ຂປລ. ພິທີປະກາດແຕ່ງຕັ້ງ ທ່ານ ພູທະນູເພັດ ໄຊສົມບັດ ​ເປັນຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງວຽງຈັນ ຈັດຂຶ້ນໃນວັນທີ 16 ກັນຍາ 2024 ຢູ່ຫ້ອງວ່າການປົກແຂວງວຽງຈັນ ໂດຍມີ ທ່ານ ນາງ ສີໃສລື ເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີ ສະຫາຍ ຄໍາພັນ ສິດທິດໍາພາ ກຳມະການສູນກາງພັກ,  ເລຂາຄະນະບໍລິຫານງານພັກແຂວງ, ເຈົ້າແຂວງວຽງຈັນ ພ້ອມດ້ວຍຄະນະບໍລິຫານງານພັກແຂວງ, ບັນດາເຈົ້າເມືອງ, ຮອງເຈົ້າເມືອງ, ຫົວໜ້າພະແນກ, ກົມກອງ ແລະ ພະນັກງານຫລັກແຫລ່ງພາຍໃນແຂວງ ເຂົ້າຮ່ວມ.

​

ໃນ​ພິທີ, ທ່ານ ສຸລິຍາ ພົມມີສິດ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຜ່ານຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 222/ຄລສພ, ລົງວັນທີ 29 ສິງຫາ 2024 ວ່າດ້ວຍການຍົກຍ້າຍພະນັກງານ ໄປຮັບໜ້າທີ່ໃໝ່ຢູ່ແຂວງວຽງຈັນ, ຄຳສັ່ງຂອງນາຍົກລັດ ຖະມົນຕີສະບັບເລກທີ15/ນຍ, ລົງວັນທີ 30 ສິງຫາ 2024 ວ່າດ້ວຍການຍົກຍ້າຍ ພະນັກງານໄປຮັບໜ້າທີ່ໃໝ່ ໂດຍໄດ້ຍົກຍ້າຍ ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ ໄປຮັບໜ້າທີ່ໃໝ່ຢູ່ແຂວງວຽງຈັນ, ມະຕິຕົກລົງຂອງຄະນະ ເລຂາທິການສູນກາງພັກ ສະບັບເລກທີ 223/ຄລສພ, ລົົົົົົົົງວັນທີ 29 ສິງຫາ 2024 ວ່າດ້ວຍການແຕ່ງຕັ້ງ ພູທະນູເພັດ ໄຊສົມບັດ  ເປັນກຳມະການບໍລິຫານງານພັກແຂວງ, ກຳມະການຄະນະປະຈຳພັກແຂວງ, ເປັນຮອງເລຂາຄະນະບໍລິຫານງານພັກແຂວງວຽງຈັນ, ຂໍ້ຕົກລົງຂອງທ່ານເຈົ້າ ແຂວງວຽງຈັນ ສະບັບເລກທີ 2338/ຈຂ.ວຈ ລົງວັນທີ 16 ກັນຍາ 2024 ວ່າດ້ວຍການແຕ່ງຕັ້ງຮອງເຈົ້າແຂວງ ໂດຍໄດ້ແຕ່ງຕັ້ງ ທ່ານ ພູທະນູເພັດ ໄຊສົມບັດ ເປັນຮອງເຈົ້າແຂວງວຽງຈັນ.

ທ່ານ ນາງ ສີໃສ ລືເດດມູນສອນ ໄດ້ໂອ້ລົມຕໍ່ພິທີວ່າ: ການປະກາດການຈັດຕັ້ງໃນຄັ້ງນີ້, ເປັນບາດກ້າວສຳຄັນໃນການແຕ່ງຕັ້ງພະນັກງານ ການນຳຍຸດທະສາດ ແນໃສ່ກະກຽມເຂົ້າສູ່ກອງປະຊຸມໃຫຍ່ ຂອງແຂວງໃຫ້ມີຜົນສຳເລັດສູງ ເຊິ່ງ ສະຫາຍ ພູທະນູເພັດ ໄຊສົມບັດ ເປັນຜູ້ໜຶ່ງທີ່ມີຄວາມຮູ້ ຄວາມສາມາດໃນການນຳພາ-ຊີ້ນຳ ແລະ ສະຫາຍມີການເຕີບໃຫຍ່ແຕ່ຮາກຖານຂຶ້ນມາ, ມີຄວາມສາມາດດ້ານການເສດຖະກິດ-ການເງິນ, ດ້ານການກໍ່ສ້າງພັກ-ພະນັກງານ ເພື່ອມາຊ່ວຍແຂວງວຽງຈັນ ວາງແຜນພັດ ທະນາເສດຖະກິດ-ສັງຄົມຂອງແຂວງ, ໃນການຂຸດຄົ້ນແຫລ່ງລາຍຮັບ ໃຫ້ໄດ້ເພີ່ມຂຶ້ນ, ພັດທະນາເສດຖະກິດ-ສັງຄົມຂອງແຂວງ ໃຫ້ດີຂຶ້ນໃນຕໍ່ໜ້າ. ດັ່ງນັ້ນ, ຮຽກຮ້ອງມາຍັງບັນດາສະຫາຍ ໃຫ້ມີຄວາມເປັນເອກະພາບ ໃນການປະກາດແຕ່ງຕັ້ັງໃນຄັ້ງນີ້ ແລະ ພາຍຫລັງການປະກາດແຕ່ງຕັ້ງ, ໃຫ້ມີການເຜີຍແຜ່ໃຫ້ຮາກຖານພັກ ແລະ ສຳນັກງານຕ່າງໆ ໄດ້ຮັບຊາບ ແລະ ໃຫ້ຜູ້ທີ່ຖືກແຕ່ງຕັ້ງຈັດແບ່ງເວລາ ໃນການລົງພົບປະກັບພະນັກງານ, ສະມາຊິກພັກຢູ່ຂັ້ນຮາກຖານ ໄດ້ຮັບຊາບຢ່າງທົ່ວເຖິງ.

ໂອກາດນີ້, ສະຫາຍ ຄຳພັນ ສິດທິດຳພາ ກໍໄດ້ລາຍງານສະພາບ ການກະກຽມກອງປະຊຸມໃຫຍ່ 3 ຂັ້ນ ໂດຍຫຍໍ້ວ່າ: ການດໍາເນີນກອງປະຊຸມໃຫຍ່ 3 ຂັ້ນ ໃນທົ່ວແຂວງ ເລີ່ມຈາກຂັ້ນຮາກຖານບ້ານ, ປັດຈຸບັນ ແມ່ນສໍາເລັດກອງປະຊຸມໃຫຍ່ຂັ້ນບ້ານ 431 ທົ່ວແຂວງ; ການດໍາເນີນກອງ ປະຊຸມໃຫຍ່ ຂອງໜ່ວຍພັກສໍານັກງານອົງການ ຂັ້ນເມືອງໃນທົ່ວແຂວງ ສໍາເລັດແລ້ວ 661 ໜ່ວຍ, ຍັງ 8 ໜ່ວຍ, ເທົ່າກັບ 98,80%, ຄາດວ່າຈະໃຫ້ສຳເລັດໃນເດືອນຕຸລາ 2024. ສໍາລັບການຈັດຕັ້ງດໍາເນີນ ກອງປະຊຸມໃຫຍ່ອົງຄະນະພັກເມືອງ ຈະເລີ່ມແຕ່ເດືອນມັງກອນ 2025 ເປັນຕົ້ນໄປ ແລະ ໃຫ້ສໍາເລັດໃນເດືອນມີນາ 2025 ແລະ ກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງວຽງຈັນ ແມ່ນຈະສູ້ຊົນໃຫ້ໄດ້ເປີດພາຍ ໃນເດືອນກັນຍາ 2025 ຕາມແຜນການທີ່ກໍານົດໄວ້.

ຂ່າວ-ພາບ: ​ຂ່າວແຂວງ​ວຽງ​ຈັນ

KPL