ຂປລ. ກອງປະຊຸມ ລັດຖະມົນຕີສະພາປະຊາຄົມ ວັດທະນະທຳ-ສັງຄົມອາຊຽນ ຄັ້ງທີ 32 ທີ່ ສປປ ລາວ ໄດ້ຮັບກຽດເປັນເຈົ້າພາບ ຈັດຂຶ້ນ ໃນວັນທີ 26 ກັນຍາ 2024 ນີ້, ໄດ້ປິດລົງດ້ວຍຜົນສຳເລັດ ເຊິ່ງກອງປະຊຸມ ໄດ້ປຶກສາຫາລື ແລະ ຕົກລົງຮັບຮອງເອົາ ຫລາຍບັນຫາສຳຄັນ ເປັນຕົ້ນຮັບຮອງເອົາຖະແຫລງການ ແລະ ເອກະສານສຳຄັນຂອງອາຊຽນ ຈຳນວນ 29 ສະບັບ ເພື່ອນຳສະເໜີຕໍ່ ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ເຊິ່ງຈະຈັດຂຶ້ນໃນຕົ້ນເດືອນຕຸລາ 2024   ພິຈາລະ ນາຮັບຮອງ ຫລື ຮັບຊາບ.

ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ຖະແຫລງຜົນສຳເລັດຂອງກອງປະຊຸມດັ່ງກ່າວວ່າ: ກອງປະຊຸມລັດຖະມົນຕີ ສະພາປະຊາຄົມ ວັດທະນະທຳ-ສັງຄົມອາຊຽນ ຄັ້ງທີ 32 ໄດ້ປຶກສາຫາລື ແລະ ຕົກລົງເຫັນດີຮັບຮອງເອົາຫລາຍບັນຫາສຳຄັນ ເປັນຕົ້ນ ໄດ້ຮັບຮອງຖະແຫລງການ ແລະ ເອກະສານ ສຳຄັນຂອງອາຊຽນ ຈຳນວນ 29 ສະບັບ ເພື່ອນຳສະເໜີຕໍ່ ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ພິຈາລະນາ ຮັບຮອງ ຫລື ຮັບຊາບ ເປັນຕົ້ນ ຖະແຫລງການວັງວຽງ ວ່າດ້ວຍ ການສົ່ງເສີມຜະລິດຕະພັນວັດທະນະທຳ ຂະໜາດນ້ອຍ ແລະ ຂະໜາດກາງ ຄຽງຄູ່ກັບການເຕີບໂຕສີຂຽວ ແລະ ການພັດທະນາແບບຍືນຍົງ; ຖະແຫລງ ການວຽງຈັນ ວ່າດ້ວຍຄວາມສະເໝີພາບ, ການເຂົ້າເຖິງ ແລະ ສິ່ງແວດລ້ອມ: ຄວາມກ້າວໜ້າໃນການສ້າງຄວາມເຂັ້ມແຂງ ຕໍ່ສະພາບອາກາດຕັ້ງແຕ່ໄວເດັກໃນອາຊຽນ; ຖະແຫລງການຮ່ວມອາຊຽນ ວ່າດ້ວຍ ການປ່ຽນແປງດິນຟ້າອາກາດ ຕໍ່ກອງປະຊຸມລັດພາຄີສົນທິສັນຍາ ວ່າດ້ວຍການປ່ຽນແປງດິນຟ້າອາກາດ ຄັ້ງທີ 29; ຖະແຫລງການຮ່ວມອາຊຽນ ວ່າດ້ວຍຊີວະນາໆພັນ ຕໍ່ກອງປະຊຸມລັດພາຄີ ສົນທິສັນຍາ ວ່າດ້ວຍຄວາມຫລາກຫລາຍດ້ານຊີວະນາໆພັນ ຄັ້ງທີ 16; ຖະແຫລງການອາຊຽນ ວ່າດ້ວຍເສດຖະກິດໝູນວຽນ ເພື່ອແກ້ໄຂບັນຫາ ມົນລະພິດດ້ານປລາສຕິກ; ຖະແຫລງການອາຊຽນ ວ່າດ້ວຍການສົ່ງເສີມວຽກງານ ເສດຖະກິດການດູແລເບິ່ງແຍງ ແລະ ຄວາມເຂັ້ມແຂງ ເພື່ອກ້າວໄປສູ່ປະຊາຄົມອາຊຽນທີ່ຍືນຍົງ ຫລັງປີ 2025; ຖະແຫລງການຜູ້ນໍາອາຊຽນ ວ່າດ້ວຍ ການສ້າງຄວາມເຂັ້ມແຂງ ດ້ານຄວາມປອດໄພ ແລະ ຄວາມໝັ້ນຄົງທາງດ້ານຊີວະພາບ ໃນລະດັບພາກພື້ນ; ຖະແຫລງການວຽງຈັນ ວ່າດ້ວຍການເຄື່ອນຍ້າຍ, ການພັດທະນາ ແລະ ການຮັບຮູ້ສີມືແຮງງານເຄື່ອນຍ້າຍ; ຖະແຫລງການອາຊຽນ ວ່າດ້ວຍ ການປ້ອງກັນການໃຊ້ແຮງງານເດັກ ລວມທັງການລຶບລ້າງການນຳໃຊ້ແຮງງານເດັກ ໃນທຸກຮູບແບບທີ່ຮ້າຍແຮງ ແລະ ຖະແຫລງການອື່ນໆ.

ພ້ອມນີ້, ກອງປະຊຸມ ຍັງໄດ້ສະແດງຄວາມຍິນດີຕໍ່ຄວາມຄືບໜ້າ ໃນການຈັດຕັ້ງປະຕິບັດ 9 ບຸລິ ມະສິດ ຂອງປະທານອາຊຽນ ປີ 2024 ແລະ ຍິນດີຕໍ່ຄວາມຄືບໜ້າ ໃນການຈັດຕັ້ງປະຕິບັດແຜນແມ່ບົດ ປະຊາຄົມວັດທະນະທຳ-ສັງຄົມອາຊຽນ 2025 ແລະ ການຮ່າງແຜນຍຸດທະສາດ ເສົາຄໍ້າວັດທະນະທຳ-ສັງຄົມອາຊຽນ ເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2045 ເຊິ່ງຈະຖືກຮັບຮອງເອົາໃນປີໜ້າ.

ໝາກຜົນຂອງກອງປະຊຸມລັດຖະມົນຕີ ສະພາວັດທະນະທຳ-ສັງຄົມ ອາຊຽນ ຄັ້ງທີ 32 ຈະເປັນພື້ນຖານອັນສໍາຄັນ ໃຫ້ແກ່ຜົນສໍາເລັດ ຂອງກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດອື່ນທີ່ກ່ຽວຂ້ອງ ທີ່ຈະຈັດຂຶ້ນ ໃນວັນທີ 8-11 ຕຸລາ 2024 ທີ່ ນະຄອນຫລວງວຽງຈັນ.

ທ່ານ ນາງ ສວນສະຫວັນ ວິຍະເກດ ຍັງ​ກ່າວອີກວ່າ: ເພື່ອຜັນຂະຫຍາຍ ຄຳຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ໃຫ້ປະກົດຜົນເປັນຈິງ, ສປປ ລາວ ໄດ້ກຳນົດ 9 ຂົງ ເຂດບຸລິມະສິດ ໃນສາມເສົາຄໍ້າຂອງອາຊຽນ. ໃນນັ້ນ, ເສົາຄໍ້າວັດທະນະທຳ-ສັງຄົມອາຊຽນ ມີ 4 ຂົງ ເຂດບຸລິມະສິດ ຄື: ການເສີມຂະຫຍາຍ ບົດບາດຂອງສິລະປະ ແລະ ວັດທະນະທຳ ພາຍໃນພາກພື້ນ ລວມເຖິງການເສີມສ້າງຂີດຄວາມສາມາດ ໃຫ້ແກ່ຊັບພະຍາກອນມະນຸດ ແລະ ຊຸກຍູ້ໃຫ້ມີການເຕີບໂຕ ຂອງບັນດາວິສາຫະກິດ ດ້ານວັດທະນະທຳ ຂະໜາດນ້ອຍ ແລະ ຂະໜາດກາງ ຕາມທິດເຕີບໂຕສີຂຽວ ແລະ ການພັດທະນາແບບຍືນຍົງ; ການປົກປັກຮັກສາສິ່ງແວດລ້ອມ, ສຸມໃສ່ການແກ້ໄຂບັນຫາການປ່ຽນແປງດິນຟ້າອາກາດ, ການສົ່ງເສີມໃຫ້ບັນດາຕົວເມືອງ ມີຄວາມຍືນຍົງດ້ານສິ່ງແວດລ້ອມ ແລະ ການຜະລິດ, ຊົມໃຊ້ແບບຍືນຍົງ; ການສົ່ງເສີມຄວາມສະເໝີພາບລະຫວ່າງ ຍິງ-ຊາຍ ແລະ ການສ້າງຄວາມເຂັ້ມແຂງ ໃຫ້ແກ່ແມ່ຍິງ-ເດັກຍິງ ແລະ ການສ້າງຄວາມເຂັ້ມແຂງ ດ້ານໂຄງລ່າງພື້ນຖານ ສາທາລະນະສຸກ ແລະ ສຸຂະພາບ.

ຂ່າວ: ທະນູທອງ

ພາບ: ອ່າຍຄຳ

KPL