິ່ນພວກເຮົາ! ການທີ່ສາມາດບຸກທະລຸສະຖິຕິໂລກໃນສະທີ່ລອຍຍາກລໍາບາກແບບນີ້ ແມ່ນຍ້ອນຄວາມຫວັງຂອງທຸກຄົນ, ຂ້າພະເຈົ້າສຳຜັດໄດ້ກ່ອນເວລາທີ່ລົງສະ”. ສໍາລັບການແຂ່ງຂັນຮອບຊິງຫຼຽນຄໍາເທັນນິດປະເພດຍິງດ່ຽວ, ນາງເຈີ້ງຊິນເວີນ ນັກກິລາຈີນໄດ້ເອົາຊະນະນາງໂດນນາ ເວກິກ ນັກກິລາປະເທດໂກຣອາຊີດ້ວຍຄະແນນ 2:0, ຍາດໄດ້ຫຼຽນຄຳ. ນີ້ແມ່ນຫຼຽນຄຳຫຼຽນທຳອິດທີ່ນັກກິລາຈີນຊິງໄດ້ໃນການແຂ່ງຂັນເທັນນິດປະເພດຍິງດ່ຽວຂອງງານກິລາໂອລິມປິກ ທັງແມ່ນນັກກິລາເທັນນິດຈີນຍາດໄດ້ຫຼຽນຄຳໃນງານກິລາໂອລິມປິກອີກຄັ້ງໜຶ່ງໃນຮອບ 20 ປີ ພາຍຫຼັງນັກກິລາຈີນໄດ້ແຊມໃນການແຂ່ງຂັນເທັນນິດປະເພດຄູ່ຍິງຂອງງານກິລາໂອລິມປິກອາແຕນ 2004. ເມື່ອທຽບໃສ່ຜົນການແຂ່ງຂັນແລ້ວ, ສິ່ງທີ່ເຮັດໃຫ້ພວກເຮົາຮູ້ສຶກປິຕິຊົມຊື່ນຫຼາຍທີ່ສຸດນັ້ນກໍຄືຄວາມໝັ້ນໃຈ ແລະ ຄວາມມີຊີວິດຊີວາຂອງນັກກິລາທີ່ຍັງໜຸ່ມແໜ້ນເຫຼົ່ານນີ້. ໃນສະໜາມແຂ່ງຂັນ, ພວກເຂົາເຈົ້າເປັນດາລາກິລາທີ່ໂດດເດັ່ນຫຼາຍ ເຊິ່ງໄດ້ສູ້ຊົນຜ່ານຜ່າຢ່າງອົງອາດກ້າຫານ ແລະ ບໍ່ມີຄວາມສະທ້ານຢ້ານກົວ. ແຕ່ຢູ່ນອກສະໜາມການແຂ່ງຂັນ, ພວກເຂົາເຈົ້າເປັນຄືເດັກນ້ອຍທຳມະດາທົ່ວໄປ, ມັກຫຼິ້ນມັກມ່ວນ, ເຮັດໃຫ້ຊາວເນັດຫຼາຍຄົນຮູ້ສຶກວ່າ “ເຮົາສາມາດຊອກຫາຈຸດຮ່ວມກັນກັບແຊັມໂອລິມປິກໄດ້ຢ່າງງ່າຍດາຍ.” ຕໍ່ຜົນສຳເລັດດັ່ງກ່າວ, ບໍ່ພຽງແຕ່ຊາວໂລກໃຫ້ການຍ້ອງຍໍຊົມເຊີຍນັກກິລາຈີນ ນອກຈາກຍາດໄດ້ຫຼຽນແລ້ວ ຍັງເປັນນັກກິລາທີ່ໄດ້ຮັບການຢັ້ງຢືນທີ່ມີການຫຼີ້ນໃນມາດຕະຖານ ໂອລິມປິກສາກົນຢ່າງແທ້ຈິງ ແລະ ບໍ່ມີການໃສ່ສານກະຕຸ້ນຕາມການໃສ່ຮ້າຍປ້າຍສີຂອງຜູ້ບໍ່ຫວັງດີ.

***ອ່ານຕໍ່ສະບັບໜ້າ***

ໂດຍ:ດວງຈິດສະຫວັດບຸນມີ