ຂປລ
ອຸທົກກະໄພ ແລະ ດິນເຈື່ອນ ທີ່ເກີດຂຶ້ນ ຈາກອິດທິພົນຂອງ ພາຍຸໄຕ້ຝຸ່ນ ຢາກິ ສົ່ງຜົນກະທົບ ຕໍ່ເດັກນ້ອຍເກືອບ 6 ລ້ານຄົນ ທົ່ວອາຊີ ຕາເວັນອອກສຽງໃຕ້ (ອາຊຽນ) ແລະ ຍັງເຮັດໃຫ້ ຈຳນວນ ຜູ້ເສຍຊີວິດ ຈາກໄພພິບັດ ເພີ່ມສູງຂຶ້ນ.
ຂປລ.ສຳນັກຂ່າວ ເອເອຟພີ, ກອງທຶນເພື່ອເດັກ ແຫ່ງສະຫະ ປະຊາຊາດ (ຢູນິເຊຟ) ລາຍງານ: ອຸທົກກະໄພ ແລະ ດິນເຈື່ອນ ທີ່ເກີດຂຶ້ນ ຈາກອິດທິພົນຂອງ ພາຍຸໄຕ້ຝຸ່ນ ຢາກິ ສົ່ງຜົນກະທົບ ຕໍ່ເດັກນ້ອຍເກືອບ 6 ລ້ານຄົນ ທົ່ວອາຊີ ຕາເວັນອອກສຽງໃຕ້ (ອາຊຽນ) ແລະ ຍັງເຮັດໃຫ້ ຈຳນວນ ຜູ້ເສຍຊີວິດ ຈາກໄພພິບັດ ເພີ່ມສູງຂຶ້ນ. ສືບເນື່ອງຈາກ ຄວາມຮຸນແຮງຂອງພາຍຸ ໄຕ້ຝຸ່ນ ຢາກິ ສ້າງຄວາມ ເສຍຫາຍຢ່າງຮຸນແຮງ ໃນ ສສ ຫວຽດນາມ, ໄທ, ສປປ ລາວ ແລະ ມຽນມາ ເມື່ອເກືອບ 2 ອາທິດແລ້ວ. ພາຍຸລູກດັ່ງກ່າວ ໄດ້ເພີ່ມຄວາມສ່ຽງ ຕໍ່ການເຂົ້າເຖິງນໍ້າສະອາດ, ການສຶກສາ, ການດູແລສຸຂະພາບ, ອາຫານ ແລະ ທີ່ພັກອາໄສ ຂອງເດັກນ້ອຍ ໃນປະເທດດັ່ງກ່າວນີ້. ໂດຍສະເພາະ ສສ ຫວຽດນາມ ມີປະຊາຊົນ ປະມານ 3 ລ້ານຄົນ ພວມຜະເຊີນກັບ ຄວາມສຽງ ທີ່ຈະເຈັບປ່ວຍ ຈາກການຂາດແຄນ ນໍ້າດື່ມທີ່ປອດໄພ ແລະ ຖືກສຸຂະອານາໄມ, ຂະນະທີ່ ມຽນມາ ມີປະຊາຊົນເກືອບ 400.000 ຄົນ ຕ້ອງຍົກຍາຍ ອອກຈາກເຮືອນ ເນື່ອງຈາກ ນໍ້າຖ້ວມສູງ.ຂະນະທີ່ ໂຄງການ ອາຫານໂລກ ປະກາດວ່າ: ຈະເລີ່ມແຈກຢາຍ ອາຫານ ສຸກເສີນ ເປັນເວລາ 1 ເດືອນ ໃຫ້ກັບ ປະຊາຊົນ ຫລາຍກວ່າ 500.000 ຄົນ ໃນມຽນມາ.
KPL