ຂປລ
ກຳປູເຈຍ ແລະ ໂຄງການພັດທະນາ ແຫ່ງສະຫະປະຊາຊາດ (ຢູເອັນດີພີ) ສະຫລຸບນະໂຍບາຍ ກ່ຽວກັບການຊຸກຍູ້ໃຫ້ກຳປູເຈຍ ຫລຸດພົ້ນຈາກສະຖານະພາບ ປະເທດ ດ້ອຍພັດທະນາພາຍໃນປີ 2029.
ຂປລ.ສຳນັກຂ່າວຊິນຮວາຂອງ ສປຈີນ, ເມື່ອບໍ່ດົນມານີ້, ກຳປູເຈຍ ແລະ ໂຄງການພັດທະນາ ແຫ່ງສະຫະປະຊາຊາດ (ຢູເອັນດີພີ) ສະຫລຸບນະໂຍບາຍ ກ່ຽວກັບການຊຸກຍູ້ໃຫ້ກຳປູເຈຍ ຫລຸດພົ້ນຈາກສະຖານະພາບ ປະເທດ ດ້ອຍພັດທະນາພາຍໃນປີ 2029.
ເອກະສານດັ່ງກ່າວປະເມີນ ເຖິງໂອກາດ ການສູນເສຍ ມາດຕະການສະໜັບສະໜູນ ສາກົນເຊັ່ນ: ຂໍ້ສະເໜີທີ່ໃຫ້ຍົກເວັ້ນ ການປະຕິບັດຕາມຄວາມຕົກລົງ ການຄຸ້ມຄອງ ຊັບສິນທາງປັນຍາ (TRIPS waivers) ພາຍໃຕ້ກົດຂອງອົງການ ການຄ້າໂລກ (ດັບເບີລຢູທີໂອ) ການເຂົ້າເຖິງຕະຫລາດ ໂດຍໄດ້ຮັບ ສິດທິພິເສດ ແລະ ການຈັດຫາເງິນທຶນ ແບບຫລຸດຜ່ອນອື່ນໆ ຊຶ່ງອາດສົ່ງຜົນຕໍ່ ສາທາລະນະສຸກ, ສິນຄ້າສົ່ງອອກ ທີ່ສຳຄັນເຊັ່ນ: ເສື້ອຜ້າສຳເລັດຮູບ, ເຂົ້າສານ ແລະ ລົດຖີບ ແລະ ຫລຸດການເຕີບໂຕ ທາງເສດຖະກິດ ໂດຍລວມ.
ຂະນະທີ່ ການເຕີບໂຕຂອງ ລວມຍອດ ຜະລິດຕະພັນ ພາຍໃນປະເທດ (ຈີດີພີ) ຫລຸດລົງ 0,5-1,5% ແລະ ອາດມີການສູນເສຍ ຕຳແໜ່ງງານ 165.000 ຕຳແໜ່ງ, ໂດຍສະເພາະ ໃນກຸ່ມຜູ້ຍິງ ທີ່ເຮັດວຽກ ໃນພາກສ່ວນ ເສື້ອຜ້າສຳເລັດຮູບ ຊຶ່ງຈະສົ່ງຜົນ ໃຫ້ປະຊາຊົນ ປະມານ 432.000 ຄົນ ສ່ຽງຕົກຢູ່ ໃນຄວາມທຸກຍາກ ຫາກບໍ່ວາງພື້ນຖານ ທີ່ຖືກຕ້ອງໃຫ້ໄວ ທີ່ສຸດ./.
KPL
