ຂປລ. ກະຊວງສຶກສາທິການ ແລະ ກິລາ ສປປ ລາວ ໂດຍໄດ້ຮັບການສະໜັບສະໜູນ ຈາກລັດຖະບານອົດສະຕຣາລີ ຜ່ານແຜນງານປັບປຸງຄຸນນະພາບ ແລະ ຂະຫຍາຍໂອກາດການເຂົ້າເຖິງ ການສຶກສາຂັ້ນພື້ນຖານຢູ່ໃນ ສປປ ລາວ (ແຜນງານບີຄວາ) ຈັດຝຶກອົບຮົມວຽກງານການປົກປ້ອງ ແລະ ຮັກສາຄວາມປອດໄພສຳລັບເດັກ ໃນຂະແໜງການສຶກສາ ​ໃນວັນທີ 2 ຕຸລາ 2024 ທີ່ວິທະຍາໄລຄູຄັງໄຂ, ແຂວງຊຽງຂວາງ ໂດຍການເປັນປະທານຮ່ວມຂອງ ທ່ານ ສົມສີ ສຸດທິວົງ ຮອງຫົວໜ້າຫ້ອງການ, ຜູ້ປະຈໍາການ ຄະນະກໍາມາທິການ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ກະຊວງສຶກສາທິການ ແລະ ກິລາ (ສສກ), ⁠ທ່ານ ສຸດຈັນທອງ ຈັນທະວົງ ຜູ້ອຳນວຍການວິທະຍາໄລຄູຄັງໄຂ,  ທ່ານ ນາງ ເບຄຳ ສະເຫລີມສຸກ ຫົວໜ້າຝ່າຍສົ່ງເສິມຄວາມສະເໝີພາບຍິງຊາຍ ແລະ ການສຶກສາຮຽນຮ່ວມ, ແຜນງານບີຄວາ  ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ສົມສີ ສູທິວົງ ໄດ້ມີຄຳເຫັນວ່າ: ການຝຶກອົບຮົມຄັ້ງນີ້, ເພື່ອໃຫ້ຄວາມຮູ້ກ່ຽວກັບເອກະສານຄຳແນະນຳກກ່ຽວກັບການປົກປ້ອງ ແລະ ຮັກສາຄວາມປອດໄພສຳລັບເດັກ ສະບັບໃໝ່ ຂອງກະຊວງສຶກສາທິການ ແລະ ກິລາ ເຊິ່ງຈະເປັນຄຳແນະນຳ ໃນການຈັດຕັ້ງປະຕິບັດ ສຳລັບໃນຂະແໜງການສຶກສາ. ຄູເປົ້າໝາຍຈະເຂົ້າຮ່ວມອົບຮົມເປັນເວລາ 3 ວັນ, ຈາກນັ້ນ ຜູ້ເຂົ້າຮ່ວມໃນຄັ້ງນີ້, ຈະຮັບໜ້າທີ່ຝຶກອົບຮົມໃຫ້ແກ່ ຜູ້ເຮັດວຽກສຶກສານິເທດພາຍໃນ 7 ແຂວງເປົ້າໝາຍຄື: ແຂວງຜົ້ງສາລີ, ຫລວງນ້ຳທາ, ບໍ່ແກ້ວ ຫົວພັນ, ຊຽງຂວາງ, ຄຳມ່ວນ ແລະ ແຂວງສະຫວັນນະເຂດ ເຊິ່ງຄວາມຮູ້ ແລະ ທັກສະທີ່ໄດ້ຮັບຈາກການຝຶກອົບຮົມຄັ້ງນີ້ ຈະຖືກຖ່າຍທອດຕໍ່ໃຫ້ແກ່ ຄູສອນຊັ້ນປະຖົມສຶກສາທັງໝົດໃນ 30 ເມືອງເປົ້າໝາຍ ຜ່ານການລົງຕິດຕາມ ໃຫ້ການຊ່ວຍເຫລືອຄູໃນໂຮງຮຽນ ໂດຍຜູ້ເຮັດວຽກສຶກສານິເທດພາຍໃນ ເຊິ່ງຊຸດຝຶກອົບຮົມເພື່ອ​ຕິດຕາມ​ໃນຂັ້ນຕໍ່ໄປ ແມ່ນ​ຈະ​ຈັດ​ຂຶ້ນໃນ​ທ້າຍ​ເດືອນຕຸລາ ​ນີ້ ຢູ່ທີ່​ວິທະຍາໄລຄູສະຫວັນ​ນະ​ເຂດ ​ແລະ ວິທະຍາໄລຄູຫລວງ​ນ້ຳທາ.

ທ່ານ ​ນາງ ວາເນັດຊ້າ ເຮັກກາທີ້ ​ເລ​ຂາ​ເອກສະ​ຖານ​ທູດ​ ອົດ​ສະ​ຕຣາ​ລີປະຈຳລາວ ໄດ້ກ່າວວ່າ: ການປົກປ້ອງ ແລະ ຮັກສາຄວາມປອດໄພສຳລັບເດັກ ແມ່ນວຽກງານບຸລິມະສິດຮ່ວມກັນຂອງ ລັດຖະບານອົດສະຕຣາລີ ແລະ ລັດຖະບານ ສປປ ລາວ; ຄູມີບົດບາດສໍາຄັນ ໃນການປົກປ້ອງນັກຮຽນ; ການຮັບປະກັນໃຫ້ນັກຮຽນຮູ້ສຶກປອດໄພເມື່ອຢູ່ໃນໂຮງຮຽນ ຊ່ວຍໃຫ້ເຂົາເຈົ້າມີຄວາມກ້າວໜ້າ ໃນເສັ້ນທາງການຮຽນ. ລັດຖະບານອົດ​ສະ​ຕາຣາລີ ​ຍິນ​ດີ​ສະ​ໜັບ​ສະ​ໜູນ​ກະ​ຊວງ​ສຶກ​ສາ​ທິ​ການ ແລະ ກິລາ ​ໃນ​ການຈັດ​ຝຶກ​ອົບ​ຮົມຄັ້ງ​ນີ້; ການຊ່ວຍເຫລືອໃຫ້​ຄູ​ ​ແລະ ພະນັກ ງານຂະແໜງສຶກສາ ​ດ້ວຍການສະໜອງ​ເຄື່ອງ​ມື ​ແລະ ທັກ​ສະ​ທີ່​ຈຳ​ເປັນ​ ຈະ​ຮັບປະກັນ​ໃຫ້​ເຂົາ​ເຈົ້າ​ສາມາດ​ຊຸກຍູ້ ​ແລະ ປະຕິບັດ​ການ​ປົກ​ປ້ອງ​ ​ແລະ ຮັກສາຄວາມປອດໄພສຳລັບເດັກ​ຢູ່​ໃນ ​ແລະ ນອກ​ຫ້ອງ​ຮຽນ.

ຊຸດຝຶກອົບຮົມ ໄດ້ນຳໃຊ້ວິທີການຝຶກອົບຮົມ ຖືເອົາຜູ້ເຂົ້າຮ່ວມເປັນໃຈກາງ ໂດຍມີການລະດົມຄວາມຄິດກ່ຽວກັບ ຄວາມສໍາຄັນຂອງການປົກປ້ອງເດັກ; ຜູ້ເຂົ້າຮ່ວມໄດ້ສຶກສາກົດໝາຍ ວ່າດ້ວຍການປົກປ້ອງເດັກຂອງ ສປປ ລາວ, ກົດໝາຍວ່າດ້ວຍການສຶກສາ ແລະ ຍຸດທະສາດການສຶກສາຮຽນຮ່ວມຂອງ ສສກ ຮອດ 2030 ຜ່ານກິດຈະກຳຕ່າງໆ ເຊັ່ນ: ການສະແດງບົດບາດສົມມຸດ ແລະ ການຕອບຄຳຖາມ ເພື່ອຊ່ວຍໃຫ້ຜູ້ເຂົ້າຮ່ວມຮັບຮູ້ເຖິງການເຄື່ອນໄຫວທີ່ມີຢູ່ໃນຊຸມຊົນ ແລະ ໃນໂຮງຮຽນ. ພ້ອມນີ້, ຜູ້ເຂົ້າຮ່ວມໄດ້ສະທ້ອນຄືນເຖິງວິທີ ທີ່ເຂົາເຈົ້າສາ ມາດນຳໃຊ້ຫລັກການການປົກປ້ອງ ແລະ ຮັກສາຄວາມປອດໄພສຳລັບເດັກ ໃນເວລາປະຕິບັດໜ້າທີ່ ແລະ ການດໍາລົງວິດປະຈຳວັນຂອງເຂົາເຈົ້າ.

ຂ່າວ-ພາບ: ວຽງສະຫວັນ

KPL