ຂປລ
ຂປລ. ເມືອງເຟືອງ ແຂວງວຽງຈັນ ເປັນເມືອງທີ່ມີແຫລ່ງທ່ອງທ່ຽວ ທີ່ຫລາກຫລາຍທາງດ້ານວັດທະນະທຳ ແລະ ທຳມະຊາດ ທີ່ດຶງດູດຄວາມສົນໃຈ ຂອງນັກທ່ອງທ່ຽວພາຍໃນ ແລະ ຕ່າງປະເທດ ເຂົ້າໄປທ່ຽມຊົມຄວາມສວຍງາມ ໃນແຕ່ລະວັນ, ນັບແຕ່ຕົ້ນປີ 2024 ມາຮອດປັດຈຸບັນ, ມີນັກທ່ອງທ່ຽວຫລາຍກວ່າ 146.686 ເທື່ອຄົນ, ຄາດວ່າໝົດປີ 2024 ນີ້, ຈະສ້າງລາຍຮັບຈາກການບໍລິການທ່ອງທ່ຽວເກືອບ 30 ຕື້ກີບ.
ຂປລ. ເມືອງເຟືອງ ແຂວງວຽງຈັນ ເປັນເມືອງທີ່ມີແຫລ່ງທ່ອງທ່ຽວ ທີ່ຫລາກຫລາຍທາງດ້ານວັດທະນະທຳ ແລະ ທຳມະຊາດ ທີ່ດຶງດູດຄວາມສົນໃຈ ຂອງນັກທ່ອງທ່ຽວພາຍໃນ ແລະ ຕ່າງປະເທດ ເຂົ້າໄປທ່ຽມຊົມຄວາມສວຍງາມ ໃນແຕ່ລະວັນ, ນັບແຕ່ຕົ້ນປີ 2024 ມາຮອດປັດຈຸບັນ, ມີນັກທ່ອງທ່ຽວຫລາຍກວ່າ 146.686 ເທື່ອຄົນ, ຄາດວ່າໝົດປີ 2024 ນີ້, ຈະສ້າງລາຍຮັບຈາກ ການບໍລິການທ່ອງທ່ຽວເກືອບ 30 ຕື້ກີບ.
ທ່ານ ຄໍາເພັດ ຈັນສົມພູ ເຈົ້າເມືອງໆເຟືອງ ໄດ້ໃຫ້ສໍາພາດຕໍ່ສໍ່ມວນຊົນ ສໍານັກຂ່າວສານປະເທດລາວ ໃນທ້າຍອາທິດຜ່ານມາວ່າ: ພາຍຫລັງທີ່ການລະບາດ ຂອງພະຍາດໂຄວິດ-19 ຢຸດຕິລົງ: ວຽກງາການທ່ອງທ່ຽວ ແລະ ການພັດທະນາ ການທ່ອງທ່ຽວຢູ່ເມືອງເຟືອງ ໄດ້ມີທ່າຂະຫຍາຍຕົວຢ່າງຕໍ່ເນື່ອງ ແລະ ກ້າວກະໂດດ ເຊິ່ງເຫັນໄດ້ຢ່າງຈະແຈ້ງ ເປັນຕົ້ນ ການທ່ອງທ່ຽວທາງທໍາມະຊາດ ແລະ ວັດທະນະທໍາ ທີ່ມີຄວາມນິຍົມຫລາຍ ໂດຍສະເພາະ ແມ່ນສະຖານທີ່ເຮືອນແພແຄມນໍ້າລີກ ແລະ ວັດໂນນຫີນແຮ່ ໄຊຍະລາມ ໃນແຕ່ລະປີເຫັນວ່າໄດ້ມີຈໍານວນ ນັກທ່ອງທ່ຽວທາງພາຍໃນ ແລະ ຕ່າງປະເທດເພີ່ມຂຶ້ນ, ເຮັດໃຫ້ການກໍ່ສ້າງ, ປັບປຸງ ແລະ ຍົກລະດັບສະຖານທີ່ທ່ອງທ່ຽວ ຕະຫລອດຮອດຄຸນນະພາບ ຂອງການໃຫ້ບໍລິການ ນັກທ່ອງທ່ຽວຕ່າງໆ ແມ່ນດີເທື່ອລະກ້າວ. ພ້ອມນີ້, ພາກລັດກໍໄດ້ມີການຊຸກຍູ້-ສົ່ງ ເສີມ ແລະ ຄຸ້ມຄອງວຽກງານດັ່ງກ່າວ ໃຫ້ເຄື່ອນໄຫວຖືກຕ້ອງຕາມລະບຽບກົດໝາຍ, ສໍາລັບບັນດາຮ້ານອາຫານ, ກິນດື່ມ, ເຮືອນພັກຕ່າງໆ ກໍໄດ້ມີການຂະຫຍາຍຕົວ ເຊິ່ງໄດ້ສ້າງວຽກເຮັດງານທໍາ ແລະ ສ້າງລາຍຮັບໃຫ້ປະຊາຊົນບັນດາເຜົ່າ ພາຍໃນເມືອງ ຕື່ມອີກ.
ທ່ານ ຄໍາເພັດ ຈັນສົມພູ ຍັງໃຫ້ຮູ້ອີກວ່າ: ເພື່ອເປັນສົ່ງຍູ້ ແລະ ສົ່ງເສີມວຽກງານການທ່ອງທ່ຽວ ແບບໃຫ້ຄຶກຄື້ນ ແລະ ແບບມີເອກະລັກໜຶ່ງດຽວ, ເມືອງເຟືອງ ໄດ້ຈັດເທສະການສາມໝື່ນຕູບເຟືອງ, ບຸນມະໂຫລານບັ້ງໄຟໃຫຍ່ປະຈຳປີ, ການບໍລິການລ່ອງເຮືອຊົມ ທຳມະຊາດຕາມນໍ້າລີກ, ສະຖານທີ່ພັກເຮືອນແພໜ້ານໍ້າ, ການໃສ່ບາດ ຂອງນັກທ່ອງທ່ຽວ ຢູ່ຕາມເຮືອນແພແຄມນໍ້າ ແລະ ບຸນປະເພນີຂອງແຕ່ລະຊົນເຜົ່າພາຍໃນເມືອງ ກະຕຸ້ນການທ່ອງທ່ຽວ ເພື່ອດຶງດູດນັກທ່ອງທ່ຽວ ຄຽງຄູ່ກັບ ການສ້າງລາຍຮັບໃຫ້ຊຸມຊົນ ກໍຄື ຜູ້ປະກອບການ.
KPL
