ຂປລ. ກອງປະຊຸມຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍ ວ່າດ້ວຍການຄວບຄຸມ ເຄື່ອງດື່ມທີ່ມີທາດເຫລົ້າ ຈັດຂຶ້ນໃນວັນທີ 19 ກັນຍາ 2024 ໂດຍການເປັນປະທານຂອງ ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ, ມີປະທານກໍາມາທິການວັດທະນະທໍາ-ສັງຄົມ, ຜູ້ຕາງໜ້າຈາກ ກຳມາທິການຂອງ ສພຊ ແລະ ພະນັກງານ-ລັດຖະກອນ ຈາກພາກສ່ວນທີ່ກ່ຽວຂ້ອງ ເຂົ້າຮ່ວມ.

ທ່ານ ຄໍາໃບ ດໍາລັດ ໄດ້ໃຫ້ຮູ້ວ່າ: ກົດໝາຍວ່າດ້ວຍການຄວບຄຸມ ເຄື່ອງດື່ມທີ່ມີທາດເຫລົ້າ ໄດ້ປະກາດໃຊ້ ແລະ ຈັດຕັ້ງປະຕິບັດເປັນໄລຍະເວລາເກືອບ 10 ປີ ແລະ ຍັງບໍ່ທັນໄດ້ຮັບການປັບປຸງ ຫລື ດໍາເນີນການປະເມີນຈັກ ຄັ້ງ ແລະ ໃນຊຸມປີຜ່ານມາ ເຫັນວ່າສະພາບການຄວບຄຸມ, ຄຸ້ມຄອງ ແລະ ບໍລິໂພກເຄື່ອງດື່ມ ທີ່ມີທາດເຫລົ້າ ພົບ ກັບຄວາມຫຍຸ້ງຍາກຫລາຍບັນຫາ, ຂາດການຕິດຕາມກວດກາຢ່າງຕໍ່ເນື່ອງ ແລະ ເຄື່ອງດື່ມທີ່ມີທາດເຫລົ້ານີ້ ເປັນເຄື່ອງດື່ມທີ່ມີສ່ວນປະສົມຂອງເອຕາໂນນ (Ethanol), ການບໍລິໂພກ ຫລື ດື່ມເກີນຂອບເຂດ ຈະສົ່ງຜົນຮ້າຍ ແລະ ຜົນກະທົບໂດຍກົງ ແລະ ທາງອ້ອມ ຕໍ່ສຸຂະພາບ, ຮ່າງກາຍຂອງມະນຸດ ແລະ ສົ່ງຜົນກະທົບໂດຍກົງຕໍ່ຄອບຄົວ, ເສດຖະກິດ-ສັງຄົມຂອງຊາດ ແລະ ເປັນສາເຫດທີ່ກໍໃຫ້ເກີດພະຍາດຊຳເຮື້ອ, ພາໃຫ້ເກີດອຸປະຕິເຫດ, ອາຊະຍາກຳ, ຄວາມບໍ່ເປັນລະບຽບຮຽບຮ້ອຍ ແລະ ບັນຫາອື່ນໆ.

ຄະນະປະຈໍາສະພາແຫ່ງຊາດ ໄດ້ຕົກລົງໃຫ້ຄະນະຮັບຜິດຊອບ ປະເມີນຜົນການຈັດຕັ້ງປະຕິບັດກົດໝາຍ, ຈັດກອງປະຊຸມຮ່ວມກັບກະຊວງສາທາລະນະສຸກ ເພື່ອຮັບຟັງການລາຍງານຜົນການປະເມີນຜົນການ ຈັດຕັ້ງປະຕິບັດກົດໝາຍວ່າດ້ວຍ ການຄວບຄຸມເຄື່ອງດື່ມ ທີ່ມີທາດເຫລົ້າໃນໄລຍະຜ່ານມາ ເພື່ອເປັນການ ສະຫລຸບ, ຖອດຖອນບົດຮຽນໃຫ້ແກ່ ການຈັດຕັ້ງປະຕິບັດ ກົດໝາຍສະບັບດັ່ງກ່າວ ໂດຍຍົກໃຫ້ເຫັນດ້ານຕັ້ງໜ້າ, ດ້ານຄົງຄ້າງ, ສາເຫດທີ່ພາໃຫ້ມີຜົນກະທົບ ຕໍ່ການຈັດຕັ້ງປະຕິບັດກົດໝາຍ ເພື່ອຍົກສູງຄຸນນະພາບ ຂອງການຈັດຕັ້ງປະຕິບັດກົດໝາຍ, ເຮັດ ໃຫ້ສະຕິເຄົາລົບກົດໝາຍ ທົ່ວສັງຄົມສູງຂຶ້ນ ເທື່ອລະກ້າວ ແລະ ການຕິດຕາມກວດກາການ ປະເມີນຜົນການຈັດຕັ້ງ ປະຕິບັດກົດໝາຍໃນຄັ້ງນີ້ ເປັນຄັ້ງທຳອິດທີ່ໄດ້ຮ່ວມກັບ ກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງ ເພື່ອນຳເອົາບັນຫາ, ຂໍ້ຄົງຄ້າງ, ສິ່ງທ້າທາຍ ແລະ ທິດທາງແກ້ໄຂໃນຕໍ່ໜ້າ ໄປລາຍງານຕໍ່ກອງປະຊຸມ ຄະນະປະຈຳສະພາແຫ່ງຊາດ ແລະ ນຳເຂົ້າລາຍງານ ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ພິຈາລະນາ ແລະ ອອກມະຕິເພື່ອຮັບຮອງ.

ໃນກອງ​ປະຊຸມ, ທ່ານ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ກໍໄດ້ລາຍງານ ການປະເມີນຜົນ ການຈັດຕັ້ງປະຕິບັດກົດໝາຍວ່າດ້ວຍ ການຄວບຄຸມເຄື່ອງດື່ມທີ່ມີທາດເຫລົ້າ. ຈາກນັ້ນ, ​ບັນດາ​ຜູ້ເຂົ້າ​ຮ່ວມ​ໄດ້ພ້ອມກັນ​ຄົ້ນຄວ້າ ແລະ ປະກອບ​ຄຳຄິດ​ຄຳ​ເຫັນ ຢ່າງ​ກົງ​ໄປ-ກົງ​ມາ, ມີ​ລັກສະນະ​ສ້າງສັນ ເພື່ອຊອກ​ໃຫ້​ເຫັນ​ໄດ້​ດ້ານ​ດີ, ຜົນງານ, ຂໍ້ຄົງ​ຄ້າງ, ສາ​ເຫດ ​ແລະ ວິທີ​ແກ້​ໄຂ​ໃນ​ຕໍ່ໜ້າ ເພື່ອໃຫ້ກະຊວງດັ່ງກ່າວ ນຳໄປຄົ້ນຄວ້າ ພິຈາລະນາປັບປຸງ ເພື່ອກະກຽມລາຍງານ ຕໍ່ກອງປະຊຸມສະໄໝສາມັນ ເທື່ອທີ 8 ຂອງ ສພຊ ຊຸດທີ IX ທີ່ຈະໄຂ ຂຶ້ນໃນຕໍ່ໜ້ານີ້.

ຂ່າວ: ສອນສັກ ວັນວິໄຊ

KPL