ຂປລ. ຄູຄືແມ່ພິມຂອງຊາດ ​ເປັນຜູ້ທີ່ມີຄວາມສຳຄັນຫລາຍ ໃນການພັດທະນາຊັບພະຍາກອນມະນຸດ, ເປັນຜູ້ຖ່າຍທອດບົດຮຽນ, ຖ່າຍທອດຄວາມຮູ້ຄວາມສາມາດ ໃຫ້ກັບຄົນທຸກຮຸ່ນ, ທຸກໄວໃນທົ່ວສັງຄົມ, ທັງເປັນຜູ້ສ້າງບຸກຄະລາກອນ ທີ່ມີຄວາມຮູ້, ຄວາມສາມາດອອກສູ່ສັງຄົມ ເພື່ອສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງ.

 




ທ່ານ ນາງ ສີສົມພອນ ນວນຜາລີ ຜູ້ອຳນວຍການໂຮງຮຽນອະນຸບານ ກະຊວງສາທາລະນະສຸກ ໃຫ້ສຳພາດ ໃນວັນທີ 2 ຕຸລາ 2024 ເນື່ອງໃນໂອກາດວັນຄູແຫ່ງຊາດ ຄົບຮອບ 30 ປີ (7/10/1994-7/10/2024) ໂດຍທ່ານໄດ້ຍົກໃຫ້ເຫັນຄວາມໝາຍ, ຄວາມສຳຄັນຂອງຄູ ເຊິ່ງຄູ ຄືຜູ້ທີ່ມີຄວາມສຳຄັນຫລາຍ ໃນການພັດທະນາ ຊັບພະຍາກອນມະນຸດ, ເປັນຜູ້ຖ່າຍທອດຄວາມຮູ້, ຄວາມສາມາດໃຫ້​ແກ່ສັງຄົມ ກໍຄື ທຸກຄົນ ນັບແຕ່ຍັງນ້ອຍ ຈົນເທົ້າໃຫຍ່ ໃຫ້ເປັນຄົນຮູ້ຜູ້ດີ, ມີຄວາມຮູ້, ຄວາມສາມາດ ໃນດ້ານຕ່າງໆ ກ່າວໄປສູ່ການພັດທະນາປະເທດຊາດ ໃຫ້ໄດ້ຮັບການພັດທະນາ ຈົນຮອດປັດຈຸບັນ. ພ້ອມນີ້, ທ່ານຍັງໄດ້ຍົກໃຫ້ເຫັນ ຜົນງານທີ່ພົ້ນເດັ່ນໃນໄລຍະ 1 ປີ ຜ່ານມາ ເຊິ່ງໂຮງຮຽນອະນຸບານ ກະຊວງສາ ທາລະນະສຸກ ສາມາດຍາດໄດ້ຜົນສຳເລັດໃນຫລາຍດ້ານ ເປັນຕົ້ນ ວຽກງານການສິດສອນ ໄດ້ເອົາໃຈໃສ່ຕໍ່ວຽກງານການເບິ່ງແຍງ, ລ້ຽງດູ, ສິດສອນເດັກ, ເດັກກ່ອນໄວຮຽນ ແລະ  ຈັດການຮຽນ-ການສອນ ໃຫ້ໄປຕາມ 3 ລັກສະນະ ແລະ 5 ຫລັກມູນຂອງການສຶກສາ,  ສອນຕາມແຜນການ ຂອງໂຮງຮຽນວາງອອກ ໂດຍຖືເອົາເດັກເປັນໃຈກາງ. ນອກນັ້ນ, ຍັງໄດ້ເອົາໃຈໃສ່ ຕໍ່ວຽກງານອະນາໄມ, ປະດັບປະດາຫ້ອງໃຫ້ສະອາດສວຍງາມ, ນໍາພາເດັກອອກຫລິ້ນກາງແຈ້ງ, ພ້ອມທັງເຂົ້າຮ່ວມໂມງສອນຖອດຖອນບົດ ຮຽນພາຍໃນໂຮງຮຽນ  ເພື່ອເປັນການຍົກສູງຄຸນນະພາບຂອງຄູສອນ. ນອກຈາກການສິດສອນໃນຫ້ອງແລ້ວ, ຄູຍັງໄດ້ນໍາພາເດັກອອກສອນນອກຫ້ອງ, ເຂົ້າຫ້ອງສະໝຸດ ເພື່ອເຮັດໃຫ້ເດັກໄດ້ ພັດທະນາ ຄວາມພ້ອມ ໃນດ້ານຕ່າງໆຕາມໄວອາຍຸ ​ແລະ ໄດ້ປະເມີນຜົນການຮຽນຮູ້ຂອງເດັກ ຫລັງຈາກຈັດກິດຈະກໍາແລ້ວ.

 


ສຳລັບ ວຽກງານໂພຊະນາການ ທາງ​ໂຮງຮຽນໄດ້ເອົາໃຈໃສ່ ປຸງແຕ່ງອາຫານກາງ​ເວັນ ໃຫ້ເດັກໄດ້ກິນທັນເວລາ, ມື້ໜຶ່ງ 2 ຄາບ ໂດຍຖືເອົາອາຫານຫລັກ 6 ໝູ່ໃນການປຸງແຕ່ງ, ເຖິງວ່າລາຄາອາຫານໃນທ້ອງຕະຫລາດ ຈະມີການເໜັງຕີງກໍຕາມ ແຕ່ພວກເຮົາກໍສູ້ຊົນໃຫ້ເດັກ ໄດ້ຮັບສານອາຫານຕາມຄວາມຕ້ອງການ.      

ຂ່າວ:ທະນູທອງ

ພາບ: ວັນເພັງ

KPL