ຂປລ. ໃນໂອກາດທີ່ ທ່ານ ໂຮ່ ດຶກ ເຝິກ ຮອງນາຍົກລັດຖະມົນຕີ ແຫ່ງ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນວັນທີ 12-13 ພະຈິກ 2025 ນີ້, ກຸ່ມບໍລິສັດເຄມີຫວຽດນາມ (Vinachem) ໄດ້ເປັນກຽດຮ່ວມເດີນທາງມາຮັບໃຊ້ຄະນະດັ່ງກ່າວ, ເພື່ອເຂົ້າຮ່ວມປຶກສາຫາລືແລກປ່ຽນ, ຊຸກຍູ້ການຮ່ວມມື ດ້ານການລົງທຶນໃນຂົງເຂດອຸດສາຫະກຳເຄມີ ແລະ ແຮ່ທາດ ໂດຍສະເພາະ ໂຄງການຂຸດຄົ້ນ ແລະ ປຸງແຕ່ງບໍ່ເກືອ ຢູ່ແຂວງຄໍາມ່ວນ ກັບບັນດາການນຳຂັ້ນສູງຂອງ ສປປ ລາວ.

ໃນພິທີພົບປະສອງຝ່າຍ ລະຫວ່າງ ສອງຮອງນາຍົກລັດຖະມົນຕີ ລາວ-ຫວຽດນາມ ໃນວັນທີ 12 ພະຈິກ 2025 ນີ້, ພາຍຫລັງທີ່ ສອງນາຍົກລັດຖະມົນຕີ ລາວ-ຫວຽດນາມ ໄດ້ມີຄຳເຫັນແລ້ວ ກຸ່ມບໍລິສັດເຄມີຫວຽດນາມ ໄດ້ລາຍງານໃຫ້ຮູ້ວ່າ: ໂຄງການຂຸດຄົ້ນ ແລະ ປຸງແຕ່ງ ບໍ່ເກືອກາລີ ຢູ່ເມືອງໜອງບົກ ແຂວງຄໍາມ່ວນ ໂດຍ Vinachem ເປັນຜູ້ລົງທຶນຜ່ານບໍລິສັດ TNHH ເຄມີ ແລະ ບໍ່ເກືອ ຫວຽດນາມ-ລາວ (Vilachemsalt) ເປັນໜຶ່ງໃນບັນດາໂຄງການຮ່ວມມືເສດຖະກິດ ທີ່ໃຫຍ່ທີ່ສຸດ ລະຫວ່າງ ຫວຽດນາມ ແລະ ລາວ ໃນຂົງເຂດອຸດສາຫະກໍາເຄມີ. ໂຄງການມີມູນຄ່າການລົງທຶນ ປະມານ 492 ລ້ານໂດລາສະຫະລັດ, ມີກໍາລັງການຜະລິດ 500.000 ໂຕນຕໍ່ປີ, ນໍາໃຊ້ເຕັກໂນໂລຊີຂຸດຄົ້ນອຸໂມງບໍ່ແຮ່ທີ່ທັນສະໄໝ ແນໃສ່ສະໜອງຜະລິດຕະພັນເກືອກາລີ ທີ່ມີຄຸນນະພາບສາກົນ, ຮັບໃຊ້ການຜະລິດຝຸ່ນ ແລະ ອຸດສາຫະກໍາໃນພາກພື້ນ.

ນັບແຕ່ເດືອນສິງຫາ 2024 ເປັນຕົ້ນມາ ໂຄງການຂຸດຄົ້ນບໍ່ເກືອກາລີ ຢູ່ແຂວງຄໍາມ່ວນ ໄດ້ເລີ່ມດຳເນີນການຄືນໃໝ່, ຮອດວັນທີ 2 ພະຈິກ 2025, Vinachem ໄດ້ເຮັດສໍາເລັດການປັບປຸງບົດລາຍງານການສຶກສາຄວາມເປັນໄປໄດ້ (FS) ໂດຍໜ່ວຍງານທີ່ປຶກສາສາກົນ Chonfar Engineering & Technology ຢືນຢັນວ່າ ໂຄງການມີຄວາມເປັນໄປໄດ້ໃນດ້ານເຕັກນິກ, ມີປະສິດທິຜົນດ້ານເສດຖະກິດ ແລະ ເປັນຜົນດີຕໍ່ການພັດທະນາທ້ອງຖິ່ນ. ໃນປີ 2025, Vinachem ໄດ້ຜັນຂະຫຍາຍການເຄື່ອນໄຫວໃນການກະກຽມ ແລະ ຊຸກຍູ້, ສົ່ງເສີມໂຄງການ ໃນນີ້, ໄດ້ສຳເລັດການຂົນສົ່ງກົນຈັກ, ອຸປະກອນ ຈາກຫວຽດນາມ ແລະ ໄທ ກ່ຽວກັບສະຖານທີ່ກໍ່ສ້າງຢູ່ແຂວງຄໍາມ່ວນ ພ້ອມທັງໄດ້ຈັດສໍາມະນາວິທະຍາສາດ ນໍາເອົາຄໍາຄິດເຫັນຂອງຊ່ຽວຊານລະດັບຕົ້ນໆ ກ່ຽວກັບເຕັກໂນໂລຊີ ບໍ່ເກືອກາລີ; ເຮັດວຽກໂດຍກົງກັບຄູ່ຮ່ວມມືຫລາຍທ່ານ ທັງພາຍໃນ ແລະ ສາກົນ ເພື່ອຊຸກຍູ້ລະດັບຄວາມຄືບໜ້າການຜັນຂະຫຍາຍໂຄງການ.

ປັດຈຸບັນ, ກຸ່ມບໍລິສັດເຄມີຫວຽດນາມ ພວມເລັ່ງຜັນຂະຫຍາຍບັນດາລາຍການ ຂອງໂຄງການ ທີ່ຈະເຮັດຕໍ່ໜ້າ, ພ້ອມທັງເຮັດເອກະສານຕ່າງໆ ດ້ານກົດໝາຍ, ເຕັກນິກ ໃຫ້ສຳເລັດ ແລະ ລະດົມແຫລ່ງທຶນ, ການເງິນ-ຊັບພະຍາກອນມະນຸດ ໂດຍມີເປົ້າໝາຍມຸ່ງໝັ້ນເຮັດໃຫ້ຜະລິດຕະພັນສິນຄ້າໂຕທໍາອິດສໍາເລັດ ແລະ ນໍາສະເໜີສິນຄ້າໃນເດືອນກໍລະກົດ 2027. ນີ້ຈະເປັນຂີດໝາຍສໍາຄັນ, ຢືນຢັນຄວາມສາມາດຂອງ Vinachem ໃນການລົງທຶນຢູ່ນອກປະເທດ ກໍຄື ການປະກອບສ່ວນທີ່ແທດກັບຕົວຈິງ ເຂົ້າໃນການພັດທະນາເສດຖະກິດ-ສັງຄົມ ຂອງປະເທດລາວ. ພ້ອມນີ້, ກຸ່ມບໍລິສັດເຄມີຫວຽດນາມ ຍັງໄດ້ສະເໜີ ໃຫ້ລັດຖະບານລາວ ອຳນວຍຄວາມສະດວກໃນດ້ານຕ່າງໆ ແນໃສ່ຊຸກຍູ້ສົ່ງເສີມໂຄງການດັ່ງກ່າວ ໃຫ້ໄດ້ຮັບການຈັດຕັ້ງປະຕິບັດຢ່າງມີຜົນສຳເລັດ.

ໂອກາດນີ້, ທ່ານ ຟຸ້ງ ກວາງ ຫຽບ ປະທານສະພາສະມາຊິກກຸ່ມບໍລິສັດເຄມີຫວຽດນາມ ໄດ້ມີຄໍາເຫັນໂດຍໄດ້ເນັ້ນໜັກວ່າ: ກຸ່ມບໍລິສັດເຄມີຫວຽດນາມ ຖືສໍາຄັນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ຫວຽດນາມ-ລາວ ຢູ່ສະເໝີ. ໂຄງການ ບໍ່ເກືອກາລີ ບໍ່ພຽງແຕ່ມີຄວາມໝາຍທາງເສດຖະກິດ, ແຕ່ຍັງເປັນສັນຍາລັກຂອງມິດຕະພາບ ແລະ ການຮ່ວມມືຍຸດທະສາດທີ່ຍາວນານ ລະຫວ່າງ ສອງລັດຖະບານ ກໍຄື ປະຊາຊົນສອງຊາດ.

ທ່ານ ຫງວຽນ ຮິວ ຕູ ຜູ້ອໍານວຍການໃຫຍ່ກຸ່ມບໍລິສັດເຄມີຫວຽດນາມ ໄດ້ຢືນຢັນການຕັດສິນໃຈຂອງ ກຸ່ມບໍລິສັດເຄມີຫວຽດນາມ ໃນການເຮັດສໍາເລັດບັນດາລະບຽບການດ້ານກົດໝາຍ, ການເງິນ, ເຕັກນິກ ເພື່ອເລີ່ມໂຄງການໂດຍໄວ, ເປີດບົດບາດໃໝ່ໃນການຮ່ວມມື ດ້ານອຸດສາຫະກໍາ ລະຫວ່າງ ຫວຽດນາມ-ລາວ.

ກຸ່ມທຸລະກິດເຄມີຫວຽດນາມ ເປັນກຸ່ມເສດຖະກິດຂອງລັດ ຂຶ້ນກັບກະຊວງການເງິນ, ເຄື່ອນໄຫວໃນບັນດາຂົງເຂດຝຸ່ນ, ເຄມີພື້ນຖານ, ຢາງພາລາ, ແບັດເຕີລີ ແບບສາກໄຟ, ສານຊັກລ້າງ ແລະ ຂຸດຄົ້ນ ແຮ່ “apait” ຫລື ຫີນມີຄ່າ ດ້ວຍ 34 ໜ່ວຍງານສະມາຊິກ. ກຸ່ມມີບົດບາດເປັນກຳລັງຫລວງ ໃນການຮັບປະກັນຄວາມໝັ້ນຄົງດ້ານຝຸ່ນຂອງຊາດ, ພັດທະນາຂະແໜງອຸດສາຫະກໍາເຄມີສີຂຽວ, ໝູນວຽນ ແລະ ຫັນເປັນດີຈິຕອນ, ກ້າວສູ່ເປົ້າໝາຍການເຕີບໂຕທີ່ຍືນຍົງ ແລະ ເຊື່ອມໂຍງສາກົນ ທັງລວງເລິກ ແລະ ລວງກວ້າງ.

KPL