ຂປລ. ເມື່ອບໍ່ດົນມານີ້, ສະພາການຄ້າ ແລະ ອຸດສາຫະກຳ ແຫ່ງ ຊາດລາວ ຮ່ວມກັບ ກຸ່ມບໍລິສັດຈາກ ສປ ຈີນ ຈັດກອງປະຊຸມປຶກສາຫາລື ກ່ຽວກັບການພັດທະນາ ຂະແໜງທຸລະກິດ ຖົ່ວລຽນລາວ ເພື່ອເປັນສິນຄ້າສົ່ງອອກໄປ ສປ ຈີນ ໂດຍການເປັນປະທານຂອງ ທ່ານ ບຸນເລີດ ຫລວງປະເສີດ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ.

ທ່ານ ບຸນເລີດ ຫລວງປະເສີດ ​ໄດ້​ມີ​ຄໍາ​ເຫັນວ່າ: ຖົ່ວລຽນລາວ ມີການຂະຫຍາຍຕົວຢ່າງໄວວາ, ມີສິ່ງອໍານວຍຄວາມສະດວກ ໃນການຂົນສົ່ງ ຫລາຍດ້ານ ເປັນຕົ້ນ ທາງລົດໄຟ ລາວ-ຈີນ ແລະ ອື່ນໆ, ພ້ອມນີ້, ຍັງມີເນື້ອທີ່ດິນປູກຝັງທີ່ກວ້າງຂວາງ ແລະ ອຸດົມສົມບຸນ ​ໂດຍກະຊວງກະສິກຳ ແລະ ປ່າໄມ້ ໄດ້ຮັບອະນຸຍາດໃຫ້ສົ່ງອອກ 16-17 ຊະນິດພືດ ແລະ ກຳລັງສະເໜີອີກ 7 ຊະນິດພືດ ເຊິ່ງຝ່າຍ ຈີນ ໃຫ້ສິດທິພິເສດ 98% ແມ່ນບໍ່ເສຍພາສີ.

ທ່ານ ວາງ ຈູນ (WANG JUN) ຫົວໜ້າຄະນະກຸ່ມບໍລິສັດຈາກ ສປ ຈີນ ​ໄດ້ກ່າວວ່າ: ກຸ່ມບໍລິສັດ ຈາກ ສປ ຈີນ ມີຄວາມສົນໃຈຢາກສ້າງຕັ້ງໂຮງງານຜະລິດປຸ໋ຍຢູ່ ສປປ ລາວ ໂດຍສະເໜີໃຫ້ຝ່າຍລາວ ສ້າງຕັ້ງສະມາຄົມທຸລະກິດຖົ່ວລຽນລາວ, ສ້າງ​ຕັ້ງ​ສະ​ມາ​ຄົມ​ວິ​ຊາ​ຊີບ​ຖົ່ວ​ລຽນ, ສູນ​ຄົ້ນ​ຄວ້າຖົ່ວ​ລຽນ, ນັກ​ຄົ້ນ​ຄວ້າ​ກ່ຽວ​ກັບ​ພືດ​​ຖົ່ວ​ລຽນ, ພະ​ຍາດ​ພືດ, ​ຄັດເລືອກ​ເອົາ​ແນວ​ພັນ​ ທີ່​​​​ທົນທານ​ຕໍ່​ເຊື້ອ​ພະ​ຍາດ, ຄົ້ນ​ຄວ້າ​ແນວ​ພັນ​ໃໝ່​ທີ່​​ດີມີ​ຄຸນ​ນະ​ພາບ, ​ວິ​​ໄຈ​ດິນ​ປູກ ແລະ ຝຸ່ນ​ຊີ​ວະ​ພາບ ໃຫ້​ຜົນ​ຜະ​ລິດ​ສີ​ຂຽວ. ທັງ​ນີ້, ກໍເພື່ອ​ເຮັດໃຫ້​ຖົ່ວ​ລຽນ​ລາວ ມີຄຸນ​ນະ​ພາບ ​ຄື​ກັບປະເທດໄກ້ຄຽງ. ໄລຍະຜ່ານມາ, ສະມາ ຄົມດັ່ງກ່າວ ກໍໄດ້ຮັບ​ການສ້າງຕັ້ງຂຶ້ນແລ້ວ ເຊິ່ງສະ​ມາ​ຄົມຈະ​ເຮັດ​ໜ້າ​ທີ່ຄຸ້ມ​ຄອງການກວດ​ກາ​​ ຄຸນ​ນະ​ພາບ​ຖົ່ວ​ລຽນ, ຄັດ​ເລືອກ​ເກດ ແລະ ຮັບ​ປະ​ກັນ​ລາ​ຄາ, ການ​ຫຸ້ມ​ຫໍ່​ຖົ່ວ​ລຽ​ນ, ຄັດ​ເລືອກຄົ້ນ​ຄວ້າ​ແນວ​ພັນ​ທີ່​ເໝາະ​ສົມ, ການ​ແບ່ງ​ງານ​ຂອງ​ຂະ​ແໜງ​ຂົນ​ສົ່ງ ແລະ ສາງ​ສິນ​ຄ້າ.

ໂອກາດດຽວກັນນີ້, ຄະ​ນະ​ກຸ່ມ​ບໍ​ລິ​ສັດ​ຈາກ ສ​ປ ຈີນ ໄດ້ເຂົ້າພົບ ທ່ານ ກິແກ້ວ ສິງນາວົງ ຮອງລັດຖະມົນຕີ ກະຊວງ ກະສິກຳ ແລະປ່າໄມ້ ແລະ ພົບປະກັບ ທ່ານ ມະໂນທອງ ວົງໄຊ  ຮອງລັດຖະ ມົນຕີ ກະຊວງ ອຸດສາຫະກຳ ແລະ ການຄ້າ ຕື່ມອີກ.

ຂ່າວ-ພາບ: ກິດຕາ

KPL