ຂປລ
ຂປລ. ສະຖານທູດສະຫະລັດ ອາເມລິກາ ປະຈໍາ ສປປ ລາວ ໄດ້ມອບລົດໃຫຍ່ ໂຕໂຍຕາ ຟໍຈູນເນີ (TOYOTA FORTUNER) ຈໍານວນ 2 ຄັນ, ລົດຈັກ ເວບ125 ໄອ (WAVE 125i) ຈໍານວນ 22 ຄັນ ລວມມູນຄ່າ 3,2 ຕື້ກີບ ໃຫ້ແກ່ອົງການໄອຍະການປະຊາຊົນສູງສຸດ ໃນວັນທີ 12 ກັນຍາ 2024 ນີ້
ຂປລ. ສະຖານທູດສະຫະລັດ ອາເມລິກາ ປະຈໍາ ສປປ ລາວ ໄດ້ມອບລົດໃຫຍ່ ໂຕໂຍຕາ ຟໍຈູນເນີ (TOYOTA FORTUNER) ຈໍານວນ 2 ຄັນ, ລົດຈັກ ເວບ125 ໄອ (WAVE 125i) ຈໍານວນ 22 ຄັນ ລວມມູນຄ່າ 3,2 ຕື້ກີບ ໃຫ້ແກ່ອົງການໄອຍະການປະຊາຊົນສູງສຸດ ໃນວັນທີ 12 ກັນຍາ 2024 ນີ້, ຕາງໜ້າມອບໂດຍ ທ່ານ ນາງ ແຣັດເຕີ ວາເຣຍອາວາ ເອກອັກຄະລັດຖະທູດ ສະຫະລັດ ອາເມລິກາ ປະຈໍາ ລາວ ແລະ ຮັບໂດຍ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ໂດຍມີພາກສ່ວນກ່ຽວຂ້ອງຂອງ ທັງສອງຝ່າຍ ເຂົ້າຮ່ວມ ເປັນສັກຂີພິຍານ.
ໂອກາດດັ່ງກ່າວ, ທ່ານ ໄຊຊະນະ ໂຄດພູທອນ ໄດ້ສະແດງຄວາມຂອບໃຈ ແລະ ຕີລາຄາສູງຕໍ່ ທ່ານນາງ ແຣັດເຕີ ວາເຣຍອາວາ ກໍຄື ສະຖານທູດ ສະຫະລັດ ອາເມລິກາ ປະຈໍາ ສປປ ລາວ ທີ່ໄດ້ນຳເອົາລົດຈຳນວນດັ່ງກ່າວ ມາມອບໃຫ້ໃນຄັ້ງນີ້ ເຊິ່ງເປັນການປະກອບສ່ວນເຮັດໃຫ້ວຽກງານ ພາຍໃນອົງການໄອຍະການປະຊາຊົນສູງສຸດ ດຳ ເນີນໄປຢ່າງໂລ່ງລ່ຽນຂຶ້ນກວ່າເກົ່າ, ທັງເປັນການປະກອບສ່ວນອັນສຳຄັນ ໃນການກະກຽມໃຫ້ແກ່ ການສະເຫລີມ ສະຫລອງ ວັນສ້າງຕັ້ງອົງການ ໄອຍະການປະຊາຊົນ ຄົບຮອບ 35 ປີ ທີ່ຈະມາເຖິງນີ້. ພ້ອມນີ້, ທ່ານຍັງ ຢືນຢັນວ່າ ຈະນຳເອົາ ພາຫະນະທີ່ໄດ້ຮັບໃນຄັ້ງນີ້, ໄປຮັບໃຊ້ເຂົ້າໃນວຽກງານ ຂອງອົງການໄອຍະການປະຊາຊົນ ໃຫ້ເກີດຜົນປະ ໂຫຍດສູງສຸດ.
ໃນໂອກາດມອບ-ຮັບ ລົດໃນຄັ້ງນີ້, ສອງຝ່າຍ ໄດ້ພົບປະໂອ້ລົມກັນ ໂດຍໄດ້ຕີລາຄາສູງ ຕໍ່ຜົນສໍາເລັດຂອງການຮ່ວມມື ລະຫວ່າງ ສປປ ລາວ ແລະ ສະຫະລັດ ອາເມລິກາ ໃນໄລຍະຜ່ານມາ ໂດຍສະເພາະ ການຮ່ວມມື ລະຫວ່າງ ອົງການໄອຍະການປະຊາຊົນ ແຫ່ງ ສປປ ລາວ ແລະ ສະຖານທູດ ສະຫະລັດ ອາເມລິກາ ປະຈໍາ ລາວ ທີ່ໄດ້ຮັບການຊ່ວຍເຫລືອ ໃນການສ້າງຄວາມເຂັ້ມແຂງ ທາງດ້ານວິຊາການ ໂດຍຜ່ານການຝຶກອົບຮົມຍົກລະດັບໃນຫົວ ຂໍ້ຕ່າງໆເຊັ່ນ: ອາຊະຍາກໍາຂ້າມຊາດ ທີ່ມີການຈັດຕັ້ງ, ຟອກເງິນ, ຢາເສບຕິດ ແລະ ອື່ນໆ. ນອກຈາກນີ້, ສະຖານທູດ ສະຫະລັດ ອາເມລິກາ ປະຈໍາ ລາວ ຍັງໄດ້ສະໜອງອຸປະກອນເຄື່ອງໃຊ້ຫ້ອງການ ໃຫ້ແກ່ອົງການໄອຍະການປະຊາຊົນ ຂອງ ສປປ ລາວ ເປັນຢ່າງດີຕະຫລອດມາ, ອັນໄດ້ປະກອບສ່ວນ ເຮັດໃຫ້ວຽກງານໄອຍະການປະຊາຊົນ ຂອງ ສປປ ລາວ ໄດ້ຮັບການພັດທະນາດີ ຂຶ້ນເປັນກ້າວໆ, ຮັບປະກັນການປະຕິບັດໜ້າທີ່ ວຽກງານໄອຍະການ ໃຫ້ມີປະສິດທິພາບສູງ ແນໃສ່ປົກປ້ອງຜົນປະໂຫຍດຂອງລັດ, ສັງຄົມ, ສິດ ແລະ ຜົນປະໂຫຍດອັນຊອບທໍາຂອງພົນລະເມືອງ, ເຮັດໃຫ້ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ປະກອບສ່ວນເຂົ້າໃນ ການປົກປັກຮັກສາ ແລະ ພັດທະນາປະເທດຊາດ ຢ່າງບໍ່ຢຸດຢັ້ງ.
KPL
