ຂປລ. ໃນວັນທີ 18 ຕຸລາ 2024 ນີ້, ທ່ານ ພົທ ສຸວອນ ເລືອງບຸນມີ ຮອງປະທານສະພາແຫ່ງຊາດລາວ, ປະທານຄະນະມິດຕະພາບລັດຖະສະພາລາວ-ລັດເຊຍ ໄດ້ພົບປະສອງຝ່າຍກັບ ທ່ານ ໂຊລບັນ ກາຣາ-ໂອລ ຮອງປະທານສະພາດູມາ ແຫ່ງ ສະຫະພັນ ຣັດເຊຍ ເພື່ອເສີມຂະຫຍາຍ ສາຍພົວພັນ ມິດຕະພາບອັນເປັນມູນເຊື້ອທີ່ດີງາມ ລະຫວ່າງສອງປະເທດ ລາວ-ຣັດເຊຍ ກໍຄື ສອງອົງການນິຕິບັດຍັດ ໃຫ້ນັບມືນັບເຂົ້າສູ່ລວງເລິກ ແລະ ເປັນຮູບປະທຳຂຶ້ນເລື້ອຍໆ ໂດຍສະເພາະແມ່ນ ການຮ່ວມມື ແລະ ການສະໜັບສະໜູນ ເຊິ່ງກັນ ແລະກັນ ໃນເວທີລັດຖະສະພາພາກພື້ນ ແລະ ສາກົນ.

ໂອກາດນີ້, ທ່ານ ພົທ ສຸວອນ ເລືອງບຸນມີ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອທີ່ດີງາມ ແລະ ການເປັນຄູ່ຮ່ວມຍຸດທະສາດ ລະຫວ່າງສອງປະເທດ ລາວ-ຣັດເຊຍ ໄດ້ສືບຕໍ່ມີບາດ ກ້າວຂະຫຍາຍຕົວຢ່າງຕໍ່ເນື່ອງ, ນັບມື້ເຂົ້າສູ່ລວງເລິກ ແລະ ເປັນຮູບປະທຳຫລາຍຂຶ້ນ. ສະແດງອອກມີການແລກ ປ່ຽນຄະນະຜູ້ແທນ ຂັ້ນສູງ ແລະ ຂັ້ນຕ່າງໆນໍາກັນ, ການຮ່ວມມືໃນດ້ານ ເສດຖະກິດ-ການຄ້າ, ຝ່າຍລັດຖະບານ ກໍໄດ້ມີສັນຍາຮ່ວມມືກັນແຕ່ ເຫັນວ່າຍັງບໍ່ໄດ້ຮັບ ການຂະຫຍາຍຕົວເທົ່າທີ່ຄວນ, ມູນຄ່າການສົ່ງອອກສິນຄ້າຈາກ ລາວ ໄປຍັງ ຣັດເຊຍ ແມ່ນຫລຸດລົງ ຍ້ອນຫລາຍປັດໄຈ,  ການລົງທຶນ ຂອງຣັດເຊຍ ແມ່ນຈັດຢູ່ໃນອັນດັບທີ 22 ຂອງການລົງທຶນຕ່າງປະເທດຢູ່ ສປປ ລາວ (ມີ 53 ປະເທດ), ມີ 24 ໂຄງການ ແລະ ມີມູນຄ່າການລົງທຶນທັງໝົດ 52 ລ້ານໂດລາສະຫະລັດ ກວມເອົາຂົງເຂດພະລັງງານ ບໍ່ແຮ່ເປັນຕົ້ນຕໍ, ສອງລັດຖະບານລາວ-ລັດເຊຍ ກໍໄດ້ປຶກສາຫາລື ຄວາມເປັນໄປໄດ້ ໃນການຊື້ຂາຍນໍ້າມັນເຊື້ອໄຟ ຮ່ວມກັນ ແລະ ຊຸກຍູ້ ແລະ ສົ່ງເສີມໃນການຄ້າຂາຍສິນຄ້າ ທີ່ສອງປະເທດມີທ່າແຮງນໍາກັນ ເຊິ່ງຣັດເຊຍຍັງຢືນຢັນສືບຕໍ່.

ສຳລັບການພົວພັນຮ່ວມມື ລະຫວ່າງສະພາແຫ່ງຊາດລາວ ແລະ ສະພາດູມາຣັດເຊຍ ໄດ້ຮັບການເສີມຂະຫຍາຍຂຶ້ນເປັນກ້າວໆ  ພາຍຫລັງສອງປະທານສະພາສອງປະເທດ ໄດ້ພົບປະແບບທາງໄກ. ຈາກນັ້ນ, ກໍມີການແລກປ່ຽນຢ້ຽມຢາມ ລະຫວ່າງຄະນະມິດຕະພາບ ລັດຖະສະພາ ລາວ-ຣັດເຊຍ-ລາວ, ພົບປະທາງໄກລະຫວ່າງ ຄະນະສະມາຊິກລັດຖະສະພາໜຸ່ມນຳກັນ, ແລກປ່ຽນຂໍ້ມູນຂ່າວສານ, ສົ່ງສານຊົມເຊີຍ, ສານອວຍພອນ ເຊິ່ງກັນ ແລະ ກັນ ໃນໂອກາດວັນສຳຄັນຕ່າງໆ ຂອງຊາດ, ສະແດງທັດສະນະຕໍ່ບັນຫາຕ່າງໆຮ່ວມກັນ, ສະໜັບສະໜູນ ແລະ ຮ່ວມມືກັນໃນເວທີລັດ ຖະສະພາພາກພື້ນ ແລະ ສາກົນ.

ພ້ອມນີ້, ທ່ານ ພົທ ສຸວອນ ເລືອງບຸນມີ ສະເໜີໃຫ້ສືບຕໍ່ແລກປ່ຽນການຢ້ຽມຢາມ ລະຫວ່າງຄະນະຜູ້ແທນຂັ້ນສູງ, ຂັ້ນກໍາມາທິການ ແລະ ຄະນະມິດຕະພາບລັດຖະສະພາ ຢ່າງເປັນປົກກະຕິ ທີ່ຕິດພັນກັບການແລກປ່ຽນບົດ ຮຽນກ່ຽວກັບການປະຕິບັດ ພາລະບົດບາດ ຂອງອົງການ ນິຕິບັນຍັດ; ສະເໜີໃຫ້ສອງລັດຖະບານສືບຕໍ່ຈັດຕັ້ງປະຕິ ບັດບັນດາສັນຍາ, ສົນທິສັນຍາ ແລະ ຂໍ້ຕົກລົງ ທີ່ລັດຖະບານ ຂອງສອງປະເທດ ໄດ້ລົງນາມຮ່ວມກັນ ໃຫ້ເປັນຮູບປະທຳຂຶ້ນກວ່າເກົ່າ ແລະ ສືບຕໍ່ຊຸກຍູ້ການຈັດຕັ້ງປະຕິບັດ ບັນດາໂຄງການຕ່າງໆ ຂອງຣັດເຊຍ ທີ່ມາລົງທຶນຢູ່ ສປປ ລາວ ໃຫ້ສໍາເລັດຕາມແຜນການ ແລະ ນໍາເອົາຜົນປະໂຫຍດມາສູ່ ປະຊາຊົນສອງຊາດພວກເຮົາຢ່າງແທ້ຈິງ; ສືບຕໍ່ຮ່ວມມື ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ.

KPL