ຂປລ. ໃນໂອກາດລົງເຄື່ອນໄຫວເຮັດວຽກຢູ່ ແຂວງສາລະວັນ ໃນວັນທີ 3 ກັນຍາ 2024 ຜ່ານມາ, ສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພົບປະໂອ້ລົມພະ ນັກງານຫລັກແຫລ່ງ ພະແນກອຸດສາຫະກໍາ ແລະ ການຄ້າ(ອຄ) ແຂວງ ໂດຍທ່ານໄດ້ເນັ້ນໃຫ້ເອົາໃຈໃສ່ ຄຸ້ມຄອງລາຄາສິນຄ້າ ທີ່ມີຜົນກະທົບໄວຕໍ່ຊີວິດການເປັນຢູ່ຂອງປະຊາຊົນ, ໃຫ້ຄົ້ນຄວ້າ ແລະ ຊອກເງື່ອນໄຂຢ່າງເລິກເຊິ່ງຕໍ່ການນຳເຂົ້າປະເພດສິນຄ້າຕ່າງໆ, ສິ່ງໃດຄວນຫລີກເວັ້ນ ແລະ ສິ່ງໃດຄວນຊຸກຍູ້ສົ່ງເສີມ ເພື່ອໃຫ້ປະຊາຊົນມີວຽກເຮັດງານທຳ ໂດຍສະເພາະ ແມ່ນການປູກພືດເປັນສິນຄ້າ, ການລ້ຽງສັດປະເພດຕ່າງໆ ເພື່ອເຮັດໃຫ້ຊິວິດການເປັນຢູ່ທີ່ດີຂຶ້ນ; ເອົາໃຈໃສ່ຄົ້ນຄວ້າ ເພື່ອສືບຕໍ່ຜັນຂະຫຍາຍມະຕິ 04 ຂອງກົມການເມືອງສູນກາງພັກ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງທີ່ຈະເປັນທິດທາງຕົ້ນຕໍ ໃນການແກ້ໄຂບັນຫາ ສະພາບການຕ່າງໆ ໃນປັດຈຸບັນ.

ພ້ອມນີ້, ທ່ານຍັງເນັ້ນໃຫ້ຂຸ້ນຂ້ຽວ ເອົາໃຈໃສ່ໃນການກະກຽມດຳເນີນກອງປະຊຸມໃຫຍ່ຂອງຄະນະພັກຮາກຖານ ໃຫ້ຮັບປະກັນໄດ້ດ້ານເນື້ອໃນ, ບຸກຄະລາກອນ, ແຜນພັດທະນາຂະແໜງ ການເປັນຫລັກ ເພື່ອລົງເລິກໃສ່ວຽກງານວິຊາສະເພາະ, ກໍານົດທິດທາງຢ່າງລະອຽດ, ພາວະວິໄສ ແລະ ມີວິທະຍາສາດ, ສົມຄູ່ກັບວຽກງານ ຕົວຈິງໃນທ້ອງຖິ່ນ, ສິ່ງສຳຄັນດ້ານບຸກຄະລາກອນ ກໍຕ້ອງມີມາດຖານ, ເງື່ອນໄຂຄົບຖ້ວນ, ເລືອກເຟັ້ນເອົາບຸກຄົນ ທີ່ຈະນໍາພາພັດທະນາຂະແໜງການຂອງຕົນ, ມີວິໄສທັດ, ມີຄວາມຈົງຮັກພັກດີ, ຄຸນສົມບັດສິນທໍາປະຕິວັດທີ່ໜັກແໜ້ນ, ເຂັ້ມແຂງ ແລະເປັນຜູ້ທີ່ເຮັດແທ້ທໍາຈິງ ເພື່ອນໍາພາເປັນ ເສນາທິການໃຫ້ແກ່ອົງການປົກຄອງແຂວງ, ກະຊວງອຸດສາ ຫະກຳ ແລະ ການຄ້າ, ທັງຮັບໃຊ້ໜ້າທີ່ການເມືອງ ດ້ວຍຄວາມເປັນເຈົ້າການ.

ໂອກາດນີ້, ສະຫາຍ ຄຳຜ່ານ ສີລາວີ ກໍາມະການພັກແຂວງ, ຫົວໜ້າພະແນກອຸດສາຫະກໍາ ແລະ ການຄ້າແຂວງສາລະວັນ  ກໍໄດ້ລາຍງານສະພາບລວມໂດຍສັງເຂບ ໃນຂົງເຂດອຸດສາຫະກຳ ແລະ ການຄ້າແຂວງ ໂດຍສະເພາະແມ່ນ ຜົນສຳເລັດການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ, ການປະຕິບັດ ບັນດາຄາດໝາຍສູ້ຊົນ ແລະ ວຽກງານທີ່ພົ້ນເດັ່ນ, ປັດຈຸບັນ ມີ 1 ໜ່ວຍພັກ ໄດ້ສຳເລັດກອງປະຊຸມໃຫຍ່ຂອງຕົນ ແລະ 3 ໜ່ວຍພັກ ແມ່ນຈະສືບຕໍ່ດໍາເນີນໃຫ້ສໍາເລັດໃນຕົ້ນເດືອນຕຸລາ. ສ່ວນການຈັດຕັ້ງປະຕິບັດບັນດາຄາດໝາຍສູ້ຊົນ ເຫັນວ່າລວມຍອດມູນຄ່າດ້ານອຸດສາ ຫະກຳປຸງແຕ່ງ ບັນລຸ 254 ຕື້ກວ່າກີບ, ມູນຄ່າຈໍລະຈອນສິນຄ້າ ປະຕິບັດໄດ້ 1.074,62 ຕື້ກວ່າກີບ, ມູນຄ່າການສົ່ງອອກ ປະຕິບັດໄດ້ 51 ລ້ານກວ່າໂດລາສະຫະລັດ, ມູນຄ່າການນໍາເຂົ້າ ປະຕິບັດໄດ້ 21 ລ້ານກວ່າໂດລາສະຫະລັດ. ນອກນັ້ນ, ຍັງໄດ້ເອົາໃຈໃສ່ຕິດຕາມເຝົ້າລະວັງສະພາບການເໜັງຕີງຂອງລາຄາສິນຄ້າຢູ່ ຕາມທ້ອງຕະຫລາດ ທີ່ກະທົບໄວຕໍ່ຊີວິດ ການເປັນຢູ່ຂອງສັງຄົມ, ຕ້ານການສວຍໂອກາດຂຶ້ນລາຄາສິນຄ້າ ຕາມລຳພັງໃຈໂດຍບໍ່ສົມເຫດສົມຜົນ ແລະ ອື່ນໆ.

ການພົບປະຢ້ຽມຢາມຄັ້ງນີ້, ຈັດຂຶ້ນຢູ່ທີ່ພະແນກອຸດສາຫະກໍາ ແລະ ການຄ້າແຂວງ ໂດຍການນໍາພາຂອງ ສະຫາຍ ດາວວົງ ພອນແກ້ວ ກໍາມະການສູນກາງພັກ, ເລຂາພັກແຂວງ, ເຈົ້າແຂວງສາລະວັນ, ທ່ານ ແຫວນເພັດ ລັດດາວົງ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ, ມີ ຄະນະຈັດຕັ້ງ ສູນກາງພັກ ທີ່ເຄື່ອນໄຫວຕິດຕາມ, ມີຄະນະພັກ, ຄະນະນໍາພະແນກ, ປະທານສະພາການຄ້າ-ອຸດສາຫະກຳແຂວງ ແລະ ພະນັກງານຫລັກແຫລ່ງພາຍໃນພະແນກ ເຂົ້າຮ່ວມ.

KPL